Thursday, October 3, 2013

ရခိုင်တိုင်းရင်းသား မြို့မိမြို့ဖများ၊ အစ္စလာမ် လူမှုရေး ခေါင်းဆောင်များအား သီးခြားစီ တွေ့ဆုံ၍ ဒေသတည်ငြိမ်အေးချမ်းရေးနှင့်ဖွံ့ဖြိုးရေးကိစ္စရပ်များကို ဆွေးနွေး မှာကြား

ရခိုင်ပြည်နယ် စစ်တွေမြို့၌ ရောက်ရှိနေသော ပြည်ထောင်စုသမ္မတမြန်မာနိုင်ငံတော် နိုင်ငံတော်သမ္မတ ဦးသိန်းစိန်သည် ယနေ့ နံနက် ၈ နာရီတွင် စစ်တွေမြို့ ဗန္ဓုလရိပ်သာ ဧည့်ခန်းမ၌ စစ်တွေမြို့မှ ရခိုင်တိုင်းရင်းသား မြို့မိမြို့ဖများ၊ အစ္စလာမ် လူမှုရေး ခေါင်းဆောင်များအား သီးခြားစီ တွေ့ဆုံ၍ ဒေသတည်ငြိမ်အေးချမ်းရေးနှင့် ဖွံ့ဖြိုးရေးကိစ္စရပ်များကို ဆွေးနွေး မှာကြား သည်။

ထို့နောက် နိုင်ငံတော်သမ္မတသည် စစ်တွေမြို့တွင် ကယ်ဆယ်ရေးစခန်းများ ဖွင့်လှစ်၍ ဒုက္ခသည်များအား စနစ် တကျ နေရာ ချထားပေးနေမှုနှင့် မြို့တည်ငြိမ်အေးချမ်းလာမှု အခြေအနေကို မော်တော်ယာဉ်ဖြင့် လှည့်လည်ကြည့်ရှု သည်။

ယင်းနောက် ရခိုင်ပြည်နယ်အစိုးရအဖွဲ့ရုံး၌ ရခိုင်ပြည်နယ် တည်ငြိမ် အေးချမ်းရေးနှင့် ဖွံ့ဖြိုး တိုးတက်ရေး ဆပ်ကော်မတီ ဝင် ပြည်နယ်အဆင့် ဌာနဆိုင်ရာ တာဝန်ရှိသူများနှင့် တွေ့ဆုံ သည်။

အခမ်းအနားတွင် ပြည်နယ်ဝန်ကြီးချုပ် ဦးလှမောင်တင်က ပြည်နယ်အတွင်း ပဋိပက္ခများ ဖြစ်ပွားခဲ့မှု အခြေအနေ၊ ပြန်လည် တည်ငြိမ်အေးချမ်းရေးအတွက် ဆောင်ရွက်ခဲ့မှု၊ ဒုက္ခသည် စခန်းများ ဖွင့်လှစ်ထားမှုနှင့် အမိုး အကာအောက် ရောက်ရှိရေး အတွက် နေအိမ်တန်းလျားများ တည်ဆောက်ပြီးစီးမှု၊ ပြန်လည်ထူထောင်ရေး လုပ်ငန်းများ ဆောင်ရွက်ပေးနေမှု အခြေ အနေများကို ရှင်းလင်းတင်ပြပြီး နိုင်ငံတော်သမ္မတက ဒေသတည်ငြိမ်အေး ချမ်းရေး၊ တရားဥပဒေစိုးမိုးရေးနှင့်ဒေသခံပြည်သူ များ၏ လူမှုစီးပွားဘ၀ ဖွံ့ဖြိုးတိုးတက်ရေး အတွက် ဆောင်ရွက်သင့် သည်များကို လမ်းညွှန်မှာကြားသည်။

နိုင်ငံတော်သမ္မတသည် ပြည်ထောင်စုဝန်ကြီးများ၊ ပြည်နယ်ဝန်ကြီးချုပ်၊ ညှိနှိုင်းကွပ်ကဲရေးမှူး (ကြည်း၊ ရေ၊ လေ)နှင့် ဒုတိယ ဝန်ကြီးများနှင့်အတူ မွန်းလွဲပိုင်းတွင် အထူးလေယာဉ်ဖြင့် ကျောက်ဖြူမြို့သို့ ရောက်ရှိသည်။

ထို့နောက် လေဆိပ်ဧည့်ခန်းမ၌ ကျောက်ဖြူမြို့ ဖွံ့ဖြိုးတိုးတက်ရေး အထောက်အကူပြု ကော်မတီဝင်များ၊ မြို့နယ် စည်ပင် သာယာရေး ကော်မတီဝင်များနှင့် မြို့မိမြို့ဖများ အား တွေ့ဆုံ၍ နိုင်ငံတော်အစိုးရ၏ နိုင်ငံရေး၊ စီးပွားရေး၊ အုပ်ချုပ်ရေး ပြုပြင်ပြောင်းလဲမှု လုပ်ငန်းစဉ်များ ဆောင်ရွက်နေမှု၊ ပြည်သူဗဟိုပြုအုပ်ချုပ်ရေးစနစ် ကို ပြောင်းလဲကျင့် သုံးနေမှု နှင့် ကျောက်ဖြူဒေသ ဖွံ့ဖြိုးတိုးတက် ရေးအတွက် စီမံကိန်းများချမှတ် ဆောင်ရွက်နေမှု တို့ကို ရှင်းလင်းပြောကြား ပြီး ကျောက်ဖြူမြို့အတွင်း မော်တော်ယာဉ်ဖြင့် လှည့်လည် ကြည့်ရှုသည်။

နိုင်ငံတော်သမ္မတနှင့် အဖွဲ့ဝင်များသည် ကျောက်ဖြူမြို့မှတစ်ဆင့် အထူးလေယာဉ်ဖြင့် ဆက်လက်ထွက်ခွာခဲ့ရာ ညနေပိုင်းတွင် သံတွဲ မြို့သို့ ရောက်ရှိသည်။
(သတင်းအရင်းအမြစ်- မှူးဇော်၏ Facebook စာမျက်နှာ)

No comments: