Monday, August 18, 2014

မြောက်ဦးမြို့တွင် ထားရှိမည့် ဦးဥတ္တမကြေးရုပ်ထု သွန်းလုပ် ပြီးစီး

u-ottama
မြောက်ဦးမြို့ အနော်မာပန်းခြံတွင်ထားရန် ကြေးပိဿာချိန် ၃၀၀ ခန့်အသုံးပြုပြီး သွန်းလုပ်နေသည့် ဆရာတော် ဦးဥတ္တမရုပ်ထုတော်မှာ ယခုအခါ ပြီးစီးသွားပြီဖြစ်ကြောင်း သိရသည်။
ယခုကဲ့သို့ ကြေးရုပ်ထုသွန်းလုပ်ရသည့် ရည်ရွယ်ချက်ကို မြောက်ဦးမြို့မှ ဦးမောင်ကျော်ဇောက ယခုကဲ့သို့ ပြောသည်။
“ဆရာတော် ဦးဥတ္တမဆိုတာက အားလုံးသိတဲ့အတိုင်း ကျွန်တော်တို့ မြန်မာနိုင်ငံတခုတည်း အတွက် သာမက အာရှတခုလုံး နိုင်ငံရေးအမြင်ကို မြှင့်တင်ပေးခဲ့တယ်။ စတင်ပေးခဲ့တဲ့ ပုဂ္ဂိုလ်ဖြစ်တယ်။ နောက်ပြီး စစ်တွေမြို့ဖွား ရခိုင်လူမျိုးဖြစ်တဲ့အတွက် သမိုင်းအဆက်ဆက်မှာ ဆရာတော်ကို မေ့ ပျောက်ထားခဲ့တာ၊ ပယ်ဖျောက် ထားခဲ့တာတွေကို ပြန်ပြီး အခုခေတ် လူငယ်တွေ ဆရာတော် အကြောင်းကို သိအောင်၊ မိမိတို့ရခိုင်မျိုးအတွက် ဂုဏ်ယူတတ်လာအောင်၊ ပြီးတော့ ဆရာတော်ရဲ့ လုပ်ရပ်တွေကို အတုယူပြီး တချိန်ချိန်မှာ ခေါင်းဆောင် တတ်အောင်ဆိုတဲ့ ရည်ရွယ်ချက်နဲ့ လုပ်တာဖြစ် တယ်” ဟု ဆိုသည်။
ဦးဥတ္တမ ကြေးရုပ်ထုကို မြောက်ဦးမြို့နယ်တခုလုံးမှ စေတနာရှင်များ၏ စုပေါင်းအလှူထည့်ဝင်မှုဖြင့် မြောက်ဦးမြို့ ကြေးသွန်းဆရာကြီး ဦးကျော်သာညွန့်မှ ၆ လခန့် အချိန်ယူ သွန်းလုပ်ခဲ့ခြင်း ဖြစ်သည်။
သွန်းလုပ်ပြီးစီးသွားပြီဖြစ်သည့် ဆရာတော်ရုပ်ထုကို ယခုလ၂၂ ရက်နေ့တွင် မြောက်ဦးမြို့တပတ် လှည့်လည် အပူဇော်ခံမည်ကြောင်း သိရသည်။
လာမည့် စက်တင်ဘာလ ၉ ရက်နေ့တွင် ကျရောက်မည့် ဆရာ ဦးဥတ္တမ (၇၅) နှစ်မြောက် စိန်ရတု နှစ်ပတ်လည်နေ့တွင် အဆိုပါရုပ်ထုကို အခမ်းအနားများဖြင့် အနော်မာ ပန်းခြံတွင် ဖွင့်လှစ်ရန် စီစဉ်ထားကြောင်းလည်း ဦးမောင်ကျော်ဇောက ယခုကဲ့သို့ ဆက်ပြောသည်။
“ အဲဒီနေ့မှာ ဆရာတော်ရုပ်ထုကို အနော်မာပန်းခြံမှာ ဖွင့်ပွဲလုပ်မယ်။ ဆရာတော်ရုပ်ထုရှေ့မှာ နိုင်ငံရေးပါတီတွေက ပန်းခွေတွေချမယ်။ သံဃာတော်တွေကို ပင့်ဖိတ်ပြီး ဆွမ်းကျွေး အလှူအတန်း လုပ်မယ်။ ပြီးတော့ ဆရာတော်နဲ့ ပတ်သက်တဲ့ နံရပ်ကပ် စာစောင်တွေ၊ စာစီစာကုံးပြိုင်ပွဲ တွေလည်း ထည့်သွင်းဖို့ စီစဉ်ထားပါတယ်။”
ဆရာတော်ကြေးရုပ်ထုကို ထားရှိမည့် သျှစ်သောင်းဘုရားအနီးရှိ အနော်မာပန်းခြံကိုလည်း ဦးဥတ္တမ ပန်းခြံအဖြစ် ပြောင်းလဲသတ်မှတ်သွားမည်ဖြစ်ကြောင်း ဦးမောင်ကျော်ဇောက ပြောဆိုသည်။
(သတင်းအရင်းအမြစ်- နိရဉ္စရာသတင်းဌာန)

ရန်ကုန်စီးပွားရေးတက္ကသိုလ် ရွှေရတုအကြိုပဒေသာကပွဲတွင် သမဂ္ဂကျောင်းသားကျောင်းသူများ ပါဝင်တင်ဆက်ခွင့်ရ

eco
ရန်ကုန် စီးပွားရေးတက္ကသိုလ် နှစ်ငါးဆယ်ပြည့် ရွှေရတု အကြို ပဒေသာကပွဲ အခမ်းအနားကို သြဂုတ်လ ၁၅ ရက်နေ့က ကျင်းပပြုလုပ်ရာ စီးပွားရေး တက္ကသိုလ် ကျောင်းသားသမဂ္ဂမှ ပါဝင်တင်ဆက်ခွင့် ရရှိခဲ့သည်။
အခမ်းအနားကို ရန်ကုန်တိုင်း၊ အရှေ့ပိုင်းခရိုင်ရှိ စီးပွားရေး တက္ကသိုလ်ပင်မဆောင်တွင် ယင်းနေ့ နံနက် (၉)နာရီက စတင်ကျင်းပခဲ့ရာ ရန်ကုန်စီးပွားတက္ကသိုလ် ကျောင်းသားသမဂ္ဂမှ သံချပ်များ၊ ပြဇာတ်များဖြင့် ပါဝင်တင်ဆက်ခွင့်ရရှိခဲ့ကြောင်း ကျောင်းသားသမဂ္ဂ ဥက္ကဌ ကိုဇေယျာလွင်က ပြောသည်။
“ကျွန်တော်တို့ အနေနဲ့ ပထမဆုံးအကြိမ် ၀င်ရောက် ဖျော်ဖြေတာပါ။ ကျွန်တော်တို့ကို ဆိုင်းဆရာ ရွာစားစိန်လှမြိုင်က ကူညီတီးခတ်ပေးခဲ့ပါတယ်” ဟု ၎င်းက ပြောသည်။
သို့သော်လည်း သမဂ္ဂအနေဖြင့် အခမ်းအနားတွင် ဖျော်ဖြေတင်ဆက်မည့် သံချပ်ကို တက္ကသိုလ် တာဝန်ရှိသူများထံ ကြိုတင်ကာ တင်ပြခဲ့ရပြီး၊ ကျောင်းတာဝန်ရှိသူများက မူလ ကျောင်းသားများ ရေးသားထားသည့် သံချပ်ထဲမှ စာသားတစ်ချို့ကို ဖြတ်တောက်ပစ်ခဲ့ရကြောင်းဟု ကိုဇေယျာလွင်က ဆက်လက် ပြောဆိုသည်။
“မူလက အသုံးပြုရမယ့် စာသားတွေကို ကျောင်းတာဝန်ရှိသူတွေကို တင်ပြခဲ့ပြီး နောက်ပိုင်းမှာတော့ ပြောင်းလဲခဲ့ပါတယ်” ဟု ၎င်းက ပြောသည်။
အခမ်းအနားသို့ တက္ကသိုလ်ပေါင်းစုံမှ ကျောင်းသား၊ ကျောင်းသူ (၃၀၀) ခန့် လာရောက် အားပေးခဲ့ကြသည် ။ကျောင်းသား သမဂ္ဂမှ တင်ဆက်သော ဖျော်ဖြေမှုများနှင့် ပတ်သက်၍ စီးပွားရေးတက္ကသိုလ် ကျောင်းသားတစ်ဦးကလည်း ယခုလို ပြောဆိုသည်။
“သံချပ်နဲ့ ပြဇာတ်က အတော်လေး ကောင်းပါတယ်။ ကျောင်းကို သည်လောက်လူတွေ အများကြီး လာလိမ့်မယ် ထင်မထားဘူး။ ဒါပေမယ့် ပါမောက္ခချုပ်နဲ့ ကျောင်းတာဝန်ရှိသူတွေကတော့ (ပြဇာတ်နှင့် သံချပ်တွေကို) ကြိုက်လိမ့်မယ် မထင်ဘူး” ဟု ယင်းကျောင်းသားမှ ပြောသည်။
တက္ကသိုလ် နှစ်(၅၀) ပြည့် အကြို အခမ်းအနားတွင် ရန်ကုန်စီးပွားရေးတက္ကသိုလ် ကျောင်းသားသမဂ္ဂမှ ပြဇာတ်၊ သံချပ်တင်ဆက်မှုများ အပြင် အရောင်းဆိုင်ခန်းတွေပါ ခင်းကျင်းပြသခဲ့သည်။
တက္ကသိုလ် နှစ် ၅၀ ပြည့် ရွှေရတုအခမ်းအနားကို လာမည့် အောက်တိုဘာလ ၃၁ ရက်နေ့မှ နိုဝင်ဘာလ ၂ ရက်နေ့အထိ (၃) ရက်ကြာ ကျင်းပပြုလုပ်သွားမည်ဖြစ်ကြောင်း သိရသည်။
ရန်ကုန်စီးပွားရေးတက္ကသိုလ်အား ၁၉၄၆ ခုနှစ်တွင် စတင်ဖွင့်လှစ်ခဲ့ခြင်းဖြစ်ပြီး ယခုနှစ်၊ နိုဝင်ဘာလ ၂ ရက်နေ့တွင် နှစ် ၅၀ ပြည့်မည်ဖြစ်သည်။
(သတင်းအရင်းအမြစ်- နိရဉ္စရာသတင်းဌာန)

စားကျက်မြေကျူးကျော်သူ လယ်သမား (၂၂) ဦးကို ပုဏ္ဏားကျွန်းမြို့နယ်တွင် တရားစွဲ

ploughing
အများပိုင် စားကျက်မြေအပေါ် ကျူးကျော် ထွန်ယက်စိုက်ပျိုးသူ လယ်သမား (၂၂) ဦးကို ပုဏ္ဏားကျွန်းမြို့နယ် အုပ်ချုပ်ရေးမှူးက တရားလို ပြုလုပ်ပြီး သြဂုတ်လ ၁၄ ရက်နေ့က တရားစွဲဆိုလိုက်သည်ဟု သတင်း ရရှိသည်။
ပုဏ္ဏားကျွန်းမြို့နယ်၊ ကျွဲထိုးကျေးရွာ အနီးရှိ အများပိုင်မြေ စားကျက် (၁၆၃) ဧကတွင် ကျူးကျော် လယ်ထွန်ယက်စိုက်ပျိုးသူ လယ်သမား (၂၂) ဦးကို ပုဏ္ဏားကျွန်း မြို့နယ်တရားရုံးတွင် ဦးတိုက် လျှောက် တရားစွဲဆိုခဲ့ခြင်းဖြစ်ကြောင်း ပုဏ္ဏားကျွန်းမြို့နယ် အုပ်ချုပ်ရေးမှူး ဦးညီညီအောင်က ပြောဆိုသည်။
တရားစွဲဆိုခံရသော လယ်သမားများမှာ ပုဏ္ဏားကျွန်းမြို့နယ် ကျွဲထိုးကျေးရွာမှ (၉) ဦး၊ တန်းခိုးရွာမှ (၈) ဦးနှင့် အောင်ဒူလာကျေးရွာမှ (၅)ဦး ဖြစ်သည်ဟု ကျွဲထိုးရွာတွင် နေထိုင်သူ ကိုမောင်ခင်မြင့်က ပြောသည်။
လယ်သမားများကို မြို့နယ်တာဝန်ရှိသူများက တရားစွဲဆိုထားသော်လည်း မိမိတို့ အနေဖြင့် တရားစွဲဆိုခံသည်ကို မသိရသေးကြောင်း ကျွဲထိုးရွာမှ တရားစွဲဆိုခံရသူ လယ်သမားဦးစံလှဖော်၏ ဇနီးဖြစ် ဒေါ်ခင်ဦးရွှေက သြဂုတ်လ (၁၄) ရက်နေ့ ညနေက နိရဉ္စရာသို့ ပြောဆိုသည်။
“ကျွန်မတို့ကို မြို့နယ်မှာ တရားစွဲဖို့ သွားကြတယ်ဆိုတဲ့ သတင်းကိုတော့ ကြားမိတယ်။ စွဲဖြစ်လား မစွဲဖြစ်လားဆိုတာကိုတော့ ကျွန်မတို့ မသိသေးဘူး” ဟု သူမက ပြောသည်။
၂၀၀၃ ခုနှစ် တိုင်းမှူးမောင်ဦးလက်ထက်တွင် လယ်သမား အချို့အား အဆိုပါ မြေနေရာများ၌ လယ်ထွန်ယက်ရန် ခွင့်ပြုသဖြင့် ထိုလယ်မြေများတွင် ထွန်ယက် စိုက်ပျိုးခဲ့သည်မှာ ယခုဆိုရင် နှစ်ပေါင်း (၁၀) ကျော်ရှိပြီဟု ဒေါ်ခင်ဦးရွှေက ဆက်လက်ပြောဆိုသည်။
“ကျွန်မတို့ စလုပ်စားတော့ အဲ့ဒီနေရာမှာ မြေသားတွေ မဟုတ်ဘူး။ တောတွေပဲရှိတာ။ ခုကျတော့မှ ကျွန်မတို့လည်း လက်မလျော့ချင်ဘူးလေ” ဟု သူမက ပြောသည်။
ယင်းကိစ္စနှင့် ပတ်သက်၍ ပုဏ္ဏားကျွန်းမြို့နယ် အုပ်ချုပ်ရေးမှူး ဦးညီညီအောင်က “အဲ့ဒါကတော့ အရင်အစိုးရ အဆက်ဆက်က ဖြစ်ပါလိမ့်မယ်။ ခုကတော့ မြေကစားကျက်မြေကိုးဗျ။ အေးဒီတော့ စားကျက်မြေမှာ ကျူးကျော်ထွန်ယက်တဲ့အတွက် စားကျက်မြေကျူးကျော် စိုက်ပျိုးမှုနဲ့ တရားစွဲတာပေါ့” ဟု ပြန်လည် ပြောဆိုသည်။
လွန်ခဲ့သော သြဂုတ်လ (၁) ရက်နေ့ကလည်း မြောက်ဦးမြို့နယ် နတ်ချောင်းကျေးရွာတွင်လည်း စားကျက်မြေ အပေါ် လယ်သမား (၉) ဦးက ကျူးကျော် ထွန်ယက်စိုက်ပျိုးသဖြင့် ရွာသားများ အကြား အငြင်းပွားမှု ပြဿနာ ဖြစ်ပေါ်ခဲ့ပြီး  ကျေးရွာ အုပ်ချုပ်ရေးမှူးမှ လယ်သမား (၉) ဦးအား တရားစွဲဆိုရာ မြောက်ဦးမြို့နယ် တရားသူကြီးက အမူကို လက်မခံခဲ့ဟု သိရသည်။
ကျေးရွာသားများ ဘုံပိုင် စားကျက်မြေတွင် ကျူးကျော် လယ်ယာထွန်ယက်စိုက်ပျိုးမူကို ယခင် စစ်အစိုးရလက်ထက်တွင် သက်ဆိုင်ရာ အာဏာပိုင်များမှ သီးစားစနစ်ဖြင့် လုပ်ကိုင်ခဲ့ကြောင်း၊ ယခု အစိုးရလက်ထက်တွင် လယ်သမားအချို့မှ ဆက်လက် ထွန်ယက်စိုက်ပျိုးနေကြကြောင်း၊ ထိုသို့ စားကျက်မြေပေါ်တွင် ထွန်ယက်စိုက်ပျိုးသဖြင့် ကျွဲနွား မွေးမြူသူ လယ်သမားများမှာ စားကျက်မရှိ၍ အထူးအခက်အခဲဖြစ်ရသဖြင့် စားကျက်မြေကိစ္စနှင့် ပတ်သက်ပြီး ရခိုင်ရှိ ကျေးရွာတိုင်းလိုလိုတွင် ရွာသားများ အချင်းချင်းကြားတွင် ပြသနာ ဖြစ်ပွားနေကြောင်း သိရှိရသည်။
(သတင်းအရင်းအမြစ်- နိရဉ္စရာသတင်းဌာန)

(၄၇) နှစ်မြောက် သြဂုတ် ၁၃ အခမ်းအနား ရခိုင်ပြည်နယ် နေရာအချို့တွင်ကျင်းပ

Rice-killing-day-in-Mrauk-U
( မြောက်ဦးတွင် ကျင်းပသော ၁၃ သြဂုတ် အခမ်းအနား)
သြဂုတ်လ ၁၃ ရက်နေ့တွင် ကျရောက်သော (၄၇) နှစ်မြောက် August Thirteen ဟု လူသိများသော စစ်တွေဆန်ပြသနာနေ့ နှစ်ပတ်လည် အခမ်းအနားကို ရခိုင်ပြည်နယ် နေရာအချို့တွင် ကျင်းပခဲ့ကြောင်း သတင်း ရရှိသည်။
စစ်တွေမြို့တွင် အဖွဲ့အစည်း (၁၀) ခုနီးပါးက စစ်တွေဆန်ပြသနာနေ့ အောက်မေ့ဖွယ် အခမ်းအနားများကို နေရာအသီးသီးတွင် အဖွဲ့အစည်းအလိုက် ကျင်းပ ပြုလုပ်ခဲ့ကြသည်။
“ စစ်တွေမှာ ကျင်းပပြုလုပ်ခဲ့ကြတဲ့ အဖွဲ့အစည်းတွေမှာ ကျနော် သိရသလောက်ဆိုရင် ရဟန်းတော်တွေ၊ တက္ကသိုလ် ကျောင်းသား ကျောင်းသူများ၊ ကိုယ်ခံပညာအင်အားစု၊ ရခိုင်အမျိုးသမီး ကွန်ရက်၊ ရခိုင်အမျိုးသားပါတီတို့က အသီးသီးကျင်းပခဲ့ကြပါတယ်” ဟု ဆရာ ဦးလှမောင်က ဆိုသည်။
ယခုကဲ့သို့ အခမ်းအနားကို ကျင်းပရခြင်းမှာ သမိုင်းကို မျိုးဆက်သစ်လူငယ်များကို လက်ဆင့် ကမ်းလို၍ ဖြစ်ကြောင်း သူက ဆက်ဆိုသည်။
“ ဆန်ရေ စပါး ပေါကြွယ်ဝတဲ့ ရခိုင်ပြည်မှာ ဆန်ရှားပါးပြီး လူတွေ သေပွဲဝင်ခဲ့ရတယ်။ ဒါတွေကို မျိုးဆက်သစ်လူငယ်တွေကို သိစေချင်တယ်။ အထူးသဖြင့်တော့ သမိုင်းကို သိအောင်၊ မအရအောင် ခုလို မျိုး ကျင်းပပြီး လူငယ်တွေကို လက်ဆင့်ကမ်းတာ ဖြစ်ပါတယ်” ဟု ဆိုသည်။
(၄၇) နှစ် မြောက် ဆန်ပြသနာနေ့ အောက်မေ့ဖွယ် အခမ်းအနားကို ရခိုင်အမျိုးသမီး ကွန်ရက်ကလည်း သူတို့၏ ရုံးအဆောက်အဦးတွင် ပြုလုပ်ခဲ့သည်။ စစ်တွေ ဆန်ပြသနာနေ့ အရေးအခင်းတွင် ကိုယ်တိုင် ပါဝင်ခဲ့သူ အမျိုးသမီးကွန်ရက် ဥက္ကဌ ဒေါ်မညိုအေးက ထိုနေ့က မြင်ကွင်းကို ယခုလို ပြောသည်။
“ အဲဒီတုန်းက ကျမ အသက်က ၁၃ နှစ်၊ ခုနှစ်တန်းကျောင်းသူ၊ ဆန်ဈေးတွေကြီးပြီး လူတွေက  ဆန်ပြုတ် စားရတဲ့ အထိ ရောက်လာတယ်။ အဲဒီနေ့က လူတွေထောင်နဲ့ချီပြီး လမ်းပေါ် ထွက်လာကြတယ်။  ဆန်ရရှိရေးကြွေးကြော်တောင်းဆိုကြတယ်။ ဆန္ဒပြ လူအုပ်ကြီးက ကသည်းရွာဘက်ကိုရောက်လာတယ်။ သေနတ်တွေသံတွေထွက်လာတယ်။ ကျမကိုလည်း လူကြီးတွေက ကျည်ကွယ်တဲ့ နေရာကို ဆွဲခေါ်သွားတယ်။ စစ်ကားကြီးတွေပေါ်က လူအုပ်ထဲကို တည့်တည့်ပစ်တာ။ လူအုပ်ကြီးက လမ်းမပေါ်မှာ ဖရိုဖရဲဘဲ။ မနက်လင်းတော့ လူပေါင်း ၂၇၀- ၂၈၀ သေတယ်ဆိုပြီးသတင်းကြားရတယ်။ ကျမ ဒီမြင်ကွင်းကို ဒီနေ့ထိ မမေ့နိုင်သေးဘူး” ဟု ဆိုသည်။
အလားတူ အခမ်းအနားကို မြောက်ဦးမြို့ မြို့ဦးခေါင်း ကျောင်းတိုက်တွင် ပထမဆုံး အကြိမ် ကျင်းပ ပြုလုပ်ခဲ့ပြီး လူပေါင်း ၅၀ ကျော်တက်ရောက်ခဲ့သည်။
ယင်းအခမ်းအနားတွင် ကိုယ်တိုင်တွေ့ကြုံခဲ့သူ ဦးမောင်နုက ရှင်းလင်း ပြောကြားခဲ့သည်ဟု သိရသည်။
ညနေပိုင်းတွင် ရခိုင်လူမူကွန်ရက် (မြောက်ဦး) ကဦးဆောင်ပြီး ရှစ်သောင်းဘုရားတွင် ဆီးမီးများ ထွန်းညှိပူဇော်ခဲ့ကြပြီး စစ်တွေ ဆန်ပြသနာနေ့တွင် ကျဆုံးသွားခဲ့ကြသော ရဟန်းရှင်လူ ပြည်သူများအတွက် ဆုတောင်း အမျှပေးဝေမူများ ပြုလုပ်ခဲ့ကြသည်ဟု ကွန်ရက်မှ ဒုဥက္ကဌ ဖြစ်သူက န်ိရဉ္စရာသို့ ပြောကြားသည်။
စစ်တွေ ဆန်ပြသနာနေ့သည် ၁၉၆၇ ခုနှစ် သြဂုတ်လ ၁၃ ရက်နေ့တွင် ဗိုလ်ချုပ်နေ၀င်း ဦးဆောင်သော တော်လှန်ရေး ကောင်စီခေတ်တွင် ဖြစ်ပွားခဲ့ခြင်းဖြစ်သည်။
၎င်းနှစ်က မိုးရာသီအချိန်တွင် ဆန်စပါးရှားပါးပြီး ရခိုင်ပြည်သူများ အငတ်ဘေးကျရောက်သဖြင့် အစိုးရ ဂိုဒေါင်များတွင် သိုလှောင်ထားသော ဆန်စပါးများကို ထုတ်ရောင်းချပေးရန် ထောင်သောင်းချီသော လူအုပ်ကြီးက စစ်တွေမြို့ လမ်းမများပေါ်သို့ ချီတက်ကာ တောင်းဆို ဆန္ဒပြခဲ့ကြသည်။
ချီတက်လာသော လူအုပ်ကြီး စစ်တွေမြို့ နာဇီရ့က်ကွက် မြဆန်စက်အနီးသို့ အရောက်တွင် စစ်တပ်က တားဆီးပြီး မြို့တွင်းသို့ ၀င်ခွင့်ကို ပိတ်ပင်ရာမှ လူအုပ်ကြီးနှင့် ထိပ်တိုက်တွေ့ပြီး ပစ်ခတ်မူ ဖြစ်ပွားရာ ဆန္ဒပြပွဲတွင် ပါဝင်သူ အနည်းဆုံး လူပေါင်း ၂၀၀ ကျော်ခန့် သေဆုံးခဲ့သည်ဟု ဆန္ဒပြပွဲတွင် ပါဝင်သူများက ပြောသည်။
အစိုးရဘက်မှ သေဆုံးသူ ၁၄ ဦးသာရှိကြောင်း ပြောဆိုပြီး အလောင်းများကို မဏ္ဍပ်ဆောက်ကာ စစ်တွေလူထုအား ပြသခဲ့သည်။
အဆိုပါ အခင်းဖြစ်ပွားမူနှင့် ပတ်သက်ပြီး အရေးယူမူ တစ်စုံတစ်ရာ မရှိသလို လွတ်လပ်စွာ စုံစမ်းဖေါ်ထုတ်ခွင့် မရရှိခဲ့သဖြင့် ဖြစ်ပျက်ပုံနှင့် သေဆုံးသူ အရေအတွက် အတိအကျ စာရင်းကို ကောက်ယူနိုင်ခြင်း မရှိခဲ့ဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

ပလက်ဝ နယ်စပ် ကုန်သွယ်ရေးစခန်း ဖွင့်လှစ်ရန် လောလောဆယ် မဖြစ်နိုင်သေးဟုဆို

Paletaw
ချင်းပြည်နယ် ပလက်ဝမြို့နယ်တွင် အိန္ဒိယနှင့် ကုန်သွယ်မည့် နယ်စပ်ကုန်သွယ်ရေးစခန်းကို လောလောဆယ်တွင် ဖွင့်လှစ်ရန် အစီအစဉ် မရှိသေးကြောင်း ပလက်ဝ မြို့နယ် အုပ်ချုပ်ရေးမှူး ဦးဥာဏ်လင်းအောင်က ပြောသည်။
“ နေရာ ရာတားထားလောက်တာဘဲ ရှိတယ်။ ခုချိန်ထိ ဘာမှ မလုပ်ရသေးဘူး” ဟု မြို့နယ် အုပ်ချုပ်ရေးမှူးက ပြောသည်။
ယခုကဲ့သို့ ကြန့်ကြာနေခြင်းမှာ အိန္ဒိယဘက်က လိုအပ်ချက် အချို့ ရှိနေ၍ ဖြစ်ကြောင်း သူက ဆိုသည်။
“ စတာက အိန္ဒိယက စရမယ်လေ။ အခု အိန္ဒိယက ငွေ ခွင့်ပြုချက်တွေ မပေးနိုင်သေးဘူးလို့ ပြောတယ်။ ဒါကြောင့် ချက်ချင်း မဖြစ်နိုင်သေးဘူး။ သုံးလေးနှစ်တောင်ကြာနိုင်တယ်” ဟု ဆိုသည်။
ယင်းပြင် ပလက်ဝမှ အိန္ဒိယ နယ်စပ်တွင် တည်ရှိသော မြိတ်ဝရွာထိ ဖေါက်လုပ်မည့် မော်တော်ကားလမ်းမှာလည်း ယခုအချိန်ထိ မဖေါက်ရသေးကြောင်း သိရသည်။ အိန္ဒိယ နယ်စပ်နှင့် ကပ်ရပ်တည်ရှိသော ပလက်ဝမြို့နယ် မြိတ်ဝရွာတွင် အိန္ဒိယနှင့် ဆက်သွယ်မည့် ကုန်သွယ်ရေး စခန်း အမှတ် (၄) ကို ဖွင့်လှစ်ရန် ရာတားထားသည်ဟု သတင်းများတွင် ဖေါ်ပြသည်။
“ ၂၀၁၅ မှာတော့ မဖြစ်နိုင်သေးဘူးထင်တယ်။ အခု ပလက်ဝကနေ နယ်စပ်ထိ လမ်းကလည်း မဖေါက်ရသေးဘူး။ ချက်ချင်းတော့ မဖြစ်နိုင်သေးပါ” ဟု သူက ထပ်လောင်းပြောဆိုသည်။
အိန္ဒိယ အရှေ့မြောက် ပြည်နယ်များသို့ ရခိုင်ပြည်နယ် စစ်တွေဆိပ်ကမ်းကို အသုံးပြုပြီး ကုလားတန် မြစ်ကြောင်း အတိုင်း ကုန်စည်များတင်ပို့မည့် လုပ်ငန်းကိုလည်း ၂၀၁၅ ခုနှစ်တွင် စတင်ရန်  အလားအလာ မရှိသေးဟု  သူက ပြောဆိုသည်။
အဘယ်အတွက်ကြောင်းဆိုသော် ကုန်တွင်းပိုင်းဆက်သွယ်မည့် မော်တော်ကားလမ်းမှာ ၂၀၁၄ ခုနှစ် နှစ်ဝက်ကျိုးသွားပြီး ဖြစ်သော်လည်း  ဖေါက်လုပ်ရေး လုပ်ငန်း မစတင်နိုင်သေးဖြစ်ကြောင်း သိရသည်။
(သတင်းအရင်းအမြစ်- နိရဉ္စရာသတင်းဌာန)

အီဘိုလာရှိ/ မရှိ မြန်မာနိုင်ငံသားတွေ တက်ကနက်နယ်စပ်မြို့မှာ စစ်ဆေးခံရ

Myanmar-boats-in-Teknaf-jetty
မြန်မာဘက်က ၀င်လာတဲ့ ကုန်တင်ဘုတ်တွေကို တက်ကနက် ဆိပ်ကမ်းမှာ တွေ့ရစဉ် (ဓါတ်ပုံ- နိရဉ္စရာ)
ဘင်္ဂလာဒေခ်ျ့ကို ၀င်ရောက်လာတဲ့ မြန်မာနိုင်ငံသားတွေကို အီဘိုလာ ဗိုင်းရပ်စ် ရှိ / မရှိ စစ်ဆေးနေတယ်လို့ သိရပါတယ်။
မြန်မာနဲ့ နယ်စပ်ကုန်သွယ်ရာမှာ အဓိကအချက်အချာကျတဲ့ ဘင်္ဂလားဒေ့ခ်ျ နိုင်ငံက တက်ကနက်မြို့ ဆိပ်ကမ်းမှာ အခုလို  မြန်မာဘက်မှ ၀င်လာသူတွေကို အီဘိုလာ (Ebola) ဗိုင်းရပ်စ် ရှိ/ မရှိ စစ်ဆေးတယ်လို့ ဘင်္ဂလာက သတင်းတွေမှာ ဖေါ်ပြပါတယ်။
ခုလို စစ်ဆေးမှုကို သြဂတ်စ်လ ၁၂ ရက်နေ့ ညနေပိုင်းက စပြီး ဆောင်ရွက်နေတာ ဖြစ်ပြီး ဒေါက်တာ တီတူတာရှေ့် ဦးဆောင်တဲ့ အဖွဲ့ဝင် ၃ ဦးပါဝင်တဲ့ ကျန်းမာရေးအဖွဲ့ တစ်ခုကနေ စစ်ဆေးနေတာ ဖြစ်တယ်လို့ ဆိုပါတယ်။
ရာချီရှိတဲ့ မြန်မာနိုင်ငံက ခရီးသွား၊ ကုန်သည်တွေကို စစ်ဆေးခဲ့ပေမယ့် အီဘိုလာနဲ့ ဆက်စပ်တဲ့ ရောဂါ တစ်စုံတစ်ရာ မတွေ့ရဘူးလို့ ဆိုပါတယ်။
အခုလို စစ်ဆေးမှုပြုလုပ်တာဟာ မြန်မာနိုင်ငံမောင်တောမြို့မှာ ဦးနှောက် အမြှေးရောင် ရောဂါနဲ့ သေဆုံးသူ အများအပြားရှိနေတယ်လို့ သတင်းတွေ ထွက်ပေါ်နေတဲ့ အတွက် ဖြစ်တယ်လို့  http://bangla.bdnews24.com သတင်းတပုဒ်မှာ ဖေါ်ပြပါတယ်။
မြန်မာဘက်မှ ၀င်ရောက်လာသူတွေကို အီဘိုလာ စစ်ဆေး ခြင်းမပြုဘဲ သူ့နိုင်ငံထဲကို ဘင်္ဂလာအာဏာပိုင်တွေက ၀င်ရောက်ခြင်း မပြုဘူးလို့ တက်ကနက်ဒေသခံတွေက ပြောပါတယ်။
ဘင်္ဂလာဒေခ်ျ့ ကျန်းမာရေး ၀န်ကြီးဌာနမှလည်း အဆိုပါ ဗိုင်းရပ်စ်ကို စောင့်ကြည့် စစ်ဆေးတဲ့  အဖွဲ့တခုကို ပညာရှင်များနဲ့ ဖွဲ့စည်းထားပြီး တခြား ကျန်းမာရေးအဖွဲ့အစည်းတွေနဲ့ ပူးပေါင်းလုပ်ဆောင်နေတယ်လို့လည်း သိရပါတယ်။
အီဘိုလာ ဗိုင်းရပ်စ် ကူးစက်ရောဂါကြောင့်  အခုအခါ ကမ္ဘာတ၀န်းမှာ သေဆုံးသူပေါင်း ၁၀၀၀ ကျော်ရှိပြီ ဖြစ်ပါတယ်။ အခုအချိန်ထိတော့ အဆိုပါ ဗိုင်းရပ်စ်ကို ကုသနိုင်တဲ့ ဆေးဝါးမရှိသေးဘူးလို့ သိရပါတယ်။
ကမ္ဘာ့ကျန်းမာရေးအဖွဲ့ WHO ကလည်း အီဘိုလာ ဗိုင်းရပ်စ်ပိုးမှာ ကြောက်စရာကောင်းပြီး ပြန့်ပွားမှု လျှင်မြန်နေတယ် သတိပေးမူ ထုတ်ပြန်ထားပါတယ်။
မြန်မာနိုင်ငံ မောင်တောဘက်မှာတော့ ဘင်္ဂလာဒေခ်ျ့ဘက်က ၀င်လာသူတွေကို ခုလို အီဘိုလာ ရောဂါ စစ်ဆေးမူရှိတယ် ဆိုတဲ့ သတင်းတွေတို့ မကြားရသေးဘူးလို့ သိရပါတယ်။
(သတင်းအရင်းအမြစ်- နိရဉ္စရာသတင်းဌာန)

ဦးနှောက်အမြှေးရောင်ရောဂါဖြင့် စစ်တွေဆေးရုံကြီးတွင် ကိုးယောက်မြောက်ကလေး သေဆုံး

ရခိုင်မှ ကျေးလက် ဆေးပေးခန်းတစ်ခု( ဓါတ်ပုံ- နိရဉ္စရာ)
ရခိုင်မှ ကျေးလက် ဆေးပေးခန်းတစ်ခု( ဓါတ်ပုံ- နိရဉ္စရာ)
စစ်တွေဆေးရုံကြီးတွင် ဦးနှောက် အမြှေးရောင် ရောဂါဖြင့် တက်ရောက်ဆေးကုနေသူ ရသေ့တောင်မြို့နယ် ကျောက်ရန်ရွာမှ မောင်နေဇော်လင်း (၁၀) နှစ် ယမန်နေ့က သေဆုံးသွားရာ ၎င်းကလေးငယ်သည် ယင်းရောဂါဖြင့် စစ်တွေဆေးရုံကြီးတွင် သေဆုံးသော (၉) ယောက်မြောက် ကလေးငယ်ဖြစ်ကြောင်း သိရသည်။
နောက်ဆုံးသေဆုံးသွားခဲ့သော ကလေးငယ် မောင်နေဇော်လင်း (၁၀) နှစ်သည် ရသေ့တောင်မြို့နယ် ကျောက်ရန်ရွာမှ (ဘ) ဦးလှဝင်း (မိ) ဒေါ်နိုင်နိုင်စိုးတို့၏ သားဖြစ်ပြီး ဆေးရုံသို့ရောက်ပြီး သုံးရက်ခန့်အကြာတွင် သေဆုံးသွားခြင်း ဖြစ်ကြောင်း သိရသည်။
“ ကျွန်တော်သားက ဖျားတော့ စေတီပြင် တိုက်နယ်ဆေးရုံကို ပို့ပါတယ်။ ဆေးရုံ နှစ်ရက်နေခဲ့ပြီး ဦးနှောက် အမြှေးရောင် ရောဂါဖြစ်တဲ့ အတွက် စစ်တွေ ဆေးရုံကြီးကို ပို့ပါဆိုလို့ စစ်တွေဆေးရုံကြီးကို ယူလာပါတယ်။ ဒီရောက်တော့ နှစ်ရက် သုံးရက်အတွင်းမှာဘဲ ကျွန်တော်သားက ဆုံးပါးသွားပါတယ်” ဟု ဖခင်ဖြစ်သူ ဦးလှဝင်းကဆိုသည်။
ဦးနှောက်အမြှေးရောင်ရောဂါဖြင့် သေဆုံးသွားသူ မောင်နေဇော်လင်းမှာ ယခုလပိုင်းအတွင်း(၉) ယောက်မြောက် သေဆုံးသွားသော ကလေးငယ် ဖြစ်ကြောင်း စစ်တွေဆေးရုံအုပ်ကြီး ဒေါက်တာ အောင်ဆန်းကလည်း အတည်ပြုပြောကြားသည်။
“  ဖြစ်တဲ့ ကလေးငယ်က ၄၀ ကျော်ရှိပါတယ်။ အရင်က ဒီရောဂါနဲ့ သေဆုံးသွားတဲ့ကလေးက ရှစ်ဦးဆိုတော့ ဒီကလေးက ၉ ယောက်မြောက် ဖြစ်ပါတယ်” ဟု ဆိုသည်။
သို့သော်လည်း ယခုအခါ အခြေအနေတိုးတက်ကောင်းမွန်လာပြီး ရောဂါကိုလည်းထိန်းချုပ်နိုင်ပြီ ဖြစ်သည်ဟု ဒေါက်တာ အောင်ဆန်းက ဆိုသည်။
ယင်းပြင် အများစု ကလေးငယ်များမှာ သက်သာသွားပြီ ဖြစ်သဖြင့် ဆေးရုံက ဆင်းသွားကြပြီးဖြစ်သော်လည်း လက်ရှိ ဆေးရုံတွင် ကလေးငယ် ၁၂ ဦး ရှိနေသေးသည်ဟု သိရသည်။
ယင်း ဦးနှောက်အမြှေးရောင်ရောဂါကို ရခိုင်ပြည်နယ် အတွင်း ၂၀၀၇ ခုနှစ်လောက်က စတွေ့ခဲ့ရပြီး ယခင်နှစ်များက ဖြစ်ပွားသူ ကလေးငယ် အရေအတွက်မှာ ယခုနှစ်လောက် မများကြောင်း၊ ၂၀၁၃ ခုနှစ်ကဆိုလျှင် တစ်ဦးတစ်လေမှ ဖြစ်ပွားခြင်း မရှိကြောင်း ဒေါက်တာ အောင်ဆန်းက ဆိုသည်။
ဦးနှောက်အမြှေးရောင်ရောဂါသည် ၀က်၊ ကြွက်စသည့် ရောဂါ ဖြစ်ပွားနေသည့် တိရစ္ဆာန်တစ်ကောင်ကောင်အား ကိုက်ထားသည့်ခြင်မှ ကလေးငယ်များကို ထပ်ကိုက်ရာမှ ကူးစက်လာသော ရောဂါဖြစ်ကြောင်း ဒေါက်တာက ပြောဆိုသည်။
အထူးသဖြင့် ၀က်ြံခံများအတွင်း ၀က်များအိုင်လူးသော ရေများတွင် ပေါက်ဖွားသောခြင်များဖြစ်ကြောင်း၊ သို့အတွက် သွေးလွန်တုတ်ကွေးရောဂါလို ခြင်ကို အဓိကထား နှိမ်နှင်းရန်လိုကြောင်း ဒေါက်တာ အောင်ဆန်းမှ ဆက်လက် ပြောဆိုသည်။
တစ်ဘက်တွင်လည်း ဦးနှောက်အမြှေးရောင်ရောဂါဖြင့် ကလေးငယ်များ သေဆုံးသူများပြားနေသဖြင့် ဒေသခံ ပြည်သူများ အကြား စိုးရိမ်မူများ တိုးပွားနေသည်ဟု သိရသည်။

စစ်တွေဆန်ပြဿ နာနေ့ အကြောင်း တစေ့တစောင်း

လာမယ့်သြဂုတ်လ ၁၃ ရက်နေ့ဆိုရင် ရခိုင်ပြည်နယ် စစ်တွေမြို့မှာ ဆန်ရရှိဖို့အတွက် အစိုးရကို ဆန္ဒပြ တောင်းဆိုတဲ့အတွက် စစ်တပ်ကပစ်ခတ်လို့ လူရာနဲ့ချီ သေဆုံးခဲ့ရတဲ့ (၄၇) နှစ်ပြည့်တဲ့ နေ့ ဖြစ် ပါတယ်။  အဲဒီနေ့က စစ်တွေမြို့မှာ ဘာတွေဖြစ်ခဲ့သလဲ ဆိုတာကို သိရအောင် ဆန္ဒပြပွဲမှာ ကိုယ်တိုင်ပါဝင်ခဲ့ပြီး အခုလက်ရှိ ဘင်္ဂလာဒေ့ခ်ျနိုင်ငံ ကော့စ်ဘာဇားမြို့မှာ နေထိုင်လျှက်ရှိတဲ့ ဦးမောင်အေးချမ်းကို မေးကြည့် တဲ့အခါ သူကအခုလို စပြောပါတယ်။
Mg-Aye-Sai-(ချမ်း) ၁၉၆၇ သြဂုတ်လ ၁၂ ရက်နေ့ကတည်းက စပါတယ်။ စစ်တွေမြို့မှာ ဆန်သိပ် ရှားပါးလာတဲ့အတွက် အစိုးရဆီက ဆန်ထုတ်ပေးဖို့တောင်းဆိုပေမဲ့ အစိုးရက လုံလုံလောက်လောက် ထုတ်မပေးဘူး။ စစ်တွေမြို့ မြူ နီစပါယ်ရုံးမှာ ဌာနပေါင်းစုံအစည်းအဝေး လုပ်တဲ့အခါ ဆန်ကို ပြုတ်ဆန် ပေးရင်ရတယ်။ တနေ့ကို တစ်ဗူးပေးရင်ရတယ်။ မနက်ဗူးခွဲ ညဗူးခွဲပေးရင် ရတယ်လို့ လူကြီးတွေက တင်ပြကြတယ်။ အဲဒီသတင်းလူထုဆီကို ပေါက်ကြားလာတဲ့အခါ လူတွေ မခံမရပ်နိုင် ဖြစ်လာတယ်။ ဒီလောက်ဆန်ပေါများနေရက်သားနဲ့ ဘာကြောင့်ငါတို့ ဆန်ကို လုံလုံလောက်လောက် မရတာလည်းဆိုပြီး ပေါက်ကွဲ လာကြတယ်။ သြဂုတ်လ ၁၂ ရက်နေ့မှာ နိုင်ငံခြားကို ဆန်တင်ပို့နေတဲ့ အုန်းတပင်ရွာ နောက်  ဆတ်ရိုးကျ ချောင်းဘေးက ဆန်ဂိုဒေါင်ကို  လူအုပ်တစ်ခုက သွားပြီးလုကြတယ်။ အဲဒီဂိတ်မှာ ရဲသား ၄ယောက်ရှိ တယ်။ သူတို့ကလည်း လူထု အုံကြွမှုများလာတဲ့ အတွက် တားဆီးမှုမရှိခဲ့ဘူး။ ယူကြဆိုပြီး လက်ပြ အားပေးနေတာကို တွေ့ရ ပါတယ်။ အဲဒီအချိန်မှာ နိုင်ငံခြား သင်္ဘောတွေကို ဆန်သွားပို့တဲ့ တုံကင်း လှေပေါ်မှာ ဆန်တွေ တင်နေတဲ့ အတွက် အလွယ်တကူရနိုင်တယ်ဆိုပြီး လူကြီး၊လူငယ် မိန်းမတွေပါ မကျန်သွားပြီး လုကြတယ်။ ယူကြတယ်။
တချို့ ဆန်အိပ်တွေနဲ့ရေထဲကို ကျသွားတာကိုလည်း မြင်ခဲ့ရပါတယ်။ အဲဒီလိုဆန်ကိုယူလို့ပြီးရင် ညနေပိုင်းမှာ လူငယ်တချို့က လမ်းမတော်မှာ အစည်းအဝေးတခုလုပ်တာကို ကျွန်တော်ကိုယ်တိုင် တွေ့ခဲ့ရ ပါတယ်။ အဲဒီမှာ မောင်အေးသိန်းဆိုသူတစ်ယောက်က ခေါင်းဆောင်ပါတယ်။ သူတို့က ဘာပြောလည်းဆိုရင် ဒီလောက်ရခိုင်ပြည်မှာ ဆန်ပေါပါလျှက် ဆန်တစ်ဗူးဆိုရင် စားရတယ်လို့ တင်ပြ တဲ့ လူကြီးတွေကို ဒေါသထွက်ပြီး အဲဒီနေ့ညနေက တင်ပြခဲ့သြူ ဖစ်တဲ့ စစ်တွေမြို့ ညဈေးရပ်ကွက်၊ (မြ) ရုပ်ရှင်ရုံး အနီးက ဦးမောင်ဦးကျော်အိမ်သွားပြီး ခဲ့နဲ့ ပေါက်ကြပါတယ်။ အဲဒီအချိန်မှာ လူပေါင်း ၁၀၀ ခန့််ရှိပါတယ်။
အဲဒီအိမ်နောက်က ရူပရွာလမ်းဆုံကို ကြွေးကြော်သံတွေနဲ့ ကြွေးကြော်ပြီး ထွက်ကြတဲ့အခါ ဗိုလ်ချုပ်စောဖြူဦး ဆောင်တဲ့ စစ်ကား ၃ စီးခန့်ကိုတွေ့ပါတယ်။ အဲဒီမှာ ဗိုလ်ချုပ်စောဖြူက ဆန်ပြဿနာကို ရှင်းပေးမယ်။ ဒီကိစ္စကို ငါတာဝန်ယူတယ်။ ဖြေရှင်း ပေးမယ်။ မင်းတို့လူစုခွဲပြီး အိမ်ပြန်ကြလို့ပြောတယ်။ အဲဒီကနေ ကျွန်တော်တို့လူစုခွဲပြီးအပြန် လမ်းမှာ လူငယ်တွေ  ပြောကြတာက မနက်ဖန်ဆန္ဒပြမယ်။ ပြည်လုံးချမ်းသာ ဘုရားကြီးမှာ လူစုမယ်လို့ပြောပြီး သတ်မှတ် ထားခဲ့ကြတယ်။
နောက်တနေ့ မနက်ပိုင်း သြဂုတ်လ ၁၃ ရက်နေ့မှာ ကျွန်တော်တို့ ဘုရာကြီးကိုသွားတယ်။ အဲဒီမှာ လူငယ် ၃၀ ခန့်စုမိတယ်။ လူငယ်တချို့မှာ ဆိုင်းဘုတ်တခုပါလာတယ်။ အဲဒီဆိုင်းဘုတ်မှာ ဘာရေးထားလဲ ဆိုရင် (ဆန်ပြဿ နာဖြေရှင်းပေး၊ အရေးတော်ပုံအောင်ရမည်။) ဆိုပြီး ရေးထားပါတယ်။ အဲဒီကနေ ကျွန်တော်တို့ စီ တန်းပြီး ဆန္ဒပြဖို့ ထွက်ကြတယ်။ ပထမ ထွက်တဲ့အခါ လူကအနည်းပါတယ်။ အားလုံး ၃၀ ခန့်ရှိ တယ်။ အဲဒီနေ့က လပြည့်နေ့ ဖြစ်တဲ့ အတွက် ဥပုသ်သည်တွေလည်း သီးတင်းသုံးနေရာက ပူးပေါင်း လာကြပါတယ်။ လူငယ်တွေက ပါလာတဲ့ ပိုစတာကို ၀ါးနဲ့ချည်ပြီး လေထဲကို မြင့်တင်လိုက်ကြတယ်။ အဲဒီ ပိုစတာမှာ (ဆန်ပြသနာဖြေရှင်းပေး- အရေး တော်ပုံ အောင်ရမည်။ နေ၀င်းအစိုးရအလိုမရှိ။) ဆိုပြီး ကြွေးကြော်သံတွေနဲ့ ဒိုးဝန်းရွာဘက်က ပတ်ပြီး လမ်းတွေပေါ် ထွက်ခဲ့ကြပါတယ်။
အဲဒီကနေ မင်းဗာကြီးလမ်း၊ ကျေးပင်တန်းဘက်ကိုရောက်တဲ့အခါ နောက်ကို လှည့်ကြည့်ရင် လူအုပ် ဘယ်လောက် ရှည်သလဲဆိုတာ ခန့်မှန်းလို့မရတော့ဘူး။ လမ်းတလျှောက်လုံး လူတွေ အပြည့်ဘဲ။ အဲဒီလိုနဲ့ လှခိုင်ဆရာတော် ကျောင်းရှေ့ ကနေ ထောင်ရှေ့က ဖြတ်လို့ သွားကြပါတယ်။ လူငယ်တွေက ဆရာကြီး အေးကျော် လွတ်ပေးဆိုပြီး ထောင်ရှေ့မှာ  တောင်းဆိုတာတွေလည်း ကြားခဲ့ရပါတယ်။
အဲဒီကနေ ပလုတ်တောင် ရပ်ကွက်ကို ရောက်တဲ့အခါ လူတွေက ရေခွက်တွေ၊ ရေးအိုးတွေနဲ့ စောင့်နေကြပါ တယ်။ သူတို့က ဆန္ဒပြတဲ့သူတွေကို ရေလှူကြတာပါ။
အဲဒီလို ပြည်သူတွေပူးပေါင်းပါဝင်မှုနဲ့ မီးစက်လမ်းဆုံကနေ နာဇီရွာလမ်းကို ဆင်းပါတယ်။ နာဇီရွာကို အရောက်မှာ ကသဲရွာလမ်းဆုံ (မြ) ဆန်စက်ရှေ့မှာ သံဆူးကြိုးတွေကာပြီး စစ်ကားတွေနဲ့ စစ်တပ်က စောင့်နေတာကို တွေ့ရပါတယ်။
အဲဒီမှာ စစ်တပ်ကပြောတာက ခင်ဗျာတို့ကိုမြို့ထဲ အ၀င်မပေးတော့ဘူး။ ဒီမှာ ပုဒ်မ ၁၄၄ ထုတ် ထားတယ်လို့ပြောတယ်။ အဲဒီမှာ စစ်တပ်နဲ့ လူထုအခြေအတင် စကားများကြပါတယ်။ လူတွေ ကလည်း အတင်းထိုးဖောက်ပြီး ၀င်ဖို့ ကြိုးစားတဲ့ အခါ စစ်တပ်က သေနတ်နဲ့စပြီး ပစ်ပါ တော့တယ်။
အဲဒီမှာ သေတဲ့သူသေ၊ အနာရသူတွေတချို့လည်းရှိတယ်။ တချို့လည်း ဆတ်ရိုးကျချောင်းကို ခုန်ချ သွားကြတာကို တွေ့ရတယ်။ ချောင်းထဲမှာ ရေကူးနေတဲ့သူတွေကိုလည်း သေနတ်နဲ့ လှမ်းပစ် တာ တွေကိုလည်း တွေ့ခဲ့ရတယ်။
ဒဏ်ရာရသူတချို့ကို ကျွန်တော်တို့ဆေးရုံကိုပို့ခဲ့ပါသေးတယ်။ အဲဒီနောက် နောက်တနေ့ စစ်တွေမြို့ ကြေးနန်းရုံးရှေ့မှာ မဏ္ဍာပ်ထိုးပြီး အလောင်းတွေကို ပြထားတယ်။ သေတဲ့ အထဲမှာ ကျွန်တော်တို့နဲ့ ဆန္ဒအတူပြခဲ့တဲ့ ကျွန်တော်တို့မိတ်ဆွေ ကုလားချေ ဆိုသူတစ်ယောက်လည်းပါတယ်။ နောက် မခင်လှဆိုတဲ့ လမ်းသစ် လမ်းဆုံက အမျိုးသမီးလည်း ပါတယ်။ မခင်လှမှာတော့ ဆီးစမှာကျဉ်ထိပြီး သေသွားတာကိုလည်း တွေ့ခဲ့ ရပါတယ်။ အလောင်းက ၁၄ လောင်းပြထားတယ်။ အဲဒီအချိန်မှာ ကုလားချေ ဖခင်ဖြစ်သူ ရဲအ ရာရှိက သားအတွက် သေတမ်းစာဖတ်ရာမှာ “ ငါ့သားမင်းဟာ ရခိုင်ပြည်သူတွေ ၀မ်းဝဖို့၊ ရခိုင်ပြည် သူတွေအတွက် ဆန္ဒပြပြီး သေဆုံးသွားရတယ်။ မင်းအတွက် ငါဂုဏ်ယူတယ်။ ငါ့သား မင်း ကောင်းရာ သုဂတိ ရောက်ပါစေ”  လို့ သေတမ်းစာဖတ်တာကိုလည်း ၀မ်းနည်းစွာနဲ့ တွေ့ခဲ့ရပါတယ်။
အဲဒီ အလောင်းတွေကို သဂြိုလ်ဖို့ ကိုယ်ခံပညာအဖွဲ့ပေါင်းက တောင်းခဲ့တယ်။ စစ်တပ်က မပေးဘူး။ စစ်တပ်ကဘဲ ဦးဆောင်ပြီး သဂြိုလ်လိုက်ပါတယ်။ စစ်တွေမှာအားလုံး လူပေါင်း ၃၀၀ နီးပါး သေတယ် လို့ကြားရပါတယ်။ ထရပ်ကားတွေမှာ မသေသေးတဲ့သူတွေနဲ့ သေသူတွေကို ရောပြီးတင် ယူသွား တယ်။ ပြီးတော့ စစ်တွေမြို့ ပင်လယ်နားက အုန်းတောကြီးမှာ ကျင်းကြီးတွေတူး၊ ဓါတ်ဆီလောင်းပြီး မီးရှို့ အလောင်းတွေကို ဖျောက်ပစ်တယ်လို့လည်း နောက်မှ ကြားခဲ့ရပါတယ်။
(အခုလို ဆန်ပြဿနာနေ့မှာ သေဆုံးသွားရသူတွေအတွက် ဘယ်သူ့မှာ တာဝန်ရှိတယ်လို့ ထင်ပါသလဲ)
-(ချမ်း) ဗိုလ်ချုပ်နေ၀င်းက စစ်အုပ်ချုပ်ရေးနဲ့ အုပ်ချုပ်ပြီး ရခိုင်ပြည်က ထွက်သမျှ ဆန်၊ စပါးတွေကို နိုင်ငံခြားကိုရောင်းပြီး သူတို့အာဏာတည်မြဲဖို့အတွက်၊ တိုင်းရင်းသားလက်နက်ကိုင်အဖွဲ့တွေကို တိုက်ခိုက်ရာမှာ အသုံးပြုဖို့ လက်နက်ဝယ်ယူရေးကို အဓိက လုပ်နေတဲ့အတွက် ဒီလိုအဖြစ်မျိုး ပေါ်ပေါက်လာရတာဖြစ်တယ်။ ဒါကြောင့် ဗိုလ်ချုပ်နေ၀င်း ဦးဆောင်တဲ့အစိုးမှာ အဓိက တာ ၀န်ရှိပါတယ်။
(အခု အချိန်မှာလည်း ရခိုင်ပြည်သူတွေ ဆင်းရဲမွဲတည်မူ အပါအ၀င် ဘက်ပေါင်းစုံ အကျပ်အတည်းနဲ့ ရင်ဆိုင်နေကြရတယ်။ ဒါကြောင့် ဒီလိုအဖြစ်မျိုး နောက်ထပ်ဖြစ်ပေါ်လာနိုင်တယ်လို့ ထင်ပါလား)
-(ချမ်း) အခု အရပ်သားအစိုးရဆိုပြီး ကျေညာထားသလို တိုင်းပြည်အခြေအနေကို ပြောင်းလဲတိုးတက်နေတယ်လို့  သူတို့ ပြောနေတာတွေကို ကြားရပါတယ်။ ဒါပေမဲ့ ရခိုင်ပြည်နယ်ရဲ့ စီးပွါးရေးက ဘာမှမတိုးတက်လာသလို စက်ရုံ အလုပ်ရုံတွေဆိုတာလည်း မရှိဘဲ ဖြစ်နေတယ်။ ဒီစီးပွားရေး ဖွံ့ဖြိုးတိုးတက်မူကို ဦးစားပေးမလုပ်ရင် ရှေ့ဆက်ပြီး ဆန်ပြသနာ မဟုတ်ရင်တောင် တခြားအလုပ်လက်မဲ့ ပြသနာ၊ ဆင်းရဲမွဲမှုပြဿနာ အကျပ်အတည်းတွေနဲ့ ရင်ဆိုင် ရလိမ့်မယ်လို့ ထင်ပါတယ်။
( ဒီလို အဖြစ်ဆိုးမျိုး ရခိုင်ပြည်နယ်မှာ ထပ်ပြီးမဖြစ်လာရအောင် အာဏာပိုင်တွေဘက်က ဘာတွေလုပ် သင့်ပါလဲ)

-(ချမ်း) အရင် စစ်အစိုးရလက်ထက်က ဆန်စပါး ပေါများတဲ့ရခိုင်ပြည်မှာ ဒီလို ဆန်ပြဿ နာ ဖြစ်ခဲ့တာကို အာဏာပိုင်တွေ သင်ခန်းစာယူပြီး မိမိတို့အစိုးရလက်ထက်မှာ နောက်ထပ်မဖြစ်ရ အောင် ရခိုင်ပြည်နယ် တိုးတက်ရေး၊ ရခိုင်ပြည်နယ် လုံခြုံရေးတွေကို အာရုံစိုက်ပြီး လုပ်သင့်တယ်လို့ ကျွန်တော့်အနေနဲ့ တိုက်တွန်းလိုပါတယ်။
( ဖြစ်ပေါ်ခဲတဲ့ ဆန္ဒပြဿ     နာနေ့ကို ရခိုင်အမျိုးသားတွေအနေနဲ့ ဘယ်လို သင်ခန်းစာယူသင့်ပါသလဲ။)
-(ချမ်း) ၁၉၆၇ ခုနှစ် သြဂတ်လ ၁၃ ရက်နေ့မှာ ဆန်ပြသနာမျိုး နောက်ထပ်မဖြစ်ရအောင် ရခိုင်တွေအနေနဲ့ မျက်လုံးဖွင့် နားစွင့်ပြီး ကျွန်တော်တို့ရခိုင်တွေ ရသင့်ရထိုက် တာတွေကို တရား သောနည်းနဲ့ အာရုံစိုက်ပြီး အမှန်တရားဘက်က ရဲရဲရင့်ရင့် တိုက်ပွဲဝင်ကြပါလို့ ကျွန်တော့်အနေနဲ့ ပြောလိုပါတယ်။

စစ်တွေဆန်ပြဿ နာနေ့ အောက်မေ့ဖွယ် အခမ်းအနား ရခိုင်အမျိုးသမီးကွန်ရက်မှ ပြုလုပ်မည်

Sittwe watch towerလာမည့် သြဂုတ်လ ၁၃ ရက်နေ့တွင် (၄၇) နှစ် ပြည့်မြောက်မည်ဖြစ်သော စစ်တွေ ဆန်ပြဿနာနေ့ အထိမ်းအမှတ် အခမ်းအနားကို ရခိုင်အမျိုးသမီး ကွန်ရက်မှ စစ်တွေမြို့တွင် ပြုလုပ်သွားမည်ဟု သတင်း ရရှိသည်။
ယခု ဖွင့်လှစ်ထားသော ရခိုင်အမျိုးသမီးများ ကွန်ရက်ရုံးခန်းမှာ စစ်တွေ ဆန်ပြဿ    နာ ဖြစ်ပွား၍ လူဒါဇင်နှင့် ချီပြီးသေဆုံးခဲ့ရသော နေရာအနီးတွင် တည်ရှိသဖြင့် ၎င်းရုံးခန်းအတွင်းတွင်ပင် လာမည့် (၄၇) နှစ်မြောက် ဆန်ပြဿ     နာနေ့ အခမ်းအနားကို ကျင်းပပြုလုပ်သွားမည်ဟု ရခိုင်အမျိုးသမီးများ ကွန်ရက် ဥက္ကဌ ဒေါ်ညိုအေးက နိရဉ္စရာသို့ ပြောသည်။
“ ကျွန်မတို့ ရုံးခန်းမှာဘဲ သံဃာတော် (၅)ပါးကို ပင့်ဖိတ်ပြီး ဆွမ်းကပ် အမျှဝေခြင်းများပြုလုပ်ပါမယ်။ ဟောပြောပွဲလည်း လုပ်သွားပါမယ်။ လူပေါင်း ၅၀ ခန့်  ဖိတ်ကြားထားပါတယ်” ဟု သူမက ပြောသည်။
ယခင်က စစ်တွေဆန်ပြဿ     နာ ဖြစ်ပွားခဲ့ရာ အနီးတ၀ိုက်တွင် ဧရာမ ဆန်စက်ကြီးများ တည်ရှိသော်လည်း ယခုအခါ ဆန်စက် တစ်လုံးမှ မရှိတော့ကြောင်း၊ စစ်တွေမြို့တွင် ဆန်စက်များ မရှိတော့သော်လည်း ဆန်ပြဿ  နာနေ့ကို ယခုလို နေ့ရက်ရောက်တိုင်း လူအများက သတိရနေကြောင်း ဒေါ်ညိုအေးက ပြောဆိုသည်။
“ခုတော့ အဲဒီ ဆန်စက်တွေ မရှိတော့ဘူး။ ဒါပေမယ့် ဒီအဖြစ်အပျက်ကို စစ်တွေမြို့မှာ လူတိုင်းက သတိရကြတုန်းပါ။ ဒီအတွက်လည်း အဲ့ဒီနားမှာဘဲ နှစ်တိုင်း ဆွမ်းလောင်းလာတာ ၊ခုဆိုရင် ကျွန်မ မှတ်မိတဲ့ အရွယ်လောက်ကဆိုရင် နှစ်ပေါင်း (၂၈) နှစ်လောက်ရှိပြီပေါ့ ” ဟု ဒေါ်ညိုအေးက ပြောသည်။
ဗိုလ်ချုပ်နေ၀င်း ဦးဆောင်သော တော်လှန်ရေးကောင်စီ အစိုးရ လက်ထက် ၁၉၆၇ ခုနှစ် သြဂုတ်လ ၁၃ ရက်နေ့တွင် ဆန်ပြဿ     နာနေ့သည် စစ်တွေမြို့ ဖြစ်ပွားခဲ့ပြီး ဆန်ရရှိရေး ဆန္ဒပြတောင်းဆိုသော လူအုပ်ကို စစ်တပ်က ပစ်ခတ်သဖြင့် လူပေါင်း ရာနှင့်ချီပြီး သေဆုံးခဲ့ရသည်။
ယင်းဆန်ပြသနာနေ့သည် မြန်မာနိုင်ငံကဆန်များကို ပြည်ပသို့ များစွာ တင်ပို့ခဲ့ရာမှ ပြည်တွင်းတွင် ဆန်ဈေး မြင့်တက်ပြီး စားနပ်ရိက္ခာ မလုံလောက်မှုများ ဖြစ်ပေါ်လာခဲ့ခြင်း ဖြစ်ကြောင်း၊ စစ်တွေမြို့ရှိ ပြည်သူများက ဆန်ရှားပါးမှုပြဿ     နာကို ဖြေရှင်းပေးရန် ဆန္ဒပြ တောင်းဆိုကြစဉ် စစ်တပ်က ပစ်ခတ်နှိမ်နင်းခဲ့သဖြင့် လူပေါင်း (၃၀၀) ကျော် သေဆုံးခဲ့ရကြောင်း ဒေါ်ညိုအေးက ပြောကြားသည်။
ထိုအချိန်က ဆန္ဒထုတ်ဖော်ရာတွင် ကိုယ်တိုင်ပါဝင်ခဲ့သူ ရခိုင်အမျိုးသမီးများကွန်ရက် ဥက္ကဌ ဒေါ်ညိုအေးက အရေးအခင်းနှင့် ပတ်သက်ပြီး သူမ မြင်တွေ့ခဲ့ရပုံများကို ယခုလို ပြောပြသည်။
“ ကျွန်မကိုယ်တိုင် ကြုံလိုက်ရတာ။ အဲ့ဒီတုန်းက ကျွန်မ ခုနှစ်တန်းပဲ ရှိတယ်။ မီးပွင့်လာပြီး ဒိုင်း ဆိုတဲ့ အသံတစ်သံကြားလိုက်ရတယ်။ လူတွေ ဖရိုဖရဲ ဖြစ်သွားကြတယ်။ ပြီးတော့ ဆက်တိုက် မရပ်မနား ပစ်တာကို မြင်ခဲ့ရတယ်။ ပြေးရင်း လွှားရင်းနဲ့ လူတွေ လဲကျနေတာ မြင်ခဲ့ရတယ်။ သွေးအိုင်တွေ ထဲမှာ၊ ကျွန်မကတော့ လူကြီးတစ်ယောက်က ဆွဲခေါ်ခဲ့တဲ့အတွက် မသေမပျောက်ပဲ လွတ်တာ” ဟု ၎င်းက ပြောသည်။
သူမအနေဖြင့် အဆိုပါနေ့ကို ဘယ်လိုနည်းနှင့် မှ မမေ့နိုင်ကြောင်း ယခုလိုဆိုသည်။
“မမေ့ဘူး ၊ အဲ့ဒီ မြင်ကွင်းကို ကျွန်မ တစ်သက်လုံး မမေ့ဘူး” ဟု သူမက ဆက်ဆိုသည်။
သြဂုတ် ၁၃ ကျရောက်တိုင်း ဆန်ပြဿ     နာ အရေးအခင်း နှစ်ပတ်လည်နေ့ အဖြစ် ရခိုင်လူမျိုးများက ဝမ်းနည်းခြင်း အထိမ်းအမှတ်ပွဲများကို နှစ်စဉ် ပြုလုပ် ကျင်းပကြသည်။
(သတင်းအရင်းအမြစ်- နိရဉ္စရာသတင်းဌာန)

ကျန်းမာရေးဝန်ကြီးဌာန အီဘိုလာဗိုင်းရပ်စ်ရောဂါ သတိပေးနှိုးဆော်ချက်

ebola-virus
အီဘိုလာဗိုင်းရပ်စပ်ရောဂါသည် ကူးစက်မြန်ရောဂါတစ်မျိုးဖြစ်ပြီး ကုသရန်ခက်ခဲသည့်အပြင် ရောဂါ ပြန့်ပွားမှုအား ထိန်းချုပ်ရန် အလွန်ခက်ခဲသောရောဂါ ဖြစ်သည်။
ယခုအခါ အာဖရိကအနောက်ပိုင်းဒေသရှိ Guinea, Liberia, Nigeria& Sierra Leone နိုင်ငံတို့တွင် ရောဂါကူးစက်ဖြစ်ပွားနေပြီး ၂၀၁၄ ခုနှစ် မတ်လမှ ၁-၈-၂၀၁၄ ရက်အထိ အီဘိုလာ ဗိုင်းရပ်စ် ရောဂါဖြစ်ပွားသူ ၁၆၀၃ ဦးနှင့် သေဆုံးသူ ၈၈၇ ဦးတို့ရှိခဲ့ပါသည်။
အီဘိုလာဗိုင်းရပ်စ်ရောဂါကူးစက်နိုင်သောနည်းများ
-အီဘိုလာဗိုင်းရပ်စ်ရောဂါသည် ရောဂါပိုးရှိသောလူ (သို့မဟုတ်) တိရစ္ဆာန် တံတွေး၊ သွေး၊ ခန္ဒာကိုယ်မှ ထွက်သောအရည်တို့နှင့် တိုက်ရိုက်ကိုင်တွယ်ထိတွေ့ခြင်း
- အဆိုပါ သွေးနှင့် ခန္ဓာကိုယ်မှ အရည်များ ထိတွေ့ထားသော အရာဝတ္တုများနှင့် ထိတွေ့ ကိုင်တွယ်ခြင်းတို့မှ ကူးစက်နိုင်သည်။
ဆားစ်၊ လူတုပ်ကွေးရောဂါ၊ H7 N9 ကြက်ငှက်တုပ်ကွေးရောဂါ၊ မားစ်ပြင်းထန်အဆုပ်ရောဂါ (MERS CoV) တို့ကဲ့သို့ လေထဲမှတစ်ဆင့် ကုးစက်နိုင်သောရောဂါမဟုတ်ပါ။
-အိုဘီလာရောဂါသည် လေ၊ ရေအစားအစာတို့မှတစ်ဆင့် မကူးစက်နိုင်ပါ။
-ယခုအချိန်ထိအီဘိုလာဗိုင်းရပ်စပ်ရောဂါကိုကာကွယ်ကုသရန် ဆေးမရှိသေးပါ။ ရောဂါမဖြစ်ပွားရန် ကာကွယ်ရန် အရေးကြီးပါသည်။
-ရောဂါပိုးရှိသောလူနာနှင့်တိရစ္ဆာန်တို့၏ တံတွေး၊ သွေးစသော ခန္ဓာကိုယ် အရည်များအား ကိုင်တွယ်ထိတွေ့သူများတွင် အဓိကရောဂါကူးစက်နိုင်ခြေရှိသဖြင့် ကာကွယ်သည့် နည်းလမ်းများကို တိကျစွာလိုက်နာဆောင်ရွက်ရန်လိုပါသည်။
အီဘိုလာဗိုင်းရပ်စ်ရောဂါသံသယလက္ခဏာများ
အီဘိုလာ ဗိုင်းရပ်စ်ရောဂါ ကူးစက်ဖြစ်ပွားနေသောနိုင်ငံများ အထူးသဖြင့် ( အနောက် အာဖရိက နိုင်ငံများ ) သို့ သွားရောက်ခဲ့သူများ (သို့မဟုတ်) နိုင်ငံတကာခရီးသွားသူများ၊ ကူးစက်မြန် အီဘိုလာ ရောဂါလူနာအားတိုက်ရိုက်ပြုစုကုသထိတွေ့ကိုင်တွယ်ခဲ့သူများ၊ ရောဂါရှိသော တောရိုင်း တိရစ္ဆာန် များအား ထိတွေ့ကိုင်တွယ်ခဲ့သူများတွင်
-ဖျားခြင်း၊ အားအင်ချည့်နဲ့ခြင်း၊ ကြွက်သားများနာကျင်ကိုက်ခဲခြင်း၊ ခေါင်းကိုက်ခြင်း၊ လည်ချောင်းနာခြင်း၊ အန်ခြင်း၊ အရည်ဝမ်းသွားခြင်း၊
-အီဘိုလာဗိုင်းရပ်စ်ပိုးသည် အသည်းနှင့် ကျောက်ကပ်များပျက်စီးနိုင်သဖြင့် ခန္ဓာကိုယ်အတွင်းနှင့်အပြင် သွေးယိုထွက်မှုရှိခြင်းကြောင့် အသက်အန္တရာယ်ဖြစ်စေနိုင်ပါသည်။
အီဘိုလာရောဂါကူးစက်မှုမရှိစေရေးကာကွယ်ရန်နည်းလမ်းများ
၁။  တစ်ကိုယ်ရေသန့်ရှင်းရေးကိုအထူးဂရုပြုပါ။
၂။  လက်ကိုရေနှင့်ဆပ်ပြာဖြင့် မကြာခဏဆေးကြောပါ။
၃။  ရောဂါပိုးရှိသူ၏ သွေးနှင့် ၄င်းခန္ဓာကိုယ်မှထွက်သောအရည်များအားထိတွေ့ကိုင်တွယ်ခြင်းမပြုရ။
၎။  ရောဂါပိုးရှိသောလူ၊ တိရစ္ဆာန်တို့၏ သွေးနှင့် ၄င်းခန္ဓာကိုယ်မှ ထွက်သော အရည်များရှိနိုင်သည့်
(အရာ ၀တ္တု ပစ္စည်း၊ ခုံများ၊ စားပွဲများ၊ အိပ်ရာ၊ လှေကားလက်ရန်း၊ နံရံစသည်တို့အား )ထိတွေ့ ကိုင်တွယ်ခြင်း မပြုရ။
၅။  အထူးသဖြင့် အီဘိုလာဗိုင်းရပ်စ်ရောဂါ ကူးစက်ဖြစ်ပွားသောနိုင်ငံများသို့ သွားရောက်ခဲ့သူများနှင့် နိုင်ငံတကာခရီးသွားသူများတွင်အောက်ဖော်ပြပါ သံသယလက္ခဏာများပေါ်လာပါကကျန်းမာရေးဌာနသို့ ချက်ချင်းသတင်းပို့ဆေးကုသမှုခံယူပါ။ ဖျားခြင်း၊ ခေါင်းကိုက်ခြင်း၊ကိုယ်လက်ကိုက်ခဲခြင်း၊ နုံးချည့်ခြင်း၊ လည်ချောင်းနာခြင်း၊ အရည်ဝမ်းသွားခြင်း၊ အန်ခြင်း၊ ခန္ဓာကိုယ်အတွင်းနှင့်အပြင် သွေးယိုထွက်မှုရှိခြင်း။
 ၆။  အထက်ပါ သံသယလက္ခဏာဖြစ်ပွားသူများတွေ့ရှိပါကနီးစပ်ရာကျန်းမာရေးဌာနသို့ ချက်ချင်း သတင်းပို့ပါ။
၇။  နိုင်ငံခြားသို့ ခရီးသွားရောက်ရန် အစီအစဉ်ရှိပါကရောဂါဖြစ်ပွားကူးစက်နေသည့်နိုင်ငံများသို့ သွားရောက်ခြင်းကိုရှောင်ကြည်ပါ။
ကျန်းမာရေးဝန်ကြီးဌာနမှ အီဘိုလာရောဂါကြိုတင်ကာကွယ် ကုသ ထိန်းချုပ်ရေး လုပ်ငန်းများကို စနစ်တကျ ဆောင်ရွက်လျှက်ရှိသည့်အတွက် ကျန်းမာရေးဝန်ကြီးဌာန၏ သတိပေးနှိုးဆော်ချက်များကို တိကျစွာ လိုက်နာဆောင်ရွက်ပါ။
ကျန်းမာရေးဝန်ကြီးဌာန

သံတွဲတွင်ကျင်းပသည့် နိုင်ငံတော်ဘာသာနေ့ အထိမ်းအမှတ် အခမ်းအနားသို့ လူငါးသောင်းကျော် ပါဝင်ဆင်နွှဲ

သံတွဲမြို့တွင် သြဂုတ်လ ၁၀ ရက်နေ့က ကျင်းပခဲ့သော နိုင်ငံတော် ဘာသာနေ့ အခမ်းအနား (ဓါတ်ပုံ- နိရဉ္စရာ/ နေဇော်)
သံတွဲမြို့တွင် သြဂုတ်လ ၁၀ ရက်နေ့က ကျင်းပခဲ့သော နိုင်ငံတော် ဘာသာနေ့ အခမ်းအနား (ဓါတ်ပုံ- နိရဉ္စရာ/ နေဇော်)
(၅၃) နှစ်မြောက် နိုင်ငံတော် ဘာသာနေ့ အထိမ်းအမှတ် အခမ်းအနားကို သံတွဲမြို့တွင် ယနေ့တွင် ကျင်းပခဲ့ရာ ဒေသခံ ပြည်သူ ငါးသောင်းကျော် ပါဝင် ဆင်နွှဲခဲ့သည်ဟု သတင်း ရရှိသည်။
ယင်းအထိမ်းအမှတ်နေ့သို့ သံဃာတော်ပေါင်း (၅၃၀) ပါး ကြွရောက်ခဲ့ပြီး လူပေါင်း ငါးသောင်းကျော် ပူးပေါင်းပါဝင်ခဲ့သည်ဟု သံတွဲမြို့ ပုလဲရတနာ ပရိယတ္တိစာသင်တိုက်ဆရာတော် ဦးဣန္ဒာစာရနှင့် မျက်မြင်များက နိရဉ္စရာသို့ ပြောသည်။
နိုင်ငံတော်ဘာသာနေ့ အထိမ်းအမှတ်အခမ်းအနားကို ဖေါ်ထုတ်ကျင်းပရခြင်း ရည်ရွယ်ချက်ကို ပုလဲရတနာ ဆရာတော်က ယခုလို မိန့်ကြားသည်။
“လိုအပ်မှုဆိုတဲ့ အချိန်တစ်ခုကို ရောက်လာပြီ။ အခုအချိန်မှာတော့ ဗုဒ္ဓဘာသာတွေက ဗုဒ္ဓဘာသာနေ့ကို သိထားမှ ဖြစ်တော့မယ်။ ဒါက နိုင်ငံတော်က တိတိကျကျ ခွင့်ပြုခဲ့တဲ့ ဗုဒ္ဓဘာသာနေ့ ဖြစ်တယ်။ ဒီလိုမှ မဆောင်ရွက်ကြဘူးဆိုရင် ပျောက်ကွယ်သွားရင် နောက်နောင် ပြန်လည်ဖော်ထုတ်ဖို့ ခက်လိမ့်မယ်။ ဗုဒ္ဓဘာသာတွေရဲ့ နှလုံးသားထဲမှာ ဒီနေ့ဟာ နိုင်ငံတော် ဗုဒ္ဓဘာသာနေ့ ဖြစ်တယ်လို့ သိထားဖို့ လိုတယ်။ ဒီအတွက် ကျင်းပခဲ့ကြတာဖြစ်တယ်” ဟု မိန့်သည်။
နိုင်ငံတော် ဘာသာနေ့ အခမ်းအနား အထိမ်းအမှတ်အဖြစ် ရဟန်တော်များကို ဒေသခံပြည်သူများက ဆွမ်းဆန်စိမ်းများ လောင်းလှူခဲ့ကြသည်ဟု သိရသည်။
အခမ်းအနားတွင် ကြွရောက်လာကြသော သံဃာတော်များကလည်း အန္တရာယ်ကင်း ပရိတ်တော်များကို ရွတ်ဆိုချီးမြှင့်ခဲ့ကြကြောင်း၊ ယနေ့သည် ဝါခေါင်လပြည့် မေတ္တာ အခါတော်နေ့ဖြစ်နေ၍ မေတ္တာသုတ် ပရိတ်တော်ကိုလည်း စုပေါင်း ရွတ်ဖတ်ပူဇော်ခဲ့ကြခြင်း ဖြစ်ကြောင်း ဆရာတော်က ဆက်လက် မိန့်ကြားသည်။
image-c3fd0378b70afd97da61eabf2bb92314274a320ce6924324b4372dc98425be8a-V
“ဒီနေ့က ဝါခေါင်လပြည့်နေ့ဆိုတော့ မေတ္တာအခါတော်နေ့လေ။ ဒါကြောင့် မေတ္တာသုတ် ပရိတ်တော်ကိုလည်းပဲ စုပေါင်းရွတ်ဆိုကြတယ်။ ပြီးတော့ ပွဲကို ရောက်လာတဲ့ လူတွေကို စည်းနဲ့ကမ်းနဲ့ နေကြဖို့၊ ပြောကြ ဆိုကြဖို့၊ ဘယ်ပြဿနာမှ မဖြစ်စေဖို့ ဝန်းရံပြီးတော့ ဆောင်ရွက်ကြတာပါ။ လုံခြုံရေးတွေကလည်း တင်းကျပ်စွာ တာဝန်ယူပေးပါတယ်” ဟု ဆရာတော်က မိန့်သည်။
အခမ်းအနားကို သံတွဲမြို့ရှိ လေးမျက်နှာကုန်းတော် ဓမ္မာရုံတွင် နေ့လည် (၁) နာရီအချိန်တွင် စတင် ကျင်းပခဲ့ပြီး ပရိတ်တရားတော်များနာကြား၍ အပြီးတွင် သံဃာတော်များက သံတွဲမြို့ စိတ္တသုခလမ်း၊ ရွှေဆံတော် ဘုရားလမ်း၊ တာဝတိံသာလမ်း၊ ဗိုလ်ချုပ်လမ်း၊ ရတနာလမ်း၊ ဘုရင့်နောင်လမ်း၊ မဟာမြိုင်လမ်းများသို့ ကြွရောက် ဆွမ်းဆန်စိမ်း အလှူခံခဲ့ကြပြီး ဗုဒ္ဓဘာသာဝင်များကလည်း ဆွမ်းဆန်များ၊ ဆီးမီးတိုင်၊ အမွှေးတိုင်များ အပါအဝင် လှူဖွယ်ဝတ္ထုများကို လှူဒါန်းခဲ့ကြသည်။
သံတွဲတွင် ဗုဒ္ဓဘာသာနေ့အထိမ်းအမှတ်အဖြစ် ဆွမ်းလောင်းလှူခြင်းမှာ ဒုတိယအကြိမ်ဖြစ်ပြီး ဤနေ့ကို ဗုဒ္ဓဘာသာဝင်များအနေဖြင့် မသိမဖြစ် သိထားရမည်ဟု ဆရာတော်က ဆက်လက် မိန့်ကြားသည်။
(သတင်းအရင်းအမြစ်- နိရဉ္စရာသတင်းဌာန)

မလေးကို ခိုးလှေနဲ့သွားမည့် ဘင်္ဂလီ ၅၀ ကျော်စက်လှေတစ်စီးနှင့်အတူ အဖမ်းခံရ

ဖမ်းဆီးခံရသူများကို တွေ့ရစဉ်။
ဖမ်းဆီးခံရသူများကို တွေ့ရစဉ်။
ဘင်္ဂလာဒေ့ခ်ျနိုင်ငံ ကော့စ်ဘာဇားမြို့အနီး ပင်လယ်ပြင်တွင် မလေးရှားနိုင်ငံသို့ တရားမ၀င် ရေလမ်းကြောင်း မှ သွားရန် စီစဉ်နေသည့် စက်လှေတစ်စီးနှင့် လူပေါင်း ၅၀ ကျော်ကို ယနေ့ နေ့လည်ပိုင်းက သက်ဆိုင်ရာ အာဏာပိုင်များမှ ဖမ်းဆီးလိုက်ကြောင်း Cox’s bazar News တွင် ဖေါ်ပြသည်။
ဖမ်းဆီးခံရသူမှာ  စုစုပေါင်း ၅၆ ဦးဖြစ်ကြောင်း၊ ဖမ်းဆီးခံရရာတွင် လူကုန်ကူးသူ နှစ်ဦး ပါဝင်ကြောင်း၊ လူကုန်ကူးသူ နောက်တစ်ဦးမှာမူ ထွက်ပြေးလွတ်မြောက်သွားကြောင်း ရဲက ပြောဆိုကြောင်း သတင်းကဆိုသည်။
ယခုအခါ သူတို့အား ဖမ်းဆီးထိန်းသိမ်းထားပြီး စစ်ဆေးမူများ ပြုလုပ်နေကြောင်း သိရသည်။
ယင်းအပြင် ကော့စ်ဘာဇားမြို့ ကိုလာတိုလီရှိ တည်းခိုခန်းတခုမှ လူကုန်ကူးသူ ၂ ဦးနှင့် မလေးရှားသွားမည့်သူ ၁၅ ဦးကိုလည်း ရဲတပ်ဖွဲ့က ဖမ်းဆီးလိုက်ကြောင်းသိရသည်။
သြဂုတ်လ ၃ ရက်နေ့ကလည်း လူပေါင်း ၆၀ ကျော်တင်ဆောင်ပြီး မလေးသွားမည့် စက်လှေတစ်စီး ကော့စ်ဘာဇားမြို့အနီးတွင် ပျက်စီးသွားခဲ့သည်။
ပျက်စီးသွားသည့် စက်လှေမှလူများမှာ ကမ်းခြေသို့ ထွက်ပြေး လွတ်မြောက်သွားကြသော်လည်း နော်ဆိမ်းဒီခရိုင် ရိုင်ပူမြို့နယ်မှ အသက် ၃၅ နှစ်အရွယ် ရှာဟီးမီယာဆိုသူ တစ်ဦးကို ရဲတပ်ဖွဲ့က ဖမ်းဆီးခဲ့သည်။
ဘင်္ဂလာဒေခ်ျ့ နိုင်ငံသားများသည် သူ့နိုင်ငံအတွင်း အလုပ်အကိုင် ရှားပါးမူကြောင့် မြန်မာနိုင်ငံနှင့် ဘင်္ဂလာဒေခ်ျ့နယ်စပ်မှ နေ၍ မလေးရှားကို နှစ်စဉ်ထွက်ခွာလေ့ရှိပြီး မလေးရှားသို့ ရောက်လျှင် မြန်မာနိုင်ငံတွင် လူ့အခွင့်အရေး ချိုးဖေါက်ခံရ၍ ထွက်ပြေးလာသူ မြန်မာနိုင်ငံမှ လူနည်းစု မူဆလင်များ ဖြစ်သည်ဟု လိမ်လည် ပြောဆိုကာ အကူအညီနှင့် ခိုလုံခွင့်များတောင်းခံလေ့ရှိကြောင်း သိရသည်။
(သတင်းအရင်းအမြစ်- နိရဉ္စရာသတင်းဌာန)

စူပါမွန်းသတိပေးမူ သံတွဲငပလီတွင်ပြုလုပ်

Thandwe-beach
ယနေ့ သံတွဲ ငပလီ ကမ်းခြေ။
Supermoon ( စူပါမွန်း)ကြောင့် ပင်လယ်ရေမျက်နာပြင် မြင့်တက်ခြင်း၊ ငလျင်လူပ်ခြင်းများ ဖြစ်ပေါ် လာနိုင်သဖြင့် သံတွဲ ငပလီ ကမ်းခြေတွင် အသံချဲ့စက်များဖြင့် သတိပေးမူများ ပြုလုပ်ခဲ့သည်ဟု သတင်း ရရှိသည်။
သြဂုတ်လ ၁၀ ရက်နေ့တွင် နေ၊ ကမ္ဘာနှင့် လ တတန်းဖြစ်ချိန်တွင် လမှ ဆွဲအားကြောင့် ပင်လယ်ဒီရေမှာ ပိုပြီး မြင့်တက်လာပြီး ငလျင်စသော သဘာဝ ဘေးအန္တရယ်ဆိုများ ကျရောက်နိုင်ကြောင်း မိုးလေ၀သနှင့် ဇလဗေဒပညာရှင်များက သတိပေးထားသည်။
“ ငပလီ ကမ်းခြေတစ်လျှောက်နေ ပြည်သူတွေကို သြဂုတ်လ ၉ ရက်နေ့ကနေ ၁၁ ရက်နေ့ထိ ပင်လယ်ကို ငါးရှာ မဆင်းဖို့နဲ့၊ ပင်လယ်ကမ်းခြေတွေမှာ ရေးဆင်းကူးတာတွေ မပြုလုပ်ဖို့ ဆိုက်ကားပေါ်မှာ အသံချဲ့စက်ကို တင်ပြီး ကမ်းခြေတလျှောက် ဆော်သြ သတိပေးမူတွေ ပြုလုပ်ထားပါတယ်” ဟု ဒေသအတွင်းက သတင်းထောက် တစ်ဦးဖြစ်သူ ကိုနေဇော်က ပြောသည်။
ယင်းသို့ သတိပေးမူကို သက်ဆိုင်ရာ ဌာနဆိုင်ရာများ၏ ညွှန်ကြားချက်များဖြင့် ရပ်ကွက် အုပ်ချုပ်ရေးမှူးရုံးများမှ ပြုလုပ်ခြင်း ဖြစ်ပြီး ဒေသခံအများစုမှာ ယခုရက်ပိုင်းအတွင်း ပင်လယ်ထဲကို ဆင်းသူ အထူးနည်းပါးသွားသည်ဟု သိရသည်။
မြန်မာနိုင်ငံ အောက်ပိုင်းဒေသများတွင် မုတ်သုန်မိုးကြောင့် ဒီရေများ မြင့်တက်ပြီး နေရာ အနှံ့အပြားတွင် ရေကြီးမူများ ဖြစ်ပေါ်နေသဖြင့် စူပါမွန်းကြောင့် သဘာဝ ဘေးဆိုးများ ဖြစ်ပေါ်လာမည်ကို စိုးရိမ်မူများလည်း ရှိနေသည်ဟု သိရသည်။
Supermoon ( စူပါမွန်း) နေ့တွင် ကမ္ဘာသူ ကမ္ဘာသားများ အနေဖြင့် လကို ယခင်က မြင်နေကျထက် အဆ ၁၅ ဆ ပိုကြီးမားသော အရွယ်အစားနှင့် တွေ့မြင်ရမည် ဖြစ်သဖြင့် သိပ္ပံပညာရှင်များနှင့် မိုးလေဝသ ပညာရှင်တွေ အပါအဝင် နက္ခတ္တ ပညာရှင်တွေ စိတ်ဝင်တစား စောင့်ကြည့်နေကြသည်ဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

ကျောက်တော်တွင် ပုဒ်မ (၁၄၄) ညမထွက်ရအမ်ိန့်ရုပ်သိမ်း

Kyauk-Taw
ရခိုင်ပြည်နယ် ကျောက်တော်မြို့တွင် ၂၀၁၂ ခုနှစ်ကတည်းက ထုတ်ထားသော ပုဒ်မ (၁၄၄) ညမထွက်ရ အမိန့်ကို ယခုလ ၇ ရက်နေ့ကစပြီး ရုတ်သိမ်းလိုက်ပြီဟု သိရသည်။
“ ဒီလ ၇ ရက်နေ့ကနေပြီးတော့ ညမထွက်ရအမိန့်ကို ရုတ်သိမ်းလိုက်ပါပြီ။ ရခိုင်ပြည်နယ် အစိုးရရဲ့ ခွင့်ပြုချက်နဲ့ ရုတ်သိမ်းလိုက်တာပါ” ဟု ကျောက်တော်မြို့နယ် ပြည်နယ်လွှတ်တော်ကိုယ်စားလှယ် ဦးစောငြိမ်းက ပြောသည်။
မြို့နယ် အဆင့်တာဝန်ရှိသူများ၊ လွှတ်တော်ကိုယ်စားလှယ်များ၊ မြို့မိမြို့ဖများ စုဝေးတိုင်ပင်ပြီး ညမထွက်ရ အမိန့်ကို ရုတ်သိမ်းရန်လိုကြောင်း ဆုံးဖြတ်ချက်ချပြီးနောက် ပြည်နယ်အစိုးရသို့ တင်ပြရာ ပြည်နယ်အစိုးရကလည်း ခွင့်ပြုသဖြင့် မြို့နယ် အုပ်ချုပ်ရေးမှူးက ညမထွက်ရ အမိန့်ကို သြဂုတ်စ် ၇ ရက်နေ့မှ စ၍ ရုတ်သိမ်းလိုက်သည်ဟု သူကဆိုသည်။
“ နောက်နောင် ပြသနာတွေ မပေါ်ပေါက်ရအောင် နှစ်ဘက် လူမူ အသိုင်းအ၀ိုင်းတွေကိုလည်း ချပြ ရှင်းလင်းတာတွေ ရှိပါတယ်။ အခု အခြေအနေလည်း အရင်နဲ့စာရင် တိုးတက်ကောင်းမွန်လာခဲ့ပြီ ဖြစ်ပါတယ်။ ပြသနာတွေ မပေါ်ပေါက်ရအောင်လည်း မြို့မိမြို့ဖတွေ၊ လွှတ်တော်ကိုယ်စားလှယ်တွေ၊ သက်ဆိုင်ရာ တာဝန်ရှိသူတွေက ၀ိုင်းဝန်း ထိန်းသိမ်းပေးသွားကြမှာ ဖြစ်ပါတယ်” ဟု ဦးစောငြိမ်းက ပြောသည်။
ကျောက်တော်မြို့တွင် ညမထွက်ရ အမိန့် (၁၄၄) ထုတ်ထားသဖြင့် စီးပွားရေး အထူးထိခိုက်ခဲ့ပြီး ဒေသခံပြည်သူများ၏ စားဝတ်နေရေးကို မပြေလည်မူများ ပေါ်ပေါက်စေခဲ့သည်ဟု ဆိုသည်။
ဒေသခံ လူငယ်တစ်ဦးကလည်း ညမထွက်ရအမ်ိန့်ကို ရုတ်သိမ်းလိုက်သဖြင့် လွှတ်လပ်စွာသွားလာ၍ ရသွားပြီ ဖြစ်ကြောင်း၊ နယ်မှ မော်တော်ဘုတ်များ၊ စက်လှေများ၊ လေသဗာန်များ အချိန်မရွှေးဝင်ထွက်သွားလာလို့ ရသဖြင့် ဒေသခံများ၏ စီးပွားရေး ပြန်လည် အဆင်ပြေတိုးတက်လာမည် ဖြစ်ကြောင်း ပြောကြားသည်။
ရခိုင်ပြည်နယ် ပြန်ကြားရေးနှင့် မှတ်တမ်းပြုစုရေးဌာန အတွင်းရေးမှူး ဦးဝင်းမြိုင်ကမူ သူအနေဖြင့် ကျောက်တော်တွင် ညမထွက်ရ အမိန့်ရုတ်သိမ်းလိုက်သည်မှာ ယာယီလား၊ အမြဲတန်းလားဆိုသည်ကို တိတိကျကျ မသိရှိရသေးကြောင်း ပြောကြားသည်။
ညမထွက်ရ အမိန့်ကြောင့် စီးပွားရေးအကျပ်အတည်းများ ဖြစ်ပေါ်နေသဖြင့်  တခြားမြို့များတွင်လည်း အလားတူ ညမထွက်ရ အမ်ိန့်ကို ရုတ်သိမ်းရန် အစီအစဉ် ရှိပါသလားဟု မေးမြန်းရာ သူက ယခုလို တုန့်ပြန်ပြောကြားသည်။
“ ညမထွက်ရ အမ်ိန့်ကိုတော့ လုံးဝ မရုတ်သိမ်းပေမယ့် မြို့တော်တော်များများမှာ အချိန်ကို လျှော့ချပေးနေပါတယ်။ လုံခြုံရေးအဆင့် တိုးတက်လာတဲ့ မြို့တွေမှာ အချိန်ကို တဖြည်းဖြည်းချင်း လျှော့ချပေးနေပါတယ်။ စစ်တွေမှာလည်း ညမထွက်ရ အမိန့်ရှိနေတုန်း ဖြစ်ပေမယ့် လွတ်လပ်စွာ သွားလာနေကြတာတွေကို တွေ့ကြရမှာ ဖြစ်ပါတယ်” ဟု ပြောဆိုသည်။
ရခိုင်ပြည်နယ်တွင် သံတွဲ၊ ကျောက်ဖြူ၊ စစ်တွေ၊ ဘူးသီးတောင်နှင့် မောင်တောမြို့နယ်များတွင် ညမထွက်ရ အမ်ိန့်ကို ၂၀၁၂ ခုနှစ် ဇွန်လမှ စတင်ပြီး ထုတ်ပြန်ထားခဲ့ရာ ယခုအချိန် မရုတ်သိမ်းသေးဘဲ ဆက်လက် တည်တံနေဆဲ ဖြစ်ကြောင်း သိရသည်။
(သတင်းအရင်းအမြစ်- နိရဉ္စရာသတင်းဌာန)

တောင်ကုတ်တပ်သိမ်းမြေတွင် လုပ်ကိုင်ခွင့် ရုတ်သိမ်းခံရ၍ ကာချုပ်အထိ စာတင်မည်ဟုဆို

confiscared-lands
ဦးရွှေအောင်အား လုပ်ကိုင်စားသောက်ခွင့် ပြုပေးထားသော စာ ( ဓါတ်ပုံ- နိရဉ္စရာ)
တပ်မတော်မှ သိမ်းယူထားသော လယ်မြေပေါ်တွင် လုပ်ကိုင်ခွင့် ရုတ်သိမ်းခံရသဖြင့် တပ်မတော် ကာကွယ်ရေး ဦးစီးချုပ်ထိ စာရေး အသနားခံသွားမည်ဟု တောင်ကုတ်မြို့မှ လယ်သမားကြီး ဦးရွှေအောင်က ဆိုသည်။
တောင်ကုတ်မြို့နယ် ကြိုးကြာကွင်း ကျေးရွာမှ လယ်သမားကြီး ဦးရွှေအောင်တွင် လယ် (၅) ဧက ရှိရာ ယင်းလယ်မြေအားလုံအား တောင်ကုတ်မြို့ စကခ (၅) မှ လျှော်ကြေး တစ်စုံတစ်ရာ မပေးဘဲ သိမ်းယူသွားခဲ့ကြောင်း၊ ထို (၅) ဧကထဲမှ (၃) ဧကမှာ သတ်မှတ်ထားသော တပ်ဧရိယာတွင် မပါဝင်ဘဲ ပါးနီးပါးစပ်တွင် တည်ရှိသဖြင့် ဦးရွှေအောင်အား အခကြေးငွေ တစ်စုံတစ်ရာ ပေးသွင်းစရာမလိုဘဲ ပြန်လည် လုပ်ကိုင် စားသောက်ရန် ခွင့်ပြုပေးခဲ့ကြောင်း၊ ထိုသို့ လုပ်ကိုင်စားသောက်လာခဲ့ရာမှ ယခုနှစ် စိုက်ပျိုးရာသီတွင် လုပ်ကိုင်ခွင့်မပေးတော့ဘဲ အတင်း လယ်ထဲမှ မောင်းထုတ်ခဲ့ကြောင်း ဦးရွှေအောင်က ပြောဆိုသည်။
“ ဦးမှာ လယ် ၅ ဧက ရှိပါတယ်။ အဲဒီ (၅) ဧကထဲက (၂) ဧကဟာ တပ်သိမ်းတဲ့ ဧရိယာထဲမှာ ပါသွားပြီး ကျန်တဲ့ (၃) ဧကကတော့ တပ်သိမ်းမြေထဲမှာပါပေမယ့် အလွတ် ဖြစ်နေတဲ့ အတွက် ဒီနေ့ထိ လုပ်ကိုင်စားသောက်လာပါတယ်။ ခုကျတော့ အဲဒီ ၃ ဧက ပေါ်မှာလည်း လုပ်ကိုင်စားသောက်ခွင့် မပြုဘဲ မောင်းထုတ်တဲ့ အတွက် မျိုးစပါးကျခါနီးမှ လယ်ကိုစွန့်ပီး ထွက်လာရပါတယ်”ဟု ကြိုးကြာကွင်းကျေးရွာမှ လယ်သမားကြီး ဦးရွှေအောင်က နိရဉ္စရာသို့ ပြောသည်။
၎င်းမြေ ၃ ဧကအား တစ်စုံတစ်ရာ အခကြေးငွေ မယူဘဲ လုပ်စားရန် စကခ (၅) တပ်မမှ ဌာနချုပ်မှူးက ထုတ်ပေးထားသော ထောက်ခံချက်ရှိကြောင်း ဦးရွှေအောင်က ပြောသည်။
“ ဒီမြေတွေဟာ တပ်သိမ်းမြေထဲမှာ ပါပေမယ့် လုပ်ကိုင်စားသောက်ဖို့ တပ်မ ဌာနချုပ်မှူးက ထောက်ခံစာရေးပေးထားပါတယ်။ ဒါ့ပြင် မြေတိုင်းဌာနက စိုက်ထူထားတဲ့ တပ်မြေဆိုတဲ့ ကျောက်တိုင်ရဲ့ အပြင်ဘက်မှာလည်း ရှိနေပါတယ်။ အခု ဒီမြေတွေပေါ်မှာ အခု လုပ်ကိုင်စားသောက်လို့ မရတော့ဘူးဆိုတော့ ဦးမှာ ဘ၀ရပ်တည်ရေး အထူးအခက်အခဲ ဖြစ်သွားပြီ” ဟု ဦးရွှေအောင်က ဆက်ဆိုသည်။
ယခုကဲ့သို့ လုပ်ပိုင်ခွင့် ရုတ်သိမ်းခံရသဖြင့် လုပ်ကိုင်စားသောက်စရာ ဘာမှ မရှိတော့သဖြင့် မိသားစု အနာဂတ်အတွက် အထူးရင်လေးမိ၍ တပ်မတော် ကာကွယ်ရေး ဦးစီးချုပ်ထံ အသနားခံစာပေးပို့သွားမည်ဟု သူက ပြောဆိုသည်။
“  ဦးက ဒီလယ်ကိစ္စ ကာကွယ်ရေး ဦးစီးချုပ်ထိ တင်ရမှာဘဲ။ ဒီလယ် သုံးဧကကို မှီပြီး လုပ်ကိုင် စားသောက်နေတာ အခု ဘယ်လိုလုပ် ရပ်တည်ရမလဲဆိုတာတောင် မသိတော့ပါဘူး။ လျှော်ကြေးလည်း တစ်ပြားမှ မရဘူး။ ဒါကြောင့် ကျွန်တော်ကို သနားသဖြင့် ဒီလယ်မြေတွေမှာ ပြန်လုပ်ကိုင်စားသောက်ခွင့်ရဖို့ အသနားခံသွားပါမယ်” ဟု ဆိုသည်။
တောင်ကုတ် အခြေစိုက် စကခ(၅) တပ်မသည် စုစုပေါင်း လယ်မြေဧက (၃၁၂) ဧကကို လယ်သမား ၅၇ ဦးထံမှ ၁၉၉၅ ခုနှစ်အတွင်းက သိမ်းဆည်းထားပြီး အခု ဦးရွှေအောင်၏ လယ် (၅) ဧကသည်လည်း ယင်းအထဲတွင် ပါဝင်သည်ဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

Friday, August 15, 2014

(၂၆) နှစ်မြောက် ရှစ်လေးလုံးနေ့တွင် ရခိုင်ပြည်နယ်အစိုးရ အစီအစဉ်ဖြင့် ပရိတ်တရားတော်များရွတ်ဖတ်

အစိုးရ ဘာသာရေး ပွဲလန်းသဘင်များ ပြုလုပ်ရာ စစ်တွေမှ လောကနန္ဒာစေတီ ( ဓါတ်ပုံ- နိရဉ္စရာ)
အစိုးရ ဘာသာရေး ပွဲလန်းသဘင်များ ပြုလုပ်ရာ စစ်တွေမှ လောကနန္ဒာစေတီ ( ဓါတ်ပုံ- နိရဉ္စရာ)
သြဂုတ်စ်လ ၈ ရက်နေ့တွင် ကျရောက်သော (၂၆) နှစ်မြောက် ရှစ်လေးလုံးနေ့တွင် တိုက်တိုက်ဆိုင်ဆိုင် ရခိုင်ပြည်နယ် အစိုးရမှ မြို့ကြီး တချို့တွင် ဆရာတော်များကို ပင့်ဖိတ်ပြီး ပရိတ်တရားတော်များ ရွှတ်ဖတ် ပူဇော်ခဲ့သည်ဟု သတင်း ရရှိသည်။
စစ်တွေမြို့တွင် ပြုလုပ်သော အခမ်းအနားအား လောကာနန္ဒာစေတီတော်တွင် သြဂုတ်စ်လ ၈ ရက်နေ့ နံနက်က ၇ နာရီက စတင် ပြုလုပ်ခဲ့ပြီး မြို့ရှိ သံဃာ (၁၀၈) ပါးအား ပင့်ဖိတ်ကာ အန္တရာယ်ကင်း ပရိတ်တော်များကို ရွှတ်ဖတ် ပူဇော်ခဲ့သည်ဟု ဆိုသည်။
“ ရခိုင်ပြည်နယ် ၀န်ကြီးချုပ်တော့ မရောက်ဘူး။ နယ်စပ်ရေးရာဝန်ကြီး ဗိုလ်မှူးကြီးထိန်လင်းတော့ ရောက်တယ်။ အဲဒီမှာ မြို့ရှိ သံဃာ ၁၀၈ ပါးကို ပင့်ဖိတ်တယ်ဆိုတော့ ဆရာတော်ကြီးတွေ အကုန်လုံးရောက်တယ်။ အန္တရာယ်ကင်း ပရိတ်တွေကို ရွှတ်ဖတ်ပူဇော်ဖို့ လျှောက်တဲ့ အတွက် ပူဇော်ရွှတ်ဖတ်ခဲ့ပါတယ်။ ကျန်တာတွေကတော့ ခါတိုင်းလုပ်နေကျအတိုင်းဘဲ ထူးခြားမူ မရှိပါ” ဟု အခမ်းအနားကို တက်ရောက်ခဲ့သူ အောင်မြေကုန်းဆရာတော်က မိန့်ကြားသည်။
ယနေ့တွင် ရှစ်လေးလုံးလေး (၂၆) နှစ်ပြည့်မြောက်သည့်နေ့ဖြစ်၍ အခမ်းအနား ပြုလုပ်သည်မှာ တိုက်ဆိုင်မူရှိနေသည့် အတွက် ယင်းအပေါ် မည်သို့ အမြင်ရှိပါသလဲဟု မေးမြန်းရာ ဆရာတော်က ယခုလို မိန့်ကြားသည်။
“ ဒီနေ့က ရှစ်လေးလုံးနှစ်ပတ်လည်နေ့ ဖြစ်ပေမယ့် အခုလုပ်တာက ဒီနေ့နဲ့တော့ မဆိုင်ဘူးထင်တယ်။ ဒီနေ့ အကြောင်း ဘာမှ ပြောဆိုတာတွေ မရှိခဲ့ပါဘူး” ဟု ဆိုသည်။
သို့သော်လည်း သက်ဆိုင်ရာ အာဏာပိုင်များမှ လျှောက်ထားရာတွင် ထူးခြားမူတစ်ခု ပါရှိသည်ဟု ဆရာတော်က ယခုလို ဆက်လက် မိန့်ကြားသည်။
“ ကျောင်းတိုက်တွေမှာ သီတင်းသုံးနေတဲ့ သံဃာတော်တွေကို လူမူရေး၊ နိုင်ငံရေး လုပ်ငန်းတွေမှာ ပါဝင် မပတ်သက်ဖို့ တားမြစ်ပေးပါဆိုပြီးတော့ လျှောက်ထားတာ တစ်ခုတော့ရှိတယ်။ စစ်တွေမှာ ထူးထူးခြားခြား ဘာမှ ပြောသံ မကြားပါဘူး။ ဒီလို လျှောက်တာတစ်ခုတော့ ရှိခဲ့တယ်” ဟု ဆိုသည်။
အလားတူ သံတွဲ၊ ကျောက်ဖြူမြို့ အပါအ၀င် တခြားမြို့အချို့တွင်လည်း ဆရာတော် (၉) ပါးစီကို ပင့်ဖိတ်ပြီး အန္တရာယ်ကင်း ပရိတ်တော်များကို ရွှတ်ဖတ်ပူဇော်ခဲ့ကြသည်။ ဆရာတော်များအား နေ့လည်စာဆွမ်း ဆပ်ကပ် လှူဒါန်းခဲ့ကြသည်ဟု သိရသည်။
ဒေသခံ ပြည်သူများကမူ ရှစ်လေးလုံးနေ့နှင့် တိုက်ဆိုင်ပြီး သံဃာတော်များကို ဆွမ်းကျွေးပရိတ်ရွှတ်ဖတ်ခြင်းမှာ နောက်ကွယ်တွင် တစ်စုံတစ်ရာအကြောင်းခြင်းရာ ရှိနိုင်ကြောင်း သံသယဖြစ်နေကြသည်ဟု ကျောက်ဖြူဒေသခံ ကိုထွန်းနိုင်က ပြောသည်။
(သတင်းအရင်းအမြစ်- နိရဉ္စရာသတင်းဌာန)

စစ်တွေဒါးပိုင်ဒုက္ခသည်စခန်းတွင် လူတစ်ဦးသေဆုံးခဲ့ရသောဆူပူမူ (၄၇) ကြိမ်မြောက် အာဆီယံ နိုင်ငံခြားရေး ၀န်ကြီး အစည်းအဝေးနှင့် တိုက်ဆိုင်နေ

Sittwe Muslim Riots-Muslims Confront Police
ယခင်က စစ်တွေရှိ ဘင်္ဂလီဒုက္ခသည် စခန်းတွင် ဖြစ်ပွားခဲ့သော ဆူပူမူ (ဓါတ်ပုံ- အင်တာနက်)
ရခိုင်ပြည်နယ် စစ်တွေမြို့ ဒါးပိုင် ဘင်္ဂလီ ဒုက္ခသည်စခန်းတွင် သြဂုတ်စ်လ (၆) ရက်နေ့က လူတစ်ဦး သေဆုံးရသည့် အထိ ဖြစ်ပွားခဲ့သော ဆူပူမူသည် နေပြည်တော်တွင် သြဂုတ်စ်လ (၈) ရက်နေ့တွင် စတင်ကျင်းပမည့် (၄၇) ကြိမ်မြောက် အာဆီယံ နိုင်ငံခြားရေး ၀န်ကြီး အစည်းအဝေးနှင့် အာရှ၏ အဓိက လုံခြုံရေးဆိုင်ရာဆွေးနွေးပွဲ ( Asean Regional Forum) နှင့် တိုက်ဆိုင်နေသည်။
သို့အတွက် ယခုဆူပူမူသည် အကွက်ကျကျ စီစဉ်ပြီး အချိန်ကိုက် လုပ်ဆောင်မူဟုတ်/ မဟုတ်ကို သက်ဆိုင်ရာမှ အမြန်ဆုံး စုံစမ်းစစ်ဆေး ဖေါ်ထုတ်မူများ ပြုလုပ်ရန် လိုအပ်ကြောင်း စစ်တွေမြို့နယ် ရခိုင်ပြည်နယ် လွှတ်တော်ကိုယ်စားလှယ် ဦးအောင်မြကျော်က ပြောသည်။
“ မြန်မာနိုင်ငံကို ကုလသမဂ္ဂကဖြစ်စေ၊ နိုင်ငံတစ်ခုခုက အကြီးအကဲတွေ လာရောက်လည်ပတ်တဲ့ အခါတိုင်း ဖြစ်စေ သူတို့က ခုလို ပြသနာတွေကို ဖန်တီးခဲ့တာတွေရှိတယ်။ အခုလည်း နေပြည်တော်မှာ (၄၇) ကြိမ်မြောက် အာဆီယံ နိုင်ငံခြားရေး ၀န်ကြီး အစည်းအဝေးရှိနေတဲ့ အချိန်မှာ ဒါးပိုင် ဒုက္ခသည် စခန်းမှာ ဆူပူမူဖြစ်တယ်။ ဒီအပေါ်မှာ တမင်အကွက်ချ စီစဉ်တာလားဆိုတာကို ကျနော်တို့ သံသယ ဖြစ်နေတဲ့ အပိုင်းတွေရှိတယ်။ ဒါကို သက်ဆိုင်ရာက စုံစမ်းဖေါ်ထုတ် အရေးယူဆောင်ရွက်ဖို့လိုတယ်” ဟု သူက ဆိုသည်။
ယခင်ကလည်း အလားတူ ဆူပူမူများ တိုက်ဆိုင်စွာ ပေါ်ပေါက်ခဲ့မူများ ရှိခဲ့သော်လည်း သက်ဆိုင်ရာက တစ်စုံတစ်ရာ ဖေါ်ထုတ်အရေးယူခြင်း မရှိခဲ့သဖြင့် စိတ်ပျက်မိကြောင်း ဦးအောင်မြကျော်က ပြောဆိုသည်။
သြဂုတ်စ်လ (၆) ရက်နေ့က စစ်တွေမြို့နယ် ဒါးပိုင် ဘင်္ဂလီ ဒုက္ခသည် စခန်းတွင် ဆူပူမူ ဖြစ်ပွားခဲ့သဖြင့် ရဲက သေနတ်ဖြင့် ပစ်ခတ်ရာ ဘင်္ဂလီ ဒုက္ခသည် တစ်ဦး သေဆုံးခဲ့ရသည်။
အဆိုပါနေ့ ညနေ ၇ နာရီခွဲခန့်တွင် ဒါးပိုင် ဘင်္ဂလီရွာမှ လူငယ် နှစ်ဦးသည် ဒါးပိုင် ဒုက္ခသည် စခန်းသို့ ဈေးဝယ်ရန် သွားရောက်စဉ် ဒါးပိုင် ဒုက္ခသည်စခန်းမှ ဘင်္ဂလီ များမှ သူခိုးဟု စွပ်စွဲကာ ကြိုးများဖြင့် တုတ်နှောင်ပြီး ဖမ်းဆီးရိုက်နှက်မူများ ပြုလုပ်ခဲ့ကြောင်း၊ ထိုသို့ လူငယ်နှစ်ဦးကို ဖမ်းဆီးရိုက်နေသဖြင့် မိဘဖြစ်သူများက မှန်စီသားရေစက်ရုံတွင် လုံခြုံရေးယူထားသော အမှတ် (၃၆) ရဲတပ်ဖွဲ့သို့ သို့လာရောက် တိုင်းတန်း အကြောင်းကြားခဲ့ကြောင်း၊ သို့အတွက် ရဲတပ်ဖွဲ့က လိုက်ပါသွားရာ ရဲကို တိုင်ကြားရမည်လားဟုဆိုကာ အဆိုပါ ဖမ်းဆီးထားသူ ဘင်္ဂလီ လူငယ် (၂) ဦးအား သတ်ပစ်မည်ဟု ခြိမ်းခြောက်ပြီး ဓါးကိုင်ထားသော လူတစ်စုမှ ဒုက္ခသည်စခန်း အနောက်ဘက်သို့ ခေါ်ဆောင်သွားခဲ့ကြောင်း၊ ရဲတပ်ဖွဲ့ဝင်များက အော်ဟစ်တားဆီးသော်လည်း လိုက်နာမူ မရှိသည့် အပြင် လေးခွ၊ ဂျင်ကလိများဖြင့် ပစ်ခတ်ကြသည့်အတွက် သေနတ် (၅) ချက် မိုးပေါ်ထောင်ပစ်ခဲ့ရသည်ဟု စတင် ဖြစ်ပွားပုံနှင့် ပတ်သက်ပြီး ရဲတာဝန်ရှိသူ  တစ်ဦးက နိရဉ္စရာသို့ ပြောကြားသည်။
သေနတ် ပစ်ဖေါက်မူကြောင့် ဒုက္ခသည်စခန်းမှ လူအုပ်မှာပြိုကွဲသွားခဲ့သော်လည်း ညဥ့်အမှောင်ကိုယူကာ အဆောက်အအုံများ၊ သစ်ပင်များကို အကာအကွယ်ယူလျှက် လေးခွ၊ ဂျင်ဂလိများဖြင့် ထပ်မံပစ်ခတ်ပြီး လူအုပ်ကြီးက ၀ိုင်းအုံလာသဖြင့် အဓိဂရုဏ်းဖြိုခွင်းရေးလက်နက်များဖြင့် တစ်ချက်ချင်း ပစ်ခတ် ဖြိုခွင်း သော်လည်း နောက်မဆုတ်ဘဲ ဆက်လက် ၀ိုင်းအုံလာသဖြင့် သေနတ်ဖြင့် လေးချက် ထပ်မံ ပစ်ခတ်ခဲ့သည်ဟု ဆိုသည်။
၎င်းနောက်ပိုင်းတွင် လူအုပ်ပြိုကွဲသွားသဖြင့် ဖမ်းဆီးခံထားရသူ လူငယ်နှစ်ဦးအား ကယ်တင်နိုင်ခဲ့ပြီး ယင်းလူငယ် နှစ်ဦးအား သတ်ဖြတ်ရန် စီစဉ်သူများထဲမှ (၃) ဦးကို ဖမ်းဆီးနိုင်ခဲ့ကြောင်း၊ ဖမ်းဆီးခံထားရသူ တစ်ဦးမှ နောက်ကွယ်မှ ၀ှက်ယူလာသော ဓါးဖြင့် ရဲတပ်ဖွဲ့ တစ်ဦးအား လိုက်ခုတ်ရာ သေနတ်ဖြင့် ပစ်ခတ်ခဲ့ရကြောင်း၊ သို့အတွက်  ချောင်ရှုးအာလောင် (၃၀) နှစ် ဆိုသူမှာ ဦးခေါင်းတွင် ကျည်ဆံထိမှန် သေဆုံးသွားကြောင်း သူက ပြောကြားသည်။
“ သူတို့အချင်းချင်း ဖြစ်ကြတာ။ ရဲတပ်ဖွဲ့က ဥပဒေကြောင်းအရ ထိန်းသိမ်းဖို့သွားတာ။ ဒါကို သူတို့က လူအုပ်စုဖွဲ့ပြီး တိုက်ခိုက်ဖို့ ကြိုးစားတဲ့ အတွက် ခုလို အဆင့်ထိ ဖြစ်သွားရတာပါ” ဟု ရဲတာဝန်ရှိသူက ပြောကြားသည်။
၎င်းသေဆုံးသွားသူ ချောင်ရှုးအာလောင် အလောင်းအား ယမန်နေ့ ကြာသပတေးနေ့ နံနက်က ဘာရေးဆရာများနှင့် အရပ်လူကြီးလက်သို့  လွှဲပြောင်း ပေးအပ်လိုက်ပြီး မန်ဇီ မူဆလင် သချိုင်းတွင် သဂြိုလ်ခဲ့သည်ဟု သိရသည်။
ယနေ့ သြဂုတ်လ (၈) ရက်နေ့ နေပြည်တော်တွင် ကျင်းပပြုလုပ်မည့် (၄၇) ကြိမ်မြောက် အာဆီယံနိုင်ငံခြားရေး ၀န်ကြီးများ အစည်းအဝေးနှင့် အာရှလုံခြုံရေးဆိုင်ရာ ဆွေးနွေးပွဲ အဖြစ် လူသိများသော ( Asean Regional Forum) တို့ကို စတင် ကျင်းပမည်ဖြစ်သည်။
ယင်းအစည်းအဝေးသို့ အာဆီယံနိုင်ငံခြားရေး ၀န်ကြီးများသာမက အမေရိကန်၊ ရုရှား၊ ဂျပန် တရုတ်စသည့် အင်အားကြီးနိုင်ငံများမှ ကိုယ်စားလှယ်များလည်း တက်ရောက်ကြမည် ဖြစ်သည်။ ဆွေးနွေးပွဲကို သြဂုတ်လ ၈ ရက်မှ ၁၀ ရက်နေ့ အထိပြုလုပ်မည် ဖြစ်သည်။
(သတင်းအရင်းအမြစ်- နိရဉ္စရာသတင်းဌာန)

ရန်ကုန်တိုင်းဒေသကြီး ရခိုင်အမျိုးသားပါတီ ဗဟိုကော်မီတီထဲတွင် အမျိုးသမီး (၅) ဦး ရွေးချယ်တင်မြှောက်ခံရ

 ဤကိုယ်စားလှယ်လူကြီးများကပင် အမျိုးသမီး (၅) ဦးကို ရွှေးချယ်ခဲ့ကြသည်။ ( ဓါတ်ပုံ- နိရဉ္စရာ)
ဤကိုယ်စားလှယ်လူကြီးများကပင် အမျိုးသမီး (၅) ဦးကို ရွှေးချယ်ခဲ့ကြသည်။ ( ဓါတ်ပုံ- နိရဉ္စရာ)
ရန်ကုန်တိုင်းဒေသကြီး ရခိုင်အမျိုးသားပါတီ ဗဟိုကော်မီတီ (၂၅) ဦးကို ယမန်နေ့က ရွေးချယ်တင်မြောက်ခဲ့ရာ ထိုအထဲတွင် ရခိုင် အမျိုးသမီး (၅) ဦးပါဝင်ကြောင်း သိရှိရသည်။
ယခင်က နိုင်ငံရေးမှာ အမျိုးသားများ၏ အလုပ်ဟု ခံယူထားတတ်လေ့ရှိကြသော ရခိုင်အမျိုးသမီးများ နိုင်ငံရေး လောကတွင် ပါဝင်လာမူမှာ အားရစရာ ဖြစ်ကြောင်း ရန်ကုန်တိုင်းဒေသကြီး ဥက္ကဌ အဖြစ် ရွေးချယ်ခံရသူ ဦးလှမြင့်က ပြောသည်။
ရွေးချယ်ခံခဲ့ရသောအမျိုးသမီးများမှာ ဒေါ်မြမေ၊ ဒေါ်ခင်လှမြိုင်၊ ဒေါ်ခင်လှရီ၊ ဒေါ်ထူးမေ၊ ဒေါ်ရွှေဇင်သင်း(ခေါ်) စုစုတို့ဖြစ်ကြပြီး ယင်း (၅) ဦးထဲမှ ဒေါ်မမြမေမှာတွဲဘက် အတွင်းရေးမှူးအဖြစ် ရွေးချယ် တင်မြောက် ခံခဲ့ရသည်။
ရန်ကုန်တိုင်းဒေသကြီး ရခိုင်အမျိုးသားပါတီ ဗဟိုကော်မီတီကို ယမန်နေ့က ကျောက်မြောင်းရှိ ပါတီ ဌာနချုပ်တွင် ကျင်းပခဲ့ရာ ကိုယ်စားလှယ် (၅၁) ဦးတက်ရောက်ခဲ့ပြီး လျှို့ဝှက်မဲစနစ်ဖြင့် ဗဟိုကော်မီတီဝင် (၂၅) ဦးကို ရွေးချယ်ခဲ့ကြသည်။
ထိုအထဲတွင် ယင်းအမျိုးသမီး (၅) ဦးကို ရန်ကုန်တိုင်းဒေသကြီး ရခိုင်အမျိုးသားပါတီအတွက် အမျိုးသားများနှင့် တန်းတူ ပါဝင်လူပ်ရှားနိုင်ရေး အတွက် ပါတီကိုယ်စားလှယ်များက ရွေးချယ်ခဲ့ကြခြင်း ဖြစ်သည်။
ရန်ကုန်တိုင်းဒေသကြီး ဗဟိုအလုပ်အမူဆောင်ကော်မီတီတွင်  ဥက္ကဌအဖြစ် ရခိုင်သားကြီး ဦးလှမြင့်၊ ဒုဥက္ကဌအဖြစ် လက်ရှိ ရန်ကုန်တိုင်းဒေသကြီး ရခိုင်ရေးရာ ၀န်ကြီး ဦးဇော်အေးမောင်နှင့် ဒေါက်တာဦးမောင်၊ အတွင်းရေးမှူးအဖြစ် ဦးအေးမောင်နှင့် တွဲဘက် အတွင်းရေးမှူးအဖြစ် ဒေါ်မြမေတို့ကို ရွေးချယ်တင်မြောက် ခဲ့ကြသည်။
ရန်ကုန်တိုင်းဒေသကြီးတွင် ယခုလက်ရှိ အချိန်တွင် ရခိုင်လူမျိုး (၅) သိန်းခန့် နေထိုင်လျှက် ရှိနေပြီး သူတို့ကို ရခိုင်အမျိုးသားပါတီတွင် ကျယ်ပြန့်စွာ ပါဝင်လာနိုင်ရေးနှင့် ရခိုင်ပြည်နယ် အကျိုးပြုလုပ်ငန်းများတွင် တက်တက်ကြွကြွ ပါဝင်နိုင်ရေး အတွက် စက်တင်္ဘာလအတွင်း  သံတွဲမြို့ ငပလီ၌ ပထမဆုံးအကြိမ်ကျင်းပမည့် ရခိုင်အမျိုးသားပါတီ ညီလာခံတွင် စည်းရုံးရေးမူဝါဒတစ်ရပ် ရေးဆွဲသွားမည်ဟု ဆိုသည်။
ရခိုင်အမျိုးသမီးများထဲမှ ကိုလိုလိုနီ ဗြိတိသျှ ခေတ်နှောင်းပိုင်း မြန်မာလွတ်လပ်ရေး ကြိုးပမ်းရာတွင် ပါဝင်ခဲ့သူ အနက် ဦးမဲအောင်၏ သမီး ဒေါ်မြစိန်သည် ထင်ရှားသူ တစ်ဦးဖြစ်သည်။
(သတင်းအရင်းအမြစ်- နိရဉ္စရာသတင်းဌာန)

တောင်ကုတ်တွင် အသက်(၁၄) နှစ်အရွယ် အမျိုးသမီးငယ် တစ်ဦး ရေစီးနှင့်မျောပါ သေဆုံး

မိုးကြီး၍ ရေစီးထန်နေသော ရခိုင်မှ ချောင်း (ဓါတ်ပုံ- နိရဉ္စရာ)
မိုးကြီး၍ ရေစီးထန်နေသော ရခိုင်မှ ချောင်း (ဓါတ်ပုံ- နိရဉ္စရာ)
ရခိုင်ပြည်နယ် တောင်ကုတ်မြို့နယ်မှ ကျေးရွာ တစ်ခုတွင် အသက် (၁၄) နှစ်အရွယ် အမျိုးသမီးငယ် တစ်ဦး တံတားကို ဖြတ်ကူးစဉ် ရေစီးနှင့်မျောပါသွားပြီး ရေနစ်သေဆုံးသွားခဲ့သည်ဟု သတင်းရရှိသည်။
“ သေဆုံးသွားတာက အေးသာယာကျေးရွာက အေးမြကြည် အသက် (၁၄) နှစ် (ဘ) ဦးကျော်ဝင်း ဖြစ်ပါတယ်” ဟု တောင်ကုတ်ရဲစခန်းမှ အတည်ပြုပြောကြားသည်။
သေဆုံးသွားခဲ့ရပုံကိုလည်း တာဝန်ရှိ ရဲအရာရှိက ယခုလို ဆက် ပြောဆိုသည်။
“ ရေနစ်သေတာက သြဂုတ်လ ၆ ရက်နေ့ နံနက် ၈ နာရီ ၃၀ ခန့်မှာပါ။ အမေနဲ့ ဈေးဝယ်ဖို့အသွား တံတား အကူးမှာ ရေစီးနဲ့ မျောပါသွားပြီး နောက်ပိုင်းမှာ ရေနစ်သေဆုံးသွားတာ ဖြစ်ပါတယ်” ဟု ဆိုသည်။
သေဆုံးသူ မိန်းကလေးအလောင်းအား ယမန်နေ့ကပင် ဆယ်ယူရရှိခဲ့သည်ဟု သိရသည်။
တောင်ကုတ်တွင် ယမန်နေ့က ရေကြီးခဲ့ပြီး မြေနိမ့်ပိုင်းရပ်ကွက်အချို့ကို ရေနစ်မြုပ်ခဲ့ကြောင်း၊ ယနေ့တွင် ရေပြန်ကျသွားပြီ ဖြစ်ကြောင်း ရဲတာဝန်ရှိသူက ပြောကြားသည်။
သံတွဲတွင်လည်း ရေကြီးမြေပြိုကျမူကြောင့် အနည်းဆုံး လူ (၃) ဦးသေဆုံးကြောင်း သတင်းထွက်ပေါ်နေရာ ၎င်းသတင်းမှာ မဟုတ်မှန်ကြောင်း သံတွဲရဲတပ်ဖွဲ့က ငြင်းဆိုသည်။
“ သူဌေးချောင်းစီမံကိန်းဆည်ကျိုးပြီး လူ (၃) ဦးသေသွားတဲ့ သတင်း မဟုတ်မှန်ပါဘူးခင်ဗျား။ ရေကြီးတာ မှန်ပေမယ့် လူသေဆုံးတာ မရှိပါဘူး” ဟု သံတွဲရဲစခန်းသို့ ယနေ့နံနက် ၉ နာရီက နိရဉ္စရာက ဆက်သွယ်မေးစဉ် တာဝန်ရှိသူက ဖြေကြားသည်။
ရေကြီးမူကြောင့် သံတွဲတွင် မြေန်ိမ့်ပိုင်းမှ မိသားစု (၃၀) ခန့်ကို ဘေးလွှတ်ရာသို့ ရွှေ့ပြောင်းထားရသည်ဟု ရဲအရာရှိက ပြောကြားသည်။

အတင်းလူဝတ်လဲ ထောင်ချခံရပြီး လွှတ်မြောက်လာသော ရဟန်းတော်ကို ရခိုင်ပြည်သူ ရာပေါင်းများစွာကြိုဆို

 ထောင်ကလွှတ်လာသော ဦးဓမ္မသေနအားမြောက်ဦးမြို့တွင် သြဂုတ်လ (၆) ရက်နေ့က ကြိုဆိုနေကြစဉ် (ဓါတ်ပုံ- နိရဉ္စရာ)
ထောင်ကလွှတ်လာသော ဦးဓမ္မသေနအားမြောက်ဦးမြို့တွင် သြဂုတ်လ (၆) ရက်နေ့က ကြိုဆိုနေကြစဉ် (ဓါတ်ပုံ- နိရဉ္စရာ)
ရခိုင်ပြည် မြောက်ဦးမြို့နယ်တွင် ကျောင်းအငြင်းပွားမူ တစ်ခုကြောင့် အတင်းလူဝတ်လဲပြီး ထောင် (၄) လ ချခံခဲ့ရသော ရဟန်းတော် တစ်ပါး ယမန်နေ့က စစ်တွေမြို့အကျဉ်းထောင်မှ လွှတ်မြောက်လာရာ မြောက်ဦးမြို့တွင် ရာနှင့် ချီသော ဒေသခံပြည်သူများက ကြိုဆိုခဲ့ကြသည်။
ယင်းလွှတ်မြောက်လာသော ရဟန်းတော်အမည်မှာ ဘဒ္ဒန္တဓမ္မသေန သာသနာ့ဓဇ (ဓမ္မစာရိယ) ဖြစ်ပြီး မြောက်ဦးမြို့နယ် စက်သားရွာ ကျောင်းအငြင်းပွားမူကြောင့် လူဝတ်လဲ ထောင်ချခံခဲ့ရသည်ဟု သိရသည်။
“ ဦးဇင်းကို အခုပြောင်းရွှေ့သွားပြီ ဖြစ်တဲ့ရခိုင်ပြည်နယ်သာသနာရေးမှူး ဦးသောင်းရွှေမှ တရားစွဲဆိုပြီး မြောက်ဦးမြို့နယ် တရားရုံးက လွန်ခဲ့တဲ့ ဧပြီလ ၁၁ ရက်နေ့က ထောင် (၄)လ ချလိုက်ပါတယ်။ ဦးဇင်းကို မြောက်ဦးခရိုင်ရဲရုံးမှာ အတင်းသင်္ကန်းချွတ် လူဝတ်လဲပြီးထောင်ထဲကို ပို့ခဲ့တာ ဖြစ်ပါတယ်” ဟု ဦးဇင်း ဘဒ္ဒန္တဓမ္မသေနက နိရဉ္စရာသို့ ပြောကြားသည်။
မည်သည့်အတွက်ကြောင့် ထောင်ချခံရပါသလဲဟု မေးမြန်းရာဦးဇင်းက ယခုလို မိန့်ကြားသည်။
Monk-in-Mrauk-U
“ ဦးဇင်းကို သံဃာအဖွဲ့အစည်းအဆင့်ဆင့် ပြောဆိုဆုံးမလို့ မရဆိုတဲ့ ရည်ရွယ်ချက်နဲ့ အဓိကစွဲတာပါ။ ဦးဇင်းကို ဒီပုဒ်မနဲ့ စွဲပေမယ့် ဘယ်ဆရာတော်ကမှ ဦးဇင်းကို အဆင့်ဆင့် ခေါ်ယူ ပြောဆိုဆုံးမတာလည်း မရှိခဲ့ဘူး။ အဲသလို ဆုံးမတာမရှိဘဲ ခုလို တစ်ဘက်သတ် တရားစွဲထောင်ချခံရတာ ဖြစ်ပါတယ်။ ပုဒ်မကတော့ န၀တ ဥပဒေ အမှတ် ၂၀/၉၀ ပုဒ်မ (၁၁) အရ (၁၄) ရက်အရေးယူခိုင်းတာကို မြို့နယ်တရားရုံးက လူဝတ်လဲပြီး ထောင် (၄) လ ချမှတ်ခဲ့ပါတယ်” ဟု ဦးဇင်းက ဆိုသည်။
မြောက်ဦးမြို့နယ် စက်သားရွာကျောင်းအား မင်းဂံဂိုဏ်းမှ ဘဒ္ဒန္တဓမ္မသေန သာသနာ့ဓဇ (ဓမ္မစာရိယ) အား ကျောင်းထိုင်ဆရာတော်အဖြစ် ခန့်အပ်ခဲ့ကြောင်း၊ ထိုသို့ခန့်အပ်ပြီးနောက် ကျောင်းသို့ သွားရောက်ရာ စက်သားရွာမှ  ယင်းဦးဇင်းအား မကိုးကွယ်လိုသူ လူတစ်စုက မြို့နယ် သံဃာနာယကသို့ အကူအညီ တောင်းခံခဲ့သဖြင့် သံဃာနာယကမှ ကျောင်းကို ချိတ်ပိတ်ခဲ့သည်ဟု ဆိုသည်။
ယင်းနောက်ပိုင်းတွင် ဘဒ္ဒန္တဓမ္မသေနသည် မန္တလေးမြို့တွင် ချီးမြှင့်မည့် သာသနဓဇ ဘွဲ့ကို ယူရန် သွားရောက်နေစဉ် မြောက်ဦးမြို့နယ် သံဃာနာယကမှ စက်သားရွာ ကျောင်းကို ပြန်လည် ဖွင့်ပြီး တခြားရဟန်းတော် တစ်ပါးအား ကျောင်းထိုင်အဖြစ်ခန့်အပ်ခဲ့သည်ဟု သိရသည်။
မန္တလေးမှ ဘွဲ့ယူပြီး ပြန်လာသော ဦးဇင်း ဘဒ္ဒန္တဓမ္မသေနမှ စက်သားရွာ ကျောင်းသို့ ဂိုဏ်းဆရာတော်မှ တာဝန်ပေးထားသည်နှင့် အညီ ဂဃ သံဃာ၊ ဂဃအာစရိယ ဂိုဏ်းချုပ်ဆရာတော်မှ ကျောင်းချသည်ဟုဆိုကာ ယင်းကျောင်းသို့ သွားရောက်ရာ ကျောင်းလုသည်ဟု ဆိုကာတရားစွဲခံရပြီး ယခုလို ထောင်ချခံခဲ့ရခြင်း ဖြစ်သည်ဟု ဆိုသည်။
ဦးဇင်း ဘဒ္ဒန္တဓမ္မသေန သာသနဓဇဓမ္မစာရိယအား စက်သွားရာတွင် သုံးပုံနှစ်ပုံခန့် ရွာသားများက ကြည်ညိုကြောင်း၊ မကြည်ညိုသူက အနည်းစုသာရှိပါကြောင်း၊ ယခုကဲ့သို့ သင်္ကန်းအတင်းချွတ်ပြီး ထောင်ထဲပို့ခံရသည်မှာ တရားမျှတမူမရှိကြောင်း၊ ရဟန်းတော်များကို တရားစီရင် ဆုံးဖြတ်ရန် ရဟန်းသံဃာဝိနစ္စ ခုံရုံးဆိုတာရှိကြောင်း၊ ထိုခုံရုံးတွင် အမူကို မဆုံးဖြတ်ဘဲ လူဝတ်ကြောင်များကို စီရင်သော တရားရုံးကို ပို့ပြီး အမူကို ဆုံးဖြတ်ခြင်းမှာ တရားမျှတမူမရှိကြောင်း၊ ရဟန်းသံဃာတော်များ၊ ဒေသခံပြည်သူများ လုံးဝ တရားမျှတမူမရှိဟု ခံယူထားပါကြောင်း၊ သို့သော်လည်း မတတ်သာ၍ အောင့်အည်းသည်းခံရခြင်း ဖြစ်ကြောင်း မြောက်ဦးမြို့ ပြင်ဈီးဆရာတော်က မိန့်ကြားသည်။
Monk-release-in-Jail
“ မနေ့က ဦးဇင်း ဘဒ္ဒန္တဓမ္မသေန သာသနဓဇဓမ္မစာရိယထောင်က လွှတ်လာတော့ ရခိုင်မင်္ဂလာ စည်တော်တွေကို တီးပြီး လူတွေနဲ့ ရာနဲ့ချီပြီး ကြိုဆိုကြတယ်။  ဒါကဘာကိုပြသလဲဆိုရင် အဲဒီဦးဇင်းဟာ ထောင်ချခံရပေမယ့် အပြစ်မရှိဆိုတာကို လူတွေက သိတဲ့ အတွက် ခုလို ကြိုဆိုကြတာ ဖြစ်ပါတယ်။ ဒါကို သံဃာနာယက ဆရာတော်ကြီးတွေ သိစေချင်ပါတယ်” ဟု ဆရာတော်က ဆက်လက်ပြောဆိုသည်။
စက်သားရွာမှ ကျောင်းတကာကြီး ဦးမောင်ဘသိန်းက ယခုကဲ့သို့ မြို့နယ် သံဃာနာယက၏ ၀င်ရောက် စွက်ဖက်မူကြောင့် စက်သားရွာမှာ ပြိုကွဲသွားခဲ့ရသည်ဟု ဆိုသည်။
“ ကျနော်တို့က ခေါင်းယောင်းဆရာတော်ကြီးက မှန်မှန်ကန်ကန် ကျောင်းထိုင်ဖို့ ချပေးပါလျှက် မြို့နယ် သံဃာနာယကမှနေ ဦးဓမ္မသေနကို နှင်ချပြီး အတင်း သင်္ကန်းချွတ်လိုက်တဲ့ အတွက် စက်သားရွာဟာ ပြိုကွဲသွားပြီး ဦးဓမ္မသေနဟာ လုံးဝထောင်ကျသွားခဲ့ပါတယ်။ ဒီကိစ္စဟာသံဃာကိစ္စ ဖြစ်တဲ့ အတွက် မြို့နယ် သံဃာနာယမှာ အဓိက တာဝန်ရှိတယ်လို့ ပြောလိုပါတယ်” ဟု သူက ဆိုသည်။
ယခုအခါ ဦးဓမ္မသေနအား သင်္ဘောကိုင်း၊ သာစည်ရွာတို့မှ ကိုးကွယ်သော ကံရှည်ကျောင်းတွင် သီတင်းသုံးနေသော  ဂိုဏ်းချုပ် ဆရာတော် ခေါင်းယောင်းဆရာတော်ကြီးထံသိ်ု့ ပို့ဆောင်ရန် အတွက် ရဟန်းသံဃာတော်များ၊ တပည့်တကာများသည် သွားရောက်နေကြသည်ဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

ဓမ္မစေတီခေါင်းလောင်းကြီး ဆယ်ယူမည့် ရခိုင်အမျိုးသား ဦးစံလင်း အလုပ်ထိခိုက်သဖြင့် မီဒီယာများနှင့် အင်တာဗျူးခေတ္တရပ်ထားမည်ဟုဆို

Dhammazedi_Bell
(ဓါတ်ပုံ ပန်းချီ- အင်တာနက်)
ရန်ကုန်မြစ်-ပဲခူးမြစ်-ပုဇွန်တောင်ချောင်းတို့ဆုံရာ အလယ်တွင် တွင် နှစ်ပေါင်းရာနှင့်ချီ၍ နှစ်မြုပ်လျှက်ရှိသော ဓမ္မစေတီခေါင်းလောင်းကြီးအား ဦးဆောင် ဆယ်ယူမည့် ရခိုင်လူမျိုး ဦးစံလင်း အနေဖြင့် အင်တာဗျူးလုပ်လိုသူများပြားမူကြောင့် အလုပ်ထိခိုက်နေ၍​ လောလောဆယ်တွင် အင်တာဗျူး ပေးခြင်းကို ခေတ္တရပ်နားထားမည်ဟု ဆိုသည်။
ရခိုင်အမျိုးသား တစ်ဦးဖြစ်သူ သုဓမ္မမဏိဇောတဓရ ဦးစံလင်းအား နိရဉ္စရာမှ ဓမ္မစေတီတီ ခေါင်းလောင်ကြီး ပြန်လည်ဆယ်ယူမည့် ကိစ္စနှင့် ပတ်သက်ပြီး မေးမြန်းရာ အင်တာဗျူး လုပ်သူများကြောင့် အလုပ်ထိခိုက်နေ၍ လောလောဆယ် အင်တာဗျူး လုပ်ခြင်းကို ရပ်နားထားကြောင်း ပြောဆိုသည်။
“ အခု ကျွန်တော်က လုပ်ငန်း မစရသေးဘူး။ ခဏနေ တစ်ယောက်၊ ခဏနေ တစ်ယောက် ဖုန်းထဲကနေ အင်တာဗျူးလုပ်တာတွေ၊ မေးမြန်းတာတွေများနေတဲ့ အတွက် အလုပ်က ဘာမှလုပ်လို့ မရ ဖြစ်နေတယ်။ ဒါကြောင့် လောလောဆယ်မှာ အင်တာဗျူး မလုပ်ဖို့ ဆုံးဖြတ်ထားပါတယ်” ဟု ဆိုသည်။
ဦးစံလင်းအား ယမန်နေ့က အခြား သတင်းဌာနတစ်ချို့မှ အင်တာဗျူး ပြုလုပ်ပေးရန် ကမ်းလှမ်းခဲ့သော်လည်း အလားတူ ငြင်းဆိုထားကြောင်း သူက ဆက်လက်ပြောဆိုသည်။
“ မနေ့ကလည်း ဘီဘီစီ သတင်းဌာန အပါအ၀င် သတင်းဌာနတွေ စိတ်ဝင်စားသူတွေ မေးမြန်ကြတယ်။ အင်တာဗျူး မလုပ်နိုင်ဘူးလို့ ငြင်းလိုက်တယ်။ အခြား သတင်းဌာနတွေလည်း ဆက်သွယ်တယ်၊ ဘာတစ်ခုမှ ပြန်မဖြေနိုင်တော့ဘူးလို့ ပြောပြလိုက်တယ် ” ဟု ဆိုသည်။
ယင်းပြင် ဦးစံလင်းက “ခု ချိန်မှာ ဘာအင်တာဗျူးမှ မလုပ်နိုင်ပါဘူး။ ကျေးဇူးတင်တယ်၊ ဟိုကမေး ဒီကမေးနဲ့ တစ်ရက်တစ်ရက်ကို ကိုယ့်အလုပ်ကို မလုပ်ရဘူးဖြစ်နေတယ်။ တစ်ချို့ကိစ္စတွေ မပြီးနိုင်ဖြစ်နေတယ်။ ဒါကိုတော့ သည်းခံပေးကြပါ” ဟု ပြောဆိုသည်။
ဦးစံလင်း ဦးဆောင်သော အဖွဲ့သည် ဓမ္မစေတီ ခေါင်းလောင်းကြီးအား သြဂုတ်လ (၉) ရက်နေ့ စတင်ကာ ဆယ်ယူတော့မည် ဖြစ်သည်။
ကော့သောင်မြို့တွင်နေထိုင်သူ ဦးစံလင်း ဦးဆောင်သည့် အဖွဲ့အား ခေါင်းလောင်းကြီး ဆယ်ယူနိုင်ရန် ဇူလိုင်လ (၁၄) ရက်နေ့တွင် ရန်ကုန်တိုင်းဒေသကြီးအစိုးရအဖွဲ့မှ တရားဝင်ခွင့်ပြုခဲ့သည်။
ဦးစံလင်းမှာ ၁၉၉၇ ခုနှစ်မှ စတင်ကာ ဓမ္မစေတီခေါင်းလောင်းကြီးအား ရေထဲမှ ဆယ်ယူ ပူဇော်ရန် ကြိုးပမ်းနေသူ ဖြစ်ပြီး ယခုတစ်ကြိမ်တွင် (၄၅) ရက် အထိ လုပ်ကိုင်သွားမည် ဖြစ်ကြောင်း ၊ ခေါင်းလောင်းကြီး တူးဖော်ရာတွင် ကုန်ကျစရိတ် မြန်မာ ကျပ်ငွေ သိန်း ၂၀၀၀ ခန့် အထိ ကုန်ကျမည်ဟု ခန့်မှန်းထားကြောင်း ဧရာဝတီသတင်းဌာနက ရေးသား ဖော်ပြထားသည်။
ဓမ္မစေတီ ခေါင်းလောင်းတော်ကြီးမှာ ကြေးပိဿာချိန် (၁၈၀၀၀၀) ခန့်ရှိပြီး ဟံသာဝတီဘုရင် ဓမ္မစေတီမင်းကြီးမှ ရွှေတိဂုံစေတီတော်တွင် တင်လှူရန်အတွက် ၁၄၈၄ ခုနှစ်တွင် ရွှေ၊ ငွေ၊ ကြေး၊ ဘော် သတ္တုလေးမျိုးဖြင့် သွန်းလုပ်ခဲ့ခြင်းဖြစ်ပြီး လက်ရှိ ရေအောက်ထဲတွင် ၄၅ ဒီဂရီစောင်းနေပြီး အဝမှာ အပေါ်တွင် ရှိနေသော်လည်း နှစ်ပေါင်းလေးရာကျော် နစ်မြှပ်နေ၍ ပါဝင်သည့် သတ္တုဓာတ်ပြုမှုကြောင့် ခေါင်းလောင်းတော်ကြီးတွင် ကြိုးတပ်သည့် ကွင်းပင်မရှိတော့ဟု ဆယ်ယူသူ အဖွဲ့ဝင်အချို့က ဆိုကြောင်း Democracy Today တွင် ဖေါ်ပြသည်။
ထိုခေါင်းလောင်းကြီးကို ပေါ်တူဂီလူမျိုး ငဇင်ကာက သင်္ဘောဖြင့် ယူဆောင်ချိန်တွင် မြစ်သုံးစင်းဆုံရာ နေရာ၌ နစ်မြှပ်ခဲ့ခြင်းဖြစ်သည်။
ခေါင်းလောင်းကြီးအား ဆယ်ယူရာတွင် မြန်မာ့နည်း မြန်မာ့ဟန်များဖြင့် ဂမ္ဘီရဆန်ဆန် ဆယ်ယူမည်ဟု သတင်းများထွက်ပေါ်နေသဖြင့် လူအများက စိတ်ဝင်စားလျှက်ရှိသည်။
(သတင်းအရင်းအမြစ်- နိရဉ္စရာသတင်းဌာန)

Ooredoo ၀န်ဆောင်မူ ရခိုင်ထိတိုးချဲ့နိုင်မည်မဟုတ်သေး

Ooredoo
Ooredoo မြန်မာစာနယ်ဇင်း ရှင်းလင်းပွဲ (ဓါတ်ပုံ- နိရဉ္စရာ)
သြဂုတ်လ ၁၅ ရက်နေ့မှ စတင်ဖြန့်ကျက်မည့် Ooredoo ၀န်ဆောင်မူပေးမည့် ပထအစီအစဉ်ထဲတွင် ရခိုင်ပြည်နယ် မပါဝင်သေးကြောင်း သိရသည်။
Ooredoo ကုမ္ပဏီသည် လာမည့်  သြဂုတ်လ ၁၅ ရက်နေ့မှ စတင်ပြီး  ရန်ကုန် ၊ နေပြည်တော်၊ မန္တလေး အပြင် မကွေးတိုင်း၊  စစ်ကိုင်း တိုင်း၊ ဧရာဝတီတိုင်း၊ ပဲခူးတိုင်းတို့မှ မြို့ပေါင်း ၆၈ မြို့ အထိ ဝန်ဆောင်မှု တိုးချဲ့သွားမည်ဟု သြဂုတ်လ (၂) ရက်နေ့က ရန်ကုန်မြို့ Shangri-La ဟိုတည်တွင် ပြုလုပ်သော မြန်မာစာနယ်ဇင်း ရှင်းလင်းပွဲတွင် ooredoo ၏ CEO Ross Cormack ပြောသည်။
ရခိုင်ပြည်နယ်တွင် ooredoo ၀န်ဆောင်မူကို ဘယ်တော့ စနိုင်ပါမလဲဟု မေးမြန်းရာ ဈေးကွက် အရောင်းမြင့်တင်ရေး မန်နေဂျာ ဒေါ်သီရိကြာညိုက ယခုလို ပြောသည်။
“ လောလောဆယ်တို့ ရခိုင်ပြည်နယ် မပါဝင်သေးဘူးရှင်။ ဒါပေမယ့် သိပ်မကြာခင် တိုးချဲ့သွားမှာ ဖြစ်ပါတယ်။ တစ်ခုပြီး တစ်ခု တိုးချဲ့သွားမှာ ဖြစ်ပါတယ်။ အခုမပါဝင်တာကိုတော့ နားလည်ပေးစေချင်ပါတယ်ရှင်” ဟု သူမက ပြောသည်။
Ooredoo သည် ယခုလောလောဆယ်တွင် မြန်မာနိုင်ငံ အတွင်း ဆိုင်ခွဲပေါင်း ၆၅၀၀ ဖွင့်လှစ်ပြီး ရောင်းချသွားမည် ဖြစ်ကြောင်း Sim Card (ဆင်းမ်ကတ်) တစ်ခုကို  ကျပ် ၁၅ဝဝ ဈေးဖြင့် ၀န်ဆောင်မူ ပေးသွားမည်ဟု ဆိုသည်။
ယင်းပြင် Ooredoo ဖုံးအချင်းချင်းဆက်သွယ်ပါက တမိနစ် ၂၅ ကျပ်သာ ၀န်ဆောင်မူ ပေးရမည် ဖြစ်ပြီး တခြားဖုန်းများသို့ ခေါ်ဆိုပါ တမိနစ် ၃၅ ကျပ်ပေးဆောင်ရမည်ဟု ဆိုသည်။
(သတင်းအရင်းအမြစ်- နိရဉ္စရာသတင်းဌာန)

သံတွဲတွင်ရေကြီး၍ ကျောင်းတွေပိတ်၊ မိသားစု ၂၀ ခန့် ဘေးလွှတ်ရာသို့ ရွှေ့ပြောင်း

Than-dwe-flood
သံတွဲတွင် ယနေ့ သြဂုတ် ၆ ရက်နေ့ ရေကြီးနေစဉ်( ဓါတ်ပုံ-နိရဉ္စရာ/ နေဇော်)
ရခိုင်ပြည်နယ်သံတွဲတွင် ရေကြီးနေပြီး မြေနိမ့်ပိုင်းရပ်ကွက်အချို့တွင် ဆက်လက် ရေတိုးနေသဖြင့် စာသင်ကျောင်းများအားလုံးကို ယာယီပိတ်ထားလိုက်ကာ မိသားစု (၂၀) ခန့်ကိုလည်း ဘေးလွှတ်ရာသို့ ပြောင်းရွှေ့လိုက်ရသည်ဟု သတင်း ရရှိသည်။
“ ပြောင်းရွှေ့လိုက်ရတဲ့ မိသားစုက ၁၉ စု၊ လူဦးရေအားဖြင့်ဆိုရင် ၈၅ ဦးပါ။ ကယ်ဆယ်ရေး စခန်းဖွင့်ထားတဲ့ ဆံတော်တောင်ဘုရား ဓမ္မာရုံမှာထားပါတယ်။ သူတို့က ညောင်ပင်ဈေးရပ်ကွက်ကပါ” ဟု အလွတ် သတင်းထောက် တစ်ဦးဖြစ်သူ ကိုနေဇော်က ပြောသည်။
Thandwe-flood
ရေမှာ ဆက်လက်တိုးနေပြီး ရပ်ကွက်များထဲသို့ ရေများဆက်လက် ၀င်ရောက်နေဆဲ ဖြစ်သည်ဟု သိရသည်။
“ မိုးကတော့ နည်းနည်းစဲနေပါတယ်။ ရေကတော့ ဆက်တက်တုန်းပါ။ မြေနိမ့်ပိုင်းရပ်ကွက်တွေမှာ နေထိုင်တဲ့သူတွေက  အထုပ်အပိုးတွေအဆင်သင့်ပြင်ပြီး အခြေအနေကို ကြည့်နေကြပါတယ်” ဟု သူက ဆိုသည်။
သံတွဲတွင် ယမန်နေ့က  မိုးရေချိန်လက်မ ၅.၅၇ ထိ ရွာသွန်းခဲ့ပြီး လက်ရှိ အချိန်တွင် စိုးရိမ်ရေမှတ်မှာ (၅) ပေကျော် ရောက်ရှိနေပြီဟု သိရသည်။
Thandwe-flood
ယခုအခါ စစ်တပ်မှ ကယ်ဆယ်ရေးနှင့် ဒုက္ခသည်များကို ဆေးဝါးအကူအညီပေးရန် ကားတန်းကြီးများဖြင့် ထွက်ခွာလာကြသည်ဟု မျက်မြင်တစ်ဦးက ပြောသည်။
အလားတူတောင်ကုတ်မြို့တွင်လည်း ရေကြီးနေပြီး တောင်ကုတ်ဈေးအပါအ၀င် မြေန်ိမ့်ရပ်ကွက်များကို ရေနစ်မြုပ်နေကြောင်း တောင်ကုတ်ဒေသခံ တစ်ဦးဖြစ်သူ ဦးခင်လှက ပြောသည်။
(သတင်းအရင်းအမြစ်- နိရဉ္စရာသတင်းဌာန)

ရှေးဟောင်းဒင်္ဂါးများ တရားမဝင် ရောင်းဝယ်သည့် ဈေးကွက်တစ်ခု ရခိုင်တွင် ပေါ်ပေါက်နေ

Ancient Arakanese sliver coin
ဒေသခံတစ်ဦးမှဝယ်ယူစုဆောင်းထားသော ရခိုင်ရှေးဟောင်း ဒင်္ဂါးများ (ဓါတ်ပုံ- နိရဉ္စရာ)
ရခိုင်ရှေးဟောင်းငွေဒင်္ဂါံးပြားများကို ပြည်တွင်းနှင့် ပြည်ပနိုင်ငံများသို့ တရားမဝင် ရောင်းချနေကြသည့် ဈေးကွက်တစ်ခု စစ်တွေ၊ ကျောက်တော်နှင့် မြောက်ဦးမြို့တို့တွင် ပေါ်ပေါက်နေသည်ဟု သိရသည်။
ရှေးဟောင်းဒင်္ဂါး မှောင်ခို ရောင်းဝယ်နေမှုများကို အချိန်မီ တားဆီးအရေးယူသင့်ကြောင်း၊ သို့မဟုတ်ပါက တန်ဖိုးကြီးမားသော ရှေးဟောင်း ယဉ်ကျေးမူ အမွေအနှစ်များ ဆုံးရှုံးသွားနိုင်ကြောင်း ရခိုင်သမိုင်းပညာရှင်များက နိရဉ္စရာသို့ ပြောဆိုသည်။
အဆိုပါ ရှေးဟောင်းငွေဒင်္ဂါံးများကို ရခိုင်ပြည်နယ် မြောက်ဦးမြို့၊ကျောက်တော်မြို့များမှ တစ်ဆင့် စစ်တွေ၊ ထိုမှ တဆင့် ရန်ကုန် မန္တလေးမြို့များသို့သာမက တရုတ်နိုင်ငံ အပါအ၀င် ပြည်ပနိုင်ငံများအထိ တင်ပို့ရောင်းချမှုများ ရှိနေသည်ဟု စစ်တွေမြို့မှ ရခိုင်ယဉ်ကျေးမူအနုပညာများကိုထိန်းသိမ်းဖေါ်ထုတ်နေသူ ဆရာ ဦးကျော်ဇံမောင်က နိရဉ္စရာသို့ ပြောသည်။
“ရှေးဟောင်းရခိုင်ဒင်္ဂါးတွေကို အပြင်ကို မရောက်အောင် အချိန်မှီ ထိန်းသိမ်းရန် လိုအပ်ပါတယ်။ ရခိုင် ဘုရင်နာမည်တွေနဲ့ သွန်းလုပ်ထားတဲ့ ငွေဒင်္ဂါံးပြားတွေဟာ အစဉ်အဆက် ရခိုင်လူမျိုးတွေ လက်ထဲမှာမရှိဘဲ လူမျိုးခြားလက်ထဲကို ရောက်သွားလို့ရှိရင် နောက်မျိုးဆက်တွေကို ရခိုင်လူမျိုးတွေ ဒင်္ဂါံးပြားသုံးခဲ့တယ်ဆိုတာကို အထောက်အထားမပြနိုင်ဘဲ ဖြစ်သွားမယ်” ဟု ဦးကျော်ဇံမောင်က ပြောသည်။
သို့အတွက် ကိုယ်ပိုင်ယဉ်ကျေးမှု အမွေအနှစ်များကို ထိန်းသိမ်းစောင့်ရှောက်နိုင်ရေး အတွက် ယဉ်ကျေးမှု ထိန်းသိမ်းရေး စောင့်ရှောက်ရေး အဖွဲ့တစ်ခုကို ဖွဲ့စည်းရန် လိုအပ်သည်ဟုလည်း ဆရာက အကြံပြု ပြောဆိုသည်။
အရှေ့တောင်အာရှတွင် အစောဆုံး သုံးစွဲခဲ့သည်ဟု ယူဆရသော  ရခိုင်ရှေးဟောင်း ဒင်္ဂါးများကို အရည်ဖျော်ပြီး လက်စွပ်ပြုလုပ် ဝတ်ဆင်သူများပင် ရှိနေသည်ကို ၀မ်းနည်းစွာ တွေ့မြင်နေရကြောင်း ဆရာဦးကျော်ဇံမောင်က ဆက်လက် ပြောဆိုသည်။
“ အခုက သမိုင်းကို သမိုင်းလို့ မသိ။ စီးပွါးရေးသမားတွေက ကိုယ့်အကျိုးအမြတ်ရရင် ပြီးရော ဆိုပြီး ပန်းထိမ်တွေမှာ အရည်ဖျော်၊ လက်စွပ်လုပ်ဝတ်တဲ့သူတွေလည်းရှိပါတယ်” ဟု ဆိုသည်။
စစ်တွေမြို့နှင့် ကျောက်တော်၊ မြောက်ဦးမြို့တို့တွင် ယင်းငွေဒင်္ဂါံးများကို အဆင့်ဆင့် အမြတ်တင် ရောင်းချနေကြပြီး အတုများ ပြုလုပ်ကာ လိမ်လည် ရောင်းချမှုများလည်း ရှိနေကြောင်း သိရသည်။
Ancient-Arakan-sliver-coin
မည်သို့ပင် ဖြစ်စေ ယင်းရှေးဟောင်းငွေဒင်္ဂါး အစစ်များကို ရခိုင်ယဉ်ကျေးမူ အမွေအနှစ်ကို ချစ်မြတ်နိုး ရခိုင်ချမ်းသာသူများအနေဖြင့် တစ်ပိုင်တစ်နိုင်ဝယ်ယူပြီး ထိန်းသိမ်းသင့်ကြောင်း ရခိုင်အမွေအနှစ် ထိန်းသိမ်းနေသူ တစ်ဦးဖြစ်သူ ကိုသန်းနိုင်က ပြောသည်။
“ အထူးသဖြင့် ငွေကြေးတောင့်တင်းတဲ့ ရခိုင်လူချမ်းသာတွေအနေနဲ့ ငွေဒင်္ဂါးဘဲဖြစ်ဖြစ်၊ ရွှေဒဂါင်္းဘဲ ဖြစ်ဖြစ် ၀ယ်ယူပြီး မပျက်မစီးရအောင် ထိန်းသိမ်းသင့်ပါတယ်။ ကိုယ်တိုင်ထိန်းသိမ်းဖို့ အခက်အခဲရှိရင်တောင်မှ ရှေးဟောင်းယဉ်ကျေးမူ အမွေအနှစ်တွေကို ထိန်းသိမ်းနေတဲ့သူတွေနဲ့ပူးပေါင်းဆောင်ရွက်သင့်ပါတယ်။ ဒီလုပ်ငန်းဟာလည်း အမျိုးသားရေးအတွက် အရေးကြီးတဲ့ လုပ်ငန်း တစ်ခုပါ” ဟု ဆိုသည်။
ရှေးဟောင်း ရခိုင်ဒင်္ဂါံးများကို အေဒီ(၄)ရာစုက ရခိုင်ဝေသာလီမြို့တော်တည်ရှိခဲ့သော နေရာတစ်ဝိုက်တွင် အများဆုံးတွေ့ရပြီး ဒင်္ဂါံးများမှာ ခေတ်ပြိုင် အခြားဒင်္ဂါံးများနှင့် မတူသော ရခိုင်ရိုးရာ အမှတ်လက္ခဏာများကို ထည့်သွင်း ခတ်နှိပ်ထားသည်ဟု သိရသည်။
ရခိုင်ဝေသာလီဒင်္ဂါံးများမှာ ငွေသတ္တုပါဝင်မှု (၉၉) ရာခိုင်နှုန်းအထိ ရှိကြောင်း လေ့လာသူများက ဆိုသည်။
(သတင်းအရင်းအမြစ်- နိရဉ္စရာသတင်းဌာန)

ဘူးသီးတောင်မြို့နယ်တွင် ခမီးအမျိုးသမီးငယ်တစ်ဦး မုဒိန်းပြုကျင့်ခံရ

Buthidaung
ရခိုင်ပြည်နယ်၊ ဘူးသီးတောင်မြို့နယ်၊ လိပ်ရကျေးရွာအနီးတွင် လွန်ခဲ့သော သြဂုတ်လ (၁) ရက်နေ့က အသက်(၁၈)နှစ်အရွယ် ရွာကျောင်းဆရာမ အဖြစ် လုပ်ကိုင်နေသူ  ခမီးအမျိုးသမီးတစ်ဦး မုဒိန်း ပြုကျင့်ခံခဲ့ရကြောင်း ဘူးသီးတောင် ဒေသခံများနှင့် အမည်မဖေါ်လိုသူ အဆင့်မြင့် ရဲအရာရှိ တစ်ဦးက ပြောကြားသည်။
အဓမ္မပြုကျင့်ခံရသည့် အမျိုးသမီးငယ်မှာ မ *** (၁၈ နှစ်)  (ဘ- ဦးကျော်နိုင်) ဖြစ်ကြောင်း၊ အဆိုပါ အမျိုးသမီးငယ်မှာ ဘူးသီးတောင်မြို့နယ် ဆဟုန်းခမီးရွာတွင် နေထိုင်သူဖြစ်ပြီး ရွာနှင့် တစ်မိုင်ခန့် ကွာဝေးသည့် လိပ်ရကျေးရွာသို့ လာရောက်၍ စာပြပေးနေသူဖြစ်ကြောင်း ရဲအရာရှိက ပြောကြားသည်။
သူမသည် အဆိုပါနေ့က လိပ်ရရွာမှ ဆဟုန်းခမီးရွာသို့ ပြန်လာစဉ် ၀ါးထမ်းလာသူ တစ်ဦးက လမ်းတွင် အဓမ္မပြုကျင့်ခဲ့ကြောင်း ယင်းရဲအရာရှိမှ နိရဉ္စရာသို့  အတည်ပြု ပြောကြားသည်။
“ ဖြစ်ရပ်က မှန်ပါတယ်။ ကောင်မလေးနေတဲ့ ဆဟုန်းရွာနဲ့ လိပ်ရရွာကြားမှာ ရှိတဲ့ တောလမ်းတစ်နေရာမှာ ခုလို မဖွယ်မရာ လုပ်ခံလိုက်ရပါတယ် ”ဟု ဆိုသည်။
ယခုအခါ အဆိုပါ အမှုနှင့် ပတ်သက်သည့် တရားခံ အဖြစ်စွပ်စွဲခံထားရသူ ဆဟုန်းဘင်္ဂလီရွာမှ အဘူတယော (၃၀)နှစ် (ဘ- ဦးဇာဘွား) အား အမှတ် (၃) နယ်ခြားစောင့်ရဲတပ်ဖွဲ့က ဖမ်းဆီး စစ်ဆေးနေကြောင်း ယင်းရဲအရာရှိက ဆိုသည်။
Burthidaung-court
အမှုအားဘက်မလိုက်ဘဲ ဆုံးဖြတ်ပေးမည့် ဘူးသီးတောင်မြို့နယ် တရားရုံး (ဓါတ်ပုံ- နိရဉ္စရာ)
ယခုဖြစ်ရပ်အား ဥပဒေကြောင်းရ ထိရောက်အောင် အရေးယူသင့်ကြောင်း ဘူးသီးတောင် ဒေသခံ တစ်ဦးဖြစ်သူ ဦးထွန်းလှိုင်က ပြောသည်။
“ ခုကတော့ အခင်းဖြစ်တဲ့နေရာကို မြို့နယ်ရဲတပ်ဖွဲ့မှူးနဲ့ အုပ်ချုပ်ရေးမှူးတို့ ကိုယ်တိုင်ကွင်းဆင်း စစ်ဆေးခဲ့ပြီး ပါပြီ။ ဒီလိုမျိုးကိစ္စတွေကို ဥပဒေကြောင်းအရဘဲ ဖြေရှင်းသင့်ပါတယ်” ဟု ပြောသည်။
ဘူးသီးတောင် မြို့နယ် ရခိုင်အမျိုးသားပါတီ ပထမခေါင်းဆောင် ဦးထွန်းအောင်သိန်းကမူ ဒေသခံ တိုင်းရင်းသားများကို အစိုးရ အနေဖြင့် ဥပဒေအရ အကာအကွယ်ပေးရန် တာဝန်ရှိကြောင်း ပြောဆိုသည်။
“ ကျွန်တော်တို့ ဒီမှာ ရှိတဲ့ မြို၊ ခမီး၊ ဒိုင်းနက်၊ ရခိုင်တွေဟာ ဒေသခံတိုင်းရင်းသားတွေ ဖြစ်ပါတယ်။ ကျွန်တော်တို့ကို အစိုးရက အကာအကွယ်ပေးရမယ်။ ခုလို အစော်ကားခံရတဲ့ကိစ္စတွေကို အစိုးရ အနေနဲ့ ဥပဒေအရ အချိန်မီ ကိုင်တွယ်ဖြေရှင်းပေးရမယ် ”  ဟု ပြောဆိုသည်။

ရခိုင်တွင် မူလတန်း ကျောင်းဆရာ/ဆရာမ ၄၀၀၀ ကျော်ခန့်အပ်

ရခိုင်ပြည်နယ် မူလွန်ကျောင်းတစ်ကျောင်းမှ ဆရာမများကို တွေ့ရစဉ် (ဓါတ်ပုံ- နိရဉ္စရာ)
ရခိုင်ပြည်နယ် မူလွန်ကျောင်းတစ်ကျောင်းမှ ဆရာမများကို တွေ့ရစဉ် (ဓါတ်ပုံ- နိရဉ္စရာ)
ရခိုင်ပြည်နယ် အခြေခံပညာ မူလတန်းကျောင်းများအတွက် နေ့စားလပေး ဆွဲခန့် ကျောင်းဆရာ/ဆရာမ (၄၀၆၈) ဦးကို ယနေ့တွင် စာထုတ်ပြီး ခန့်အပ်လိုက်ကြောင်း ရခိုင်ပြည်နယ် ပညာရေးဦးစီးဌာန ညွှန်ကြားရေးမှူး ဦးလှစိန်ထွန်းက နိရဉ္စရာသို့ ပြောသည်။
“ အဓိက မူလတန်းကျောင်းတစ်ကျောင်းမှာ ဆရာ/ ဆရာမ အနည်းဆုံး ၅ ဦး ရှိရမယ်ဆိုတဲ့ မူရှိတယ်။ ဒီမူအရ ရခိုင်ပြည်နယ် ၁၇ မြို့နယ်မှာ နေ့စားလပေး ဆရာ/ ဆရာမ ၄၀၆၈ ဦးကို သြဂုတ်လ (၁) ရက်နေ့စွဲနဲ့ ဒီကနေ့မှာ စာထုတ် ခန့်အပ်လိုက်ပါတယ်။ စာကို ဒီကနေ့ ထုတ်ပြန်လိုက်ပြီ ဖြစ်ပါတယ်” ဟု ဦးလှစိန်ထွန်းက ဆိုသည်။
ယခု ဆရာ/ ဆရာမများမှာ နေ့စား လပေး စနစ်ဖြင့် ခန့်အပ်ခံရသော်လည်း လာမည့်နွေရာသီတွင် ဆရာအဖြစ်သင်တန်းသို့ တက်ရောက်ကြရမည် ဖြစ်ပြီး နောင်နှစ် ဇွန်လမှ စတင်ပြီး အမြဲတန်း ဆရာ/ ဆရာမ အဖြစ် ခန့်အပ်ခံကြရမည်ဖြစ်သည်။
“ ခုလို ဆရာ/ဆရာမ ၄၀၀၀ ကျော်ခန့်အပ်လိုက်တဲ့ အတွက် ရခိုင်ပြည်နယ် အတွင်း မူလတန်းကျောင်းတွေမှာ အခက်အခဲဖြစ်နေတဲ့ ဆရာ/ ဆရာမ မလုံလောက်မူ ပြသနာကို ကျော်လွှားနိုင်လိမ့်မယ် ယုံကြည်ထားပါတယ်” ဟု သူက ဆိုသည်။
ယင်းပြင် ညွှန်ကြားရေးမှူး ဦးလှစိန်ထွန်းမှ “ ခုလို ခန့်အပ်လိုက်တဲ့အတွက် ရခိုင်ပြည်နယ်ရဲ့ ပညာရေး တိုးတက်ကောင်းမွန်လာပါလိမ့်မယ်။ ရခိုင်ပြည်နယ် ပညာရေးမှာ အဓိက စိန်ခေါ်မူကြီးက ဆရာ/ဆရာမ မပြည့်စုံမူ ဖြစ်တဲ့ အတွက် ဒီလို ဖြည့်ဆည်းလိုက်တဲ့ အတွက် တိုးတက် ကောင်းမွန် လာလိမ့်မယ်လို့ မျှော်လင့်ပါတယ်” ဟု သူက ဆက်ပြောသည်။
ရခိုင်ပြည်နယ် အထက်တန်းကျောင်း အချို့နှင့် အထက်တန်းကျောင်းခွဲအချို့တွင် သိပ္ပံဘာသာတွဲ သင်ကြားနိုင်သော ဆရာ ဆရာမများ မရှိသဖြင့် ကျောင်းသားများစာသင်ရန် အခက်အခဲ ဖြစ်နေကြသည်ဟု ဒေသခံများက နိရဉ္စရာသို့ သတင်းပေးပို့ထားကြသည်။
ယင်းပြသနာအားလည်း များမကြာမီက ဖြေရှင်းပေးသွားမည်ဖြစ်ကြောင်း ဦးလှစိန်ထွန်းက ပြောဆိုသည်။
(သတင်းအရင်းအမြစ်- နိရဉ္စရာသတင်းဌာန)

Tuesday, August 5, 2014

ဗိုလ်ချုပ်ဟောင်းတစ်ဦးဇနီးနှင့် ရေတပ်ကသိမ်းထားသောမြေများပြန်ရရေး သံတွဲဂျိတ်တောတွင် ဆန္ဒဖေါ်ထုတ်

THANDWE-GATAW
မြေတွေကို ပြန်ပေးဖို့ ဂျိတ်တောဒေသခံများ ယနေ့တွင် ဤသို့ တောင်းဆိုခဲ့ကြသည်။ ( ဓါတ်ပုံ- နိရဉ္စရာ)
ရခိုင်ပြည်နယ် သံတွဲမြို့နယ် အပိုင် ငပလီမြို့ ဂျိတ်တောတွင် ဒေသခံ ပြည်သူ (၅၀) ကျော်သည် သူတို့ထံမှ ဗိုလ်ချုပ်ဟောင်းတစ်ဦးဇနီး အပါအ၀င် ရေတပ်နှင့် ငါးလုပ်ငန်း ဦးစီးဌာနမှ သိမ်းထားသော လယ်မြေများကို ပြန်ပေးရန် ဆန္ဒဖေါ်ထုတ် တောင်းဆိုခဲ့ကြသည်။
ဆန္ဒဖေါ်ထုတ်သူများသည် ယနေ့နံနက် ၁၂ နာရီခန့်က ဂျိတ်တောကျေးရွာမှ မြပြင်ရွာထိ ချီတက်ကာ ဆန္ဒဖေါ်ထုတ်ခဲ့သည်။
ဆန္ဒပြသူများသည် “ နတ်မော်တောင်အတွင်းရှိ ဗိုလ်ချုပ်ခင်မောင်သန်းနဲ့ ဇနီးဒေါ်မာလာတင့် သိမ်းထားသော တောင်မြေဧက (၈.၈၉) ဧကအား ပြန်ပေးရေး- ဒို့အရေး။ ရေတပ်ပင်မ ရေငုပ်နှင့် ဆက်သွယ်ရေးတပ်မှ သိမ်းဆည်းထားသော ဥယာဉ်ခြံ/ လယ်မြေဧက (၉၆.၆၄) ဧကကို ပြန်ပေးရေး- ဒို့အရေးနှင့် ငါးလုပ်ငန်း ဦးစီးဌာနမှ သိမ်းထားသော လယ်မြေများပြန်ပေးရေး-ဒို့အရေး” ဟု ကြွေးကြော်ကာ ဆန္ဒပြခဲ့ကြသည်ဟု ဦးဆောင်လူပ်ရှားသူ တစ်ဦးဖြစ်သည့် ဂျိတ်တောရွာမှ ကိုကျော်ဇော (ခေါ်) ကိုမောင်ညိုက ပြောသည်။
“ ဗိုလ်ချုပ်ဟောင်း ခင်မောင်သန်းက သူ့ဇနီး ဒေါ်မာလာတင့် နာမည်နဲ့ ၂၀၀၇ ခုကတည်းက နတ်မော်တောင်မှာ ဟိုတည်ဆောက်မယ်ဆိုပြီး သိမ်းတာပါ။ တောင်မြေဧက စုစုပေါင်း ၈. ၈၉ ဧက ရှိပါတယ်။ အခုအချိန်ထိဘာမှ အဲဒီမြေပေါ်မှာ ဘာမှအကောင်အထည်ဖေါ်တာ မရှိသေးဘူး။ ဒီမြေတွေကို ကျွန်တော်တို့ကို ပြန်ပေးဖို့ ဆန္ဒဖေါ်ထုတ် တောင်းဆိုရတာ ဖြစ်ပါတယ်” ဟု ဆိုသည်။
thandwe-demonstration
ရေတပ်ပင်မ ရေငုပ်နှင့် ဆက်သွယ်ရေးတပ်မှလည်း ၎င်းဒေသတွင် ဥယာဉ်ခြံ/ လယ်မြေဧက ၁၀၀၀ နီးပါးကို စစ်အစိုးရ လက်ထက်ကတည်းက သိမ်းထားပြီး ယင်းအထဲမှ (၉၆.၆၄) ဧကကို မြေဖေါ်ထုတ်နေကြောင်း၊ ယင်း မြေများထဲမှ ဧက ၂၀ အသုံပြုထားသည်က်ိုတွေ့ရကြောင်း၊ နောက်ထပ် ၁၀ ဧကကိုလည်း အသုံးပြုရန် တင်ထားကြောင်း၊  ယင်းပြင် ငါးလုပ်ငန်း ဦးစီးဌာနမှလည်း ၆ ဒသမ ၅၃ ဧကကို သိမ်းထားကြောင်း၊ အစပိုင်းတွင် စီမံကိန်းကို အကောင်အထည်ဖေါ်ခဲ့သော်လည်း နောက်ပိုင်းတွင် ပျက်စီးသွားခဲ့ကြောင်း၊ သို့သော်လည်း မူလပိုင်ရှင်များမှာ လုပ်ကိုင်စားသောက်ခွင့်မရဘဲ ဖြစ်နေကြောင်းနှင့် ယင်းမြေများမှာ သံတွဲမြို့နယ် ဂျိတ်တောနှင့် ကျောက်ကလပ်ကျေးများအနီးတွင် တည်ရှိကြောင်း သူက ပြောကြားသည်။
ဆန္ဒဖေါ်ထုတ်သူ ဒေသခံများသည် ၎င်းလယ်မြေများကို ပြန်ရရေး အတွက် နိုင်ငံတော် သမ္မတ အပါအ၀င် သက်ဆိုင်ရာ တာဝန်ရှိသူများထံသို့ အကြိမ်ကြိမ်စာရေး တောင်းဆိုသော်လည်း တစ်စုံတစ်ရာ တုန့်ပြန်ခြင်း မရှိသဖြင့် ယခုလို ဆန္ဒဖေါ်ထုတ်ရခြင်း ဖြစ်သည်ဟု ကိုကျော်ဇောက ဆိုသည်။
ယနေ့ ဆန္ဒပြပွဲအား သံတွဲမြို့ပေါ်တွင် ပြုလုပ်ခွင့် တောင်းခံသော်လည်း မရရှိသဖြင့် ဂျိတ်တောနှင့် မြပြင်ရွာတွင် သက်ဆိုင်ရာမှ ခွင့်ပြုချက်ဖြင့် ပြုလုပ်ခဲ့သည်ဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

ရခိုင်ပြည်နယ်လျှပ်စစ်ကဏ္ဍတိုးတက်ရန် ၀န်ကြီးချုပ်ကတိပြုပြီးနောက် မြောက်ဦးတွင်တရက်ခြားစီသာ လျှပ်စစ်မီးလာ

Mrauk-U-Entrace-gate
ရခိုင်ပြည်နယ် ၀န်ကြီးချုပ်သစ် အဖြစ်ခန့်အပ်ခံရသော ဗိုလ်ချုပ် မောင်မောင်အုန်းမှ သူ့လက်ထက်တွင် ရခိုင်ပြည်နယ်နယ် လျှပ်စစ်ကဏ္ဍကို တိုးတက်ကောင်းမွန်အောင် ပြုလုပ်ပေးမည်ဖြစ်ကြောင်း ကတိပြု ပြောကြားပြီးနောက်  နိုင်ငံခြားဧည့်သည်များ အဓိက လာရောက်လည်ပတ်သော မြောက်ဦးတွင် တစ်ရက်ခြားစီ လျှပ်စစ်မီးရရှိတော့သဖြင့် မြောက်ဦးဒေသခံတို့ အထူးစိတ်ပျက် လက်ပျက် ဖြစ်နေကြသည်ဟု သိရသည်။
“ ကျွန်တော်တို့ ဆန္ဒဖေါ်ထုတ်ပွဲလုပ်မယ်ဆိုပြီး ခရိုင်ဥက္ကဌကို အကြောင်းကြားတယ်။ အရင်က မီးနေ့တိုင်းလာတယ်။ မနေ့ကစပြီး တစ်ရက်ခြားစီလာတယ်။ ဒါကို ဆန္ဒဖေါ်ထုတ်ပွဲလုပ်ဖို့ မြို့နယ်ရဲမှာ ခွင့်ပြုချက်တောင်းခံမယ်ဆိုတော့ သူက မလုပ်ပါနဲ့။ သူတို့ ဖြေရှင်းပေးမယ်လို့ ပြောတယ်” ဟု မြောက်ဦး ဒေသခံ ကိုအေးမောင်သန်းက နိရဉ္စရာသို့ ပြောသည်။
ယခင်က မြောက်ဦးမြို့တွင် လျှပ်စစ်မီးမှာ နံနက် ၆ နာရီ ၁၁ နာရီ၊ ညနေ ၄ နာရီက ညဥ့် ၁၁ နာရီထိ တစ်မြို့လုံးကို လျှပ်စစ်မီး ဖြန့်ဖြူးပေးသော်လည်း သြဂုတ်စ်လ (၂) ရက်နေ့က စပြီး မြောက်ဦးမြို့ကို (၂) ခြမ်း ပိုင်းခြားလိုက်ပြီး တစ်ပိုင်းကို တစ်ရက်သာ ပေးတော့သည်ဟု ဆိုသည်။
“ ဒီဘက်အပိုင်းကို ဒီနေ့ ပေးရင် နောက်တစ်ပိုင်းကို မနက်ဖြန်ပေးတယ်။ တစ်ပိုင်းကို တစ်ရက်ခြားဘဲ ပေးတယ်။ အရင်က နေ့တိုင်းရနေတာ အခုတော့ မီတာခ ယူနစ် (၂၀) ထိ ၃၅ ကျပ်နဲ့ သုံးနိုင်တယ်လို့ ၀န်ကြီးချုပ်သစ်က ခွင့်ပြုပေးလိုက်တဲ့ နောက်ပိုင်းမှာ သူတို့က ခုလို တစ်မြို့လုံးကို မီးပေးနေတာကို လျှော့ချလိုက်တာ ဖြစ်ပါတယ်” ဟု သူက ဆက်ဆိုသည်။
ရခိုင်ပြည်နယ် ၀န်ကြီးချုပ် ဗိုလ်ချုပ် မောင်မောင်အုန်းမှ ရခိုင်ဝန်ကြီးချုပ် တာဝန်ထမ်းဆောင်ပြီး များမကြာမီ ရခိုင်ပြည်နယ်တွင် မီတာခ (၁၀) ယူနစ်ထိ ၃၅ ကျပ်နုန်းဖြင့် သုံးစွဲနေရာမှ မီတာ (၂၀) ထိ သုံးစွဲနိုင်ကြောင်း ထုတ်ပြန်ကျေညာခဲ့သည်။
မြောက်ဦးလျှပ်စစ်မီးဖြန့်ဖြူးသူများ အနေဖြင့် ယူနစ် (၂၀) ထိ ၃၅ ကျပ်နုန်းဖြင့် သုံးစွဲခွင့်ပြုလိုက်သဖြင့် အမြတ်မရှိရာမှ ယခုလို မြို့ကို နှစ်ပိုင်းခြားပြီး တစ်ပိုင်းတစ်ရက် ဖြန့်ဖြူးခြင်းဖြစ်ကြောင်း နီးစပ်သူ တစ်ဦးမှ ပြောဆိုသည်။
“ မြောက်ဦးမြို့ မီးကို တော်ဝင်ထူးလင်း ကုမ္ပဏီက ဒီဇယ်စက်ကြီးတွေက တဆင့် ပေးဝေနေတာ ဖြစ်ပါတယ်။ ယူနစ် (၁၀) ကနေ ယူနစ် (၂၀) ကို ၃၅ ကျပ်နုန်း သတ်မှတ်တော့ အမြတ်မရှိတော့ သူတို့က အရင်အတိုင်း တစ်မြို့လုံးကို မပေးတော့ဘူး။ နောက်ပီး ဒီဇင်္ဘာလမှ မဟာဓါတ်အားလိုင်းကနေ လျှပ်စစ်မီး လာတော့မယ် ဆိုတာကို သိတော့ မီးစက်တွေကိုလည်း မွန်းမံပြင်ဆင်မူ မလုပ်တော့ လျှပ်စစ်မီးအားက လျှော့ကျသွားတယ်လေ” ဟုသူကဆိုသည်။
မြောက်ဦးမြို့နယ် အုပ်ချုပ်ရေးမှူးမှ ယခုကိစ္စကို ပြေလည်အောင် ဖြေရှင်းပေးမည် ဖြစ်ကြောင်း၊ ပြည်နယ်သို့ တင်ပြအစီရင်ခံတင်ပြသွားမည် ဖြစ်ကြောင်း၊ မီးကန်ထရိုက်ယူထားသူ တာဝန်ခံမှာလည်း စစ်တွေသို့ ရောက်နေသဖြင့် ဖြေရှင်းပေးရန် ခက်ခဲနေသဖြင့် သြဂုတ်စ်လ (၁၀) ရက်နေ့ထိ စောင့်ဆိုင်းရန် မြို့လူထုအား ဖျောင်းဖျ ပြောဆိုထားသည်ဟု ဆိုသည်။
မြောက်ဦးသည် ရခိုင်ပြည်နယ်အတွင်းမှ ခရိုင်အဆင့်မြို့တစ်မြို့ ဖြစ်သည်သာမက  ရှေးဟောင်းမြို့တော် တစ်ခုလည်း ဖြစ်သဖြင့် ပြည်တွင်းပြည်ပ ဧည့်များ မကြာခဏ လာရောက်လည်ပတ်သော မြို့ ဖြစ်သည်။ ထိုသို့ ရခိုင်ပြည်နယ်အတွင်းမှ အထင်ကရ မြို့တစ်ခုတွင် လျှပ်စစ်မီးကို နာရီအလိုက်သာ သုံးစွဲခွင့် ရရှိခဲ့ရာမှ ယခုတဖန် အပိုင်းလိုက် တစ်ရက်ခြားသာ ရရှိတော့သဖြင့် မြို့ခံ လူထုအနေဖြင့် အာဏာပိုင်များ ကတိက၀တ်များ အပေါ် မေးခွန်းထုတ်နေကြသည်ဟု သတင်း ရရှိသည်။
(သတင်းအရင်းအမြစ်- နိရဉ္စရာသတင်းဌာန)

မောင်တောဒေသခံတစ်ဦး ဒိုင်ယာစီဖန်ဆေးပြားများနှင့်အတူ စစ်တွေသင်္ဘောဆိပ်တွင် ဖမ်းဆီးခံရ

diazepamရခိုင်ပြည်နယ် မောင်တောမြို့မှ ဒိုင်ယာစီဖန် ဆေးပြားများ သယ်လာသူတစ်ဦးကို စစ်တွေသင်္ဘောဆိပ်တွင် ယခုလ (၁) ရက်နေ့က ဆေးပြားများနှင့် အတူ ရဲမှ ဖမ်းဆီးလိုက်သည်ဟု သတင်း ရရှိသည်။
“ ဒီသတင်းမှန်ပါတယ်ခင်ဗျား။ သတင်းအရ စစ်တွေခရိုင်ရဲတပ်ဖွဲ့မှူး ဒုရဲမှူးကြီးသစ်ဆန်းရဲ့ ညွှန်ကြားချက်နဲ့ မူးယစ်ဆေးဝါး တပ်ဖွဲ့စု (၄၇) မှ ရဲမှူးရီထွန်းသန်း ဦးစီးတဲ့ တပ်ဖွဲ့က သတင်းအရ ဘူးသီးတောင်ကနေ ခုတ်မောင်းလာပြီး စစ်တွေ ဆိပ်ကမ်းကို ညနေ (၈) နာရီခန့်မှာ ဆိပ်ကပ်လာတဲ့ အောင်တံခွန် (၅) သင်္ဘောကို တက်ရောက်ရှာဖွေတဲ့အခါ ဆေးပြားတွေနဲ့ အတူ လူတစ်ဦးကို ဖမ်းဆီးရမိခဲ့ပါတယ်” ဟု တာဝန်ရှိ ရဲအရာရှိ တစ်ဦးက ပြောသည်။
ဖမ်းဆီးခံရသူမှာ မောင်တောမြို့၊ ငခူရကျေးရွာမှ မောင်သန်းထွန်း (၄၄ နှစ်)  (ဘ) ဦးကျော်မြဦးဖြစ်ကြောင်း ရဲအရာရှိမှ အတည်ပြု ပြောဆိုသည်။
“ သူ့ထံက ဖမ်းဆီးရမိတဲ့ ဆေးပြားတွေကတော့ အများကြီးပါဘဲ။ အနက်ရောင် ခရီးဆောင်အိတ်နဲ့ သယ်ဆောင်လာတာပါ။ အသိသက်သေတွေနဲ့ ဖွင့်ရှာတော့ အဲဒီအိတ်တွေက ဖမ်းမိတာပါ” ဟု သူကဆက်ဆိုသည်။
ဖမ်းဆီးရမိသော ဆေးပြားများမှာ တစ်ကဒ်တွင် ဆေးပြား (၂၀) စီပါ ဒိုင်ယာစီဖန် ( Diazepam) ၅ မီလီဂရမ် (၁၄၉၆) ကဒ်၊ ဆေးကဒ် တစ်ခုတွင် ဆေးပြား (၁၀) ပြားစီပါ Alprazolaml ၂၅ မီလီဂရမ် ဆေးကဒ်ပေါင်း ၄၉၀ ကဒ်၊ ဆေးကဒ် တစ်ခုလျှင် ဆေးပြား (၁၀) ပြားစီပါ Alprazolaml ဆေးကဒ် ပေါင်း ၄၉၀ ကဒ်၊ စုစုပေါင်း ဆေးများ၏ လက်ရှိ တန်ဖိုးငွေပမာဏ ကျပ် (၁၁၄၂၆၀၀) ရှိကြောင်း ရဲတာဝန်ရှိသူက ပြောသည်။
ဖမ်းဆီးမိသူ မောင်သန်းထွန်းအား ယခုအခါ စစ်တွေ အမှတ်(၁) ရဲစခန်းတွင် ဖမ်းဆီးချုပ်နှောင်ထားပြီး ရဲအုပ်ဝင်းလိူင်မှ တရားလို ပြုလုပ်ပြီး (ပ)၇/၂၀၁၄ မူးယစ်/ စိတ်ပြောင်းပုဒ်မ- ၁၅/၁၉ (က) /၂၀ (က) အရ အရေးယူ အမူဖွင့်ထားကြောင်း သိရသည်။
ယင်းအမူအား အမူအမှတ် ၁၆၉၇၆၆ ဖြင့် စစ်တွေ အမှတ်(၁) ရဲစခန်းမှ လက်ခံပြီး ဒုရဲအုပ် အောင်တင်ဦးမှ ဆက်လက်စစ်ဆေးကာ ကွင်းဆက်များကို ဖေါ်ထုတ်နေကြောင်း ရဲအရာရှိမှ ပြောသည်။
ရခိုင်ပြည်နယ် စစ်တွေမြို့တွင် မူးယစ်ဆေးဝါးသုံးစွဲသူ အထူးများပြားလာနေကြောင်း၊ ကျောင်းသား လူငယ်များအကြားတွင်လည်း ကျယ်ကျယ်ပြန့်ပြန့်သုံစွဲနေကြကြောင်း၊ အထူးသဖြင့် စစ်တွေမြို့ရှိ အထက်တန်းကျောင်းအချို့ရှိ ကျောင်းကွမ်းယာဆိုင်များတွင်လည်း အလွယ်တကူ ၀ယ်ယူ ရရှိနိုင်ကြောင်း၊ စစ်တွေမူးယစ်တပ်ဖွဲ့မှလည်း အစွန်အဖျားရောင်းဝယ်ဖေါက်ကားနေသူများထက် ဒိုင်ကြီးများကို ဖေါ်ထုတ် အရေးယူရန် လိုအပ်ကြောင်း စစ်တွေမြို့မှ ဆေးစွဲနေသူတစ်ဦး၏ ဇနီးဖြစ်သူက န်ိရဉ္စရာသို့ ရင်ဖွင့် ပြောကြားသည်။
(သတင်းအရင်းအမြစ်- နိရဉ္စရာသတင်းဌာန)

အဏ္ဍ၀ါမင်း (၉) ငါးဖမ်းသင်္ဘော ရခိုင်ပင်လယ်ပြင်တွင်နစ်မြုပ်၍ လူ ၁၇ ဦးပျောက်ဆုံးနေ

Fishing-boat-in-Arakan
ရခိုင်ပင်လယ်ပြင်တွင် ငါးဖမ်းတန်းကေးလှေတစ်စီးအားတွေ့ရစဉ်( ဓါတ်ပုံ- နိရဉ္စရာ)
ကျောက်ဖြူနှင့် ရမ်းဗြဲအကြား ပင်လယ်ပြင်တွင် အဏ္ဍာဝါမင်း (၉) ငါးဖမ်းသင်္ဘောနစ်မြုပ်သွားသဖြင့် လူ (၆) ဦးကို ကယ်တင်နိုင်ပြီး ကျန် (၁၇) ဦးမှာ ပျောက်ဆုံးနေကြောင်း သတင်း ရရှိသည်။
ယင်းသင်္ဘောသည် သြဂုတ်လ (၂) ရက်နေ့ နေ့လည်တွင် ကျောက်ဖြူအနီးရှိ မင်းပြင် အပြင်ဘက် ပင်လယ်ပြင်တွင် နစ်မြုပ်သွားခဲ့သည်ဟု တစ်ခြားငါးဖမ်း သင်္ဘောတစ်စီးဖြစ်သော (၄၁၉) မှ  တာဝန်ရှိသူ တစ်ဦးက နိရဉ္စရာသို့ ပြောကြားသည်။
“ သင်္ဘောနစ်တာက သြဂုတ်လ ၂ ရက်နေ့ နေ့လည်မှာ နစ်တယ်လို့ သိရပါတယ်။ သင်္ဘောပေါ်မှာ ပါလာတာ သင်္ဘောသား ၂၂ ဦးလို့ သူတို့က ပြောပါတယ်။ ကျွန်တော်တို့ ကယ်တင်နိုင်တာက (၆) ဦးပါခင်ဗျား။ ကျန်တဲ့ လူတွေရဲ့ ကံကြမ္မာကိုတော့ ကျွန်တော်တို့ မသိရသေးဘူး” ဟု ပြောသည်။
ပင်လယ်ပြင်တွင် ခုတ်မောင်းနေသော ( ၄၁၉) ငါးဖမ်း သင်္ဘောမှ ရေထဲမှ သင်္ဘောသား (၆) ဦးအား ကယ်ဆယ်နိုင်ခဲ့သည်ဟု သူက ဆက်ပြောပြီး ကျန်လူများကိုမူ ယခုအချိန်ထိ မတွေ့ရှိသေးဟု ဆိုသည်။
ကျောက်ဖြူ ငါးလုပ်ငန်း ဦးစီးဌာနကမူ သင်္ဘောပေါ်တွင် ငါးဖမ်းလုပ်သားများ အပါအ၀င် လူပေါင်း (၂၅) ဦးလိုက်ပါသွားသည်ဟု ပြောသည်။
“ ကျွန်တော်တို့ ကယ်တင်နိုင်တဲ့ သင်္ဘောသားတွေ ပြောပြတာကတော့ သင်္ဘောပေါ်မှာ လူပေါင်း ၂၂ ဦး ပါလာတယ်လို့ ပြောတယ်။ ပဲ့နင်းလည်း ပျောက်နေတယ်လို့ ပြောတယ်” ဟု ဆိုသည်။
အဏ္ဍ၀ါမင်း (၉) သင်္ဘောမှာ ပင်လယ်ထဲတွင် ငါးဖမ်း ပိုက်ဆွဲနေရင်း နစ်မြုပ်သွားခဲ့သည်ဟု သိရသည်။ အသက်မသေဘဲ လွှတ်မြောက်လာသူများအား ယခုအခါ ကျောက်ဖြူသို့ ပို့ဆောင်လိုက်ပြီဟု သိရသည်။
(သတင်းအရင်းအမြစ်- နိရဉ္စရာသတင်းဌာန)

မောင်တောမြို့နယ် မင်္ဂလာကြီးအလယ်တန်းကျောင်းဆောင် မီးလောင်

fire-maungdaw
ဇန်န၀ါရီလ ၂၈ ရက်နေ့က ဒုချီးရားတန်း အနောက်ရွာတွင် မီးလောင်နေစဉ်။ ( Photo- Information Department)
ရခိုင်ပြည်နယ်အနောက်ဘက်နယ်စပ် မောင်တောမြို့နယ် မင်္ဂလာကြီးရွာ အလယ်တန်းကျောင်းတွင် ကျောင်းဆောင်တစ်ခု ဇူလိူင်လ ၃၁ ရက်နေ့ ညဉ့်က မီးလောင်သွားခဲ့သည်ဟု သတင်းရရှိသည်။
မီးမှာ ရှို့မီးဖြစ်ဖို့ ဖြစ်နိုင်ခြေများသည်ဟု မောင်တောမြို့နယ် လက်ထောက်ပညာရေးမှူး ဦးသန်းလိူင်က ပြောသည်။
“ အဲဒီမီးလောင်တဲ့နေ့က မိုးလည်းရွာနေတယ်။ ဒီလို မိုးရွာနေတဲ့ အချိန်မှာ မီးလောင်တယ်ဆိုတော့ ရှို့မီးဖြစ်ဖို့များတယ်။ တစ်ခြား လောင်ဖို့ အကြောင်းမရှိဘူး” ဟု သူက ဆိုသည်။
၎င်းအလယ်တန်းကျောင်းမှာ မင်္ဂလာကြီးရွာတွင် တည်ရှိပြီး ကျောင်းသားကျောင်းသူ ၁၁၇၈ ဦးတက်ရောက်သင်ကြားနေသော ကျောင်းဖြစ်သည်။ ကျောင်းတွင် ညစောင့်လည်း မရှိကြောင်း သိရသည်။
“ အဓိက ဘင်္ဂလီကလေးတွေ စုစုပေါင်း ၁၁၇၈ စာသင်ကြားနေတဲ့ အလယ်တန်းကျောင်းပါ။ ကျောင်းဆောင် လေးဆောင်ရှိတဲ့ အနက်က အဆောင်နံပတ် (၃) လောင်သွားခဲ့တာ ဖြစ်ပါတယ်။ ကျောင်းက အလျား ပေ ၈၀၊ အနံ ပေ ၃၀နဲ့ အမြင့် ၁၂ ပေရှိပါတယ်။ အုတ်ဖေါင်ဒေးရှင်း သွပ်မိုးထရံကာဖြစ်ပါတယ်။ ဆုံးရှုံးမူက ကျပ် သိန်း ၉၀ ဖိုးခန့်ရှိပါတယ်” ဟု လက်ထောက်ပညာရေးမှူးကဆက်ဆိုသည်။
၎င်းနေ့က ယင်းကျောင်းဆောင်များအတွင်း ကျေးရွာသားအချို့က အိဒ်နေ့အပြီး ထမင်းချက် ပျော်ပွဲစားခဲ့ကြသော အထောက်အထားများတွေ့ရကြောင်း၊ မီးဖိုခွင်များအသုံးပြုခဲ့သော သဲလွန်စများကို ရရှိခဲ့ကြောင်း၊ အနီးအနားရှိ ကျေးရွာသားများက မီးလောင်နေသည်ကို ညနေ ၉ နာရီခန့်တွင် မြင်တွေ့ ခဲ့ရကြောင်း၊ သို့အတွက် နီးစပ်ရာ နယ်ခြားစောင့်တပ်ဖွဲ့ နယ်မြေ (၆) သို့ အကြောင်းကြားရာ လုံခြုံရေး တပ်ဖွဲ့ဝင်များ လိုက်ပါလာပြီး ကျေးရွာသားများနှင့် အတူ မီးငြိမ်းသတ်ခဲ့ကြောင်း၊ ညနေ ၁၀ နာရီကျော်တွင် မီးညွှန့်ကျိုးသွားခဲ့ကြောင်း သူရထားသမျှသတင်းကို သူက နိရဉ္စရာသို့ ပြောကြားသည်။
“ အဆောင်တစ်ဆောင်ဘဲ မီးလောင်တယ်ဆိုတာက ကျန်တဲ့သုံးဆောင်က သွပ်မိုး၊ အုတ်ထရံဆိုတော့ ချက်ချင်းလောင်ဖို့ မလွယ်ဘူးလေ။ ဒါကြောင့် ကျန်နေခဲ့တာပါ” ဟု ဆိုသည်။
ယခုအခါ ပြည်နယ်ပညာ ညွှန်ကြားရေးမှူးထံသို့ မောင်တောခရိုင် ပညာရေးမှူးမှ မင်္ဂလာကြီးရွာ အလယ်တန်းကျာင်း မီးလောင်မူနှင့် ပတ်သက်ပြီး သြဂုတ်စ်လ ၁ ရက်နေ့က စာရေးတိုင်ကြားခဲ့ပြီး မိတ္တူကို ညွှန်ကြားရေးမှူးချုပ် အမှတ်(၁) အခြေခံပညာ (ရန်ကုန်) အပါအ၀င် နယ်စပ် ကွပ်ကဲရေးမှူး၊ ခရိုင်နှင့် မြို့နယ် အုပ်ချုပ်ရေးမှူးများထံသို့ ပေးပို့ခဲ့သည်။
ခရိုင်၊ မြို့နယ်ပညာရေးမှူးနှင့် မင်္ဂလာကြီးကျောင်းအုပ်ဆရာကြီးတို့သည် သြဂတ်စ်လ ၁ ရက်နေ့က ၎င်းမီးလောင်ကျောင်းအား သွားရောက်ပြီး စစ်ဆေးခဲ့သည်ဟု ဆိုသည်။
မောင်တောမြို့နယ်ရဲတပ်မှူးမှ ကျောင်းဆောင်မီးလောင်သည်မှာ ဟုတ်မှန်ကြောင်း၊ သို့သော်လည်း ပေါ့ဆီမီးဟု နယ်ခြား စောင့်တပ်ဖွဲ့၏ အစီရင်ခံစာတွင် ဖေါ်ပြထားကြောင်း၊ ယခု မီးလောင်သော မင်္ဂလာကြီးရွာမှာ နယ်ခြား စောင့်တပ်ဖွဲ့ အပိုင်တွင်ရှိ၍ ဖြစ်စဉ် အသေးစိတ်ကို သူတို့သာ သိရှိမည် ဖြစ်ကြောင်း၊ မောင်တော မြို့နယ် ရဲတပ်ဖွဲ့အနေဖြင့် အသေးစိတ် မသိနိုင်ပါကြောင်း ပြောကြားသည်။
ယခုအချိန်ထိ ဖမ်းဆီးအရေးယူခြင်းများ မရှိသေးသော်လည်း စုံစမ်းစစ်ဆေးမူများ ဆက်လက်ပြုလုပ်နေသည်ဟု သိရသည်။
ယခုမီးလောင်မူသည် ယခုနှစ် ဇန္န၀ါရီလ ၂၈ ရက်နေ့က ပြသနာ အကြီးအကျယ် ဖြစ်ပွားခဲ့ရာ ဒုချီးရားတန်းဘင်္ဂလီ (အနောက်) ရွာတွင် မီးလောင်မူ ဖြစ်ပွားပြီးနောက် မောင်တောမြို့နယ်တွင် ပထမဆုံးအကြိမ်  ဖြစ်သည်။
(သတင်းအရင်းအမြစ်- နိရဉ္စရာသတင်းဌာန)

နိုင်ငံသားဖြစ်ခွင့် လျှောက်ထားသည့် ဘင်္ဂါလီ တစ်ထောင်ကျော် ယနေ့ လူတွေ့စစ်ဆေးမည်


စစ်တွေမြို့အနီး မန်စီကျေးရွာရှိ ဘင်္ဂါလီဒုက္ခသည်စခန်းသို့ ပြန်လာနေသည့် ဘင်္ဂါလီမိသားစုတစ်စုကို တွေ့ရစဉ် (ဓာတ်ပုံ − စိုးသန်းဝင်း/အေအက်ဖ်ပီ)
မြန်မာနိုင်ငံသားဖြစ်ခွင့် လျှောက်ထားသည့် ဘင်္ဂါလီတစ် ထောင်ကျော်အား ယနေ့ လူတွေ့ စစ်ဆေးမေးမြန်းခြင်းကို မြို့နယ် အဆင့် ဆောင်ရွက်သွားမည်ဖြစ် ကြောင်း လူဝင်မှုကြီးကြပ်ရေးနှင့် ပြည်သူ့အင်အား ၀န်ကြီးဌာနမှ သတင်းရရှိသည်။
လူတွေ့ စစ်ဆေးမေးမြန်း ခြင်းကို မြို့နယ်အဆင့် ဆောင် ရွက်ရာ၌ မြို့နယ်အထွေထွေ အုပ်ချုပ်ရေးမှူးက ဥက္ကဋ္ဌအဖြစ် ဆောင်ရွက်မည်ဖြစ်သည်။ အဆို ပါအဖွဲ့တွင် မြန်မာနိုင်ငံရဲတပ်ဖွဲ့၊ ဥပဒေပညာရှင်များ၊ မြို့နယ် လ.၀.က၊ ရခိုင်တိုင်းရင်းသား ကိုယ်စားလှယ်နှစ်ဦး၊ ဘင်္ဂါလီ ကိုယ်စားလှယ်တစ်ဦး ပါဝင်မည် ဖြစ်ပြီး  အချက်အလက်များကို လူတွေ့စစ်ဆေးသွားမည်ဖြစ်ကြောင်း လ၀က အကြီးတန်းတာဝန်ရှိသူတစ် ဦးက ပြောသည်။
လျှောက်ထားသူများ နိုင်ငံ သားဖြစ်ခွင့်ကို မြို့နယ်အဆင့် စိစစ်ပြီးပါက ခရိုင်အဆင့်၊ ပြည် နယ်အဆင့်နှင့် လ၀က ရုံးချုပ် က ပြန်လည်စစ်ဆေးပြီး အစိုးရ အဖွဲ့များ ပါဝင်သည့် ဗဟိုအဆင့် အဖွဲ့က စိစစ်ခွင့်ပြုသွားမည်ဖြစ် သည်။
‘‘ရခိုင်၊ ဗမာစကားမတတ်၊ ယဉ်ကျေးမှုဘာမှမသိတဲ့သူ၊ အဲ ဒါအပြင် ဘင်္ဂါလီလို့ မထည့်တဲ့သူကို နဂိုကတည်းက နိုင်ငံသားလျှောက်ခွင့် လက်မခံထားပါဘူး’’ ဟု လူဝင်မှုကြီးကြပ်ရေး ဦးစီးဌာနမှ အကြီးတန်း တာဝန်ရှိသူတစ်ဦးက ပြောသည်။
၁၉၈၂ ဥပဒေအရ မြန်မာ နိုင်ငံသားဖြစ်ခွင့် လျှောက်ထားသူ များကို ဇွန်လ ၁၅ ရက်မှစတင်ပြီး လျှောက်လွှာများ လက်ခံခဲ့ရာ ယခင်လျှောက်ထားသူ ဘင်္ဂါလီ လူဦးရေ ၃၆၈ ရှိရာမှ ၁၀၉၄ ခန့် တိုးလာခြင်းဖြစ်သည်။
၁၉၈၂ နိုင်ငံသား ဖြစ်ခွင့် ဥပဒေအရ မြေပုံမြို့နယ်တွင် ဇွန် လ ၁၅ ရက်မှစ၍ ပိုင်းလော့ Pilot ဧရိယာအဖြစ် သတ်မှတ်ပြီး ဘင်္ဂါ လီလူမျိုးများကို နိုင်ငံသားစိစစ် ရေး  ဆောင်ရွက်ခဲ့ခြင်း  ဖြစ်သည်။
ပြည်လုံးကျွတ် လူဦးရေနှင့် အိမ်အကြောင်းအရာ သန်းခေါင် စာရင်းကောက်ယူရာတွင် ရခိုင် ပြည်နယ်အတွင်းရှိ ဘင်္ဂါလီများ က ရိုဟင်ဂျာလူမျိုးအမည် ထည့် သွင်းမှ ကောက်ခံမည်ဟု တောင်း ဆိုခြင်းကြောင့် ၎င်းတို့ နေထိုင် သည့် နေရာများတွင် အပြည့်အ၀ ကောက်ယူခွင့် မရှိခဲ့ပေ။
ထို့အပြင် ၂၀၁၃ ခုနှစ် ဧပြီ လတွင် စစ်တွေမြို့ အတွင်းရှိ ဘင်္ဂါလီများကို လူဦးရေ စာရင်း ကောက်ယူရေးလုပ်ငန်း (ဆွဲတင် စစ်)ကို အကောင်အထည်ဖော်ခဲ့ သော်လည်း ဘင်္ဂါလီလူမျိုးများ အကြမ်းဖက်ကန့်ကွက်မှုကြောင့် လုပ်ငန်း ရပ်ဆိုင်းခဲ့ရသည်။