Friday, August 30, 2013

(၇၄) နှစ်မြောက် ဆရာတော် ဦးဥတ္တမနေ့အခမ်းအနား မြန်မာနိုင်ငံအနှံ့ ခမ်းနားကြီးကျယ်စွာ ကျင်းပမည်

ရသေ့တောင်တွင် စိုက်ထူထားသော မြေစိုက် ပိုစတာအား တွေ့ရစဉ်။
ရသေ့တောင်မြို့တွင် စိုက်ထူထားသော မြေစိုက်ပိုစတာအား တွေ့ရစဉ်
 
စက်တင်္ဘာလ ၉ ရက်နေ့တွင် ကျရောက်မည့် (၇၄) နှစ်မြောက် မြန်မာ့ လွတ်လပ်ရေး မီးရှူးတန်ဆောင် ဆရာတော် ဦးဥတ္တမနေ့ အခမ်းအနားကို မြန်မာနိုင်ငံ အနှံ့အပြားတွင် ခန်းနားကြီးကျယ်စွာ ကျင်းပသွားမည်ဟု သတင်း ရရှိသည်။

ရန်ကုန်မြို့တွင် ကျင်းပမည့် (၇၄) နှစ်မြောက် ဆရာတော် ဦးဥတ္တမနေ့ အခမ်းအနား အတွက် ကျင်းပရေး (စီမံခန့်ခွဲရေး ကော်မီတီ)ကို သြဂတ်စ်လ ၂၄ ရက်နေ့က ဖွဲ့စည်းခဲ့ရာ သဘာပတိ အဖွဲ့ဝင်များ အဖြစ် ဦးဇော်အေးမောင် ( ရခိုင်တိုင်းရင်းသားရေးရာ ၀န်ကြီး)၊ ပါမောက္ခငြိမ်း ဦးမင်းလွှင် (ရန်ကုန်တိုင်း ဒေသကြီး အစိုးရ အဖွဲ့ရုံး)၊ ဦးကျော်စိန် (မျိုးစောင့်အုပ်စု)၊ ဦးသန်းမောင် (ဗဟိုတရားရုံးရှေ့နေကြီး)၊ ဒေါ်စောခင်တင့် ( ဥက္ကဌ- ရခိုင်စာပေနှင့် ယဉ်ကျေးမူ အဖွဲ့)တို့ပါဝင်သည်။

ဆရာတော် ဦးဥတ္တမနေ့ ကျင်းပရေး ကော်မီတီ (စီမံခန့်ခွဲရေး ကော်မီတီ) ဥက္ကဌ အဖြစ် ဒေါက်တာ စံလှကျော် (ငြိမ်း) က ဆောင်ရွက်မည် ဖြစ်ပြီး အတွင်းရေးမှူး အဖြစ် ဦးမြင့်ကျော်က ဆောင်ရွက်မည်ဖြစ်ကြောင်းနှင့် ကျင်းပရေး ကော်မီတီတွင် အဖွဲ့ဝင် ၃၇ ဦး ပါဝင်ကြောင်း သတင်း ရရှိသည်။

ရန်ကုန် (၇၄) နှစ်မြောက် ဆရာတော် ဦးဥတ္တမနေ့ ကျင်းပနိုင်ရေး အတွက် ကျောက်သူဌေးကြီး ဦးသိန်းဟံနှင့် ဦးမြထွန်းစိန်တို့မှ အလှူငွေ ကျပ် (၁၀) သိန်းစီ ထည့်ဝင်ကြပြီး ဦးရွှေဝင်း (အိုကေ အင်တာနက်) မှ ကျပ် (၅)သိန်း ထည့်ဝင် လှူဒါန်းကြသည်ဟု သိရသည်။

အခြား လူမူ အဖွဲ့အစည်းများမှလည်း အလှူငွေများ ထည့်ဝင်ကြသည်ဟု ဆိုသည်။ နိုင်ငံခြားတိုင်းပြည်များမှ အလှူငွေများ ကောက်ခံမည်မဟုတ်ဟု သိရသည်။

(၇၄) နှစ်မြောက် ဆရာတော် ဦးဥတ္တမနေ့အား ရန်ကုန်မြို့ မရမ်းကုန်းမြို့နယ် မင်းဓမ္မလမ်းရှိ မြန်မာ ကွန်ဗင်းရှန်း စင်တာ ( MCC) ခန်းမတွင် စက်တင်္ဘာလ ၉ ရက်နေ့တွင် ကျင်းပမည် ဖြစ်ပြီး နိုင်ငံခြား သံတမန်များ၊ နိုင်ငံရေး ပါတီများမှ ခေါင်းဆောင်များ၊ စိတ်ပါ ၀င်စားသူများ အားလုံးနှင့် ရခိုင်သူ ရခိုင်သားများ အား ဖိတ်ကြား သွားမည်ဟု ဆိုသည်။

ရခိုင်ပြည်နယ် စစ်တွေမြို့တွင်လည်း အဖွဲ့အစည်း အသီးသီးမှ ဆရာတော် ဦးဥတ္တမနေ့အား စည်ကားသိုက်မြိုက်စွာဖြင့် ကျင်းပရန် စီစဉ်နေကြောင်း သိရသည်။

ရသေ့တောင်မြို့တွင်လည်း ဆရာတော် ဦးဥတ္တမနေ့ အခမ်းအနားကို စက်တင်္ဘာလ ၉ ရက်နေ့ နေ့လည် ၁၂ နာရီမှ စတင်ပြီး အောင်မြေဗောဓိ ဓမ္မရိပ်သာ (အလိုတော်ပြည့်ကျောင်း) တွင် စည်ကား သိုက်မြိုက်စွာ ကျင်းပသွားမည်ဟု ဆိုသည်။

ယခုအခါ ဆရာတော် ဦးဥတ္တမနေ့ ကျင်းပရေး ပိုစတာများကို လူအသွားအလာများသည့် သင်္ဘောဆိပ်တွင် စိုက်ထူထားသည်ဟု သိရသည်။

ရသေ့တောင် ဆရာတော် ဦးဥတ္တမနေ့ အခမ်းအနားတွင် စာရေးဆရာမ ပံသုခင် (ရခိုင်ပြည်) နှင့် သားလှ (ရသေ့တောင်)တို့မှ ဟောပြောသွားမည်ဟု သတင်း ရရှိသည်။
(သတင်းအရင်းအမြစ်- နိရဉ္စရာသတင်းဌာန)

No comments: