Friday, September 27, 2013

ရခိုင်မြောက်ပိုင်းတွင် UNESCO က ငြိမ်းချမ်းရေးဆိုင်ရာ ပညာသင်ကြားမှုများ ပြုလုပ်ရန် သဘောတူညီချက်ရ

Ex3-23-9
ပဋိပက္ခများ ဖြစ်ပွားခဲ့ရာ ရခိုင်ပြည်နယ် မြောက်ပိုင်းရှိ စာသင်ကျောင်းခန်း တစ်ခုကို တွေ့ရစဉ်
မြန်မာနိုင်ငံ၊ ရခိုင်ပြည်နယ် မြောက်ပိုင်းတွင် ကုလသမဂ္ဂ ပညာရေး၊ သိပံ္ပနှင့် ယဉ်ကျေးမှု အဖွဲ့အစည်း (UNESCO) က ငြိမ်းချမ်းရေးဆိုင်ရာ ပညာသင်ကြားမှုများ ပြုလုပ်ရန် မြန်မာအစိုးရက သဘောတူလိုက်ကြောင်း သိရသည်။
ပဋိပက္ခများ စတင်ဖြစ်ပွားရာ ရခိုင်ပြည်နယ် မြောက်ပိုင်းရှိ လူမှုအသိုင်းအ၀ိုင်း အချင်းချင်း မတူညီသော ယဉ်ကျေးမှုများကို လေးစားမှု တိုးပွားလာစေရန် ရည်ရွယ်ကာ (UNESCO) ၏ ငြိမ်းချမ်းရေးဆိုင်ရာ ပညာသင်ကြားမှု စီမံကိန်းကို ခွင့်ပြုလိုက်ခြင်းဖြစ်ကြောင်း ဆင်ဟွာသတင်းဌာန၏ ဖော်ပြချက်အရ သိရသည်။
အဆိုပါ စီမံကိန်းကို (UNESCO) နှင့် မြန်မာအစိုးရတို့ ပူးပေါင်း၍ ဘူးသီးတောင်၊ မောင်တော၊ ရသေ့တောင် စသည့်သုံးမြို့နယ်တွင် ဘယ်လ်ဂျီယမ်နိုင်ငံမှ ပေးအပ်သည့် ရန်ပုံငွေဖြင့် ဖော်ဆောင်သွားမည် ဖြစ်သည်။
အဆိုပါ စီမံကိန်းအရ ပဋိပက္ခများကြောင့် ထိခိုက်ခံစားခဲ့ရသော ကျောင်းပေါင်း ၄၀ မှ ဆရာ၊ ဆရာမပေါင်း ၃၅၀ ကို ငြိမ်းချမ်းရေးပညာပေး သင်ကြားမှုများအတွက် လေ့ကျင့်မှုများကို ပြုလုပ်သွားမည်ဖြစ်ပြီး ကျောင်းသားပေါင်း တစ်သောင်းအတွက် အကျိုးဖြစ်ထွန်း စေမည်ဖြစ်ကြောင်း သိရသည်။
ထို့ပြင် စီမံကိန်းတွင် မိဘ၊ ဆရာ အသင်းပေါင်း ၄၀ ကို ပြန်လည်ဖွဲ့စည်းပြီး လူထုအခြေပြု သင်ကြားမှုစင်တာ သုံးခုကို တည်ထောင်သွားမည်ဟု သိရသည်။
ရခိုင်ပြည်နယ်အတွင်း ဖြစ်ပွားခဲ့သော ပဋိပက္ခ ဖြစ်စဉ်များကြောင့် ကျောင်းပေါင်းရာနှင့်ချီ ထိခိုက်ပျက်ဆီးခဲ့ပြီး ကျောင်းသားပေါင်း သောင်းနှင့်ချီ ထိခိုက်မှုရှိခဲ့ရာ အစိုးရနှင့် နိုင်ငံတကာ အသိုင်းအ၀ိုင်းက အဆိုပါ ပြဿနာအတွက် ငြိမ်းချမ်းရေးပညာပေး သင်ကြားမှု အစီအစဉ်များကို ပြုလုပ်ရန်မှာ လူမှုအသိုင်းအ၀ိုင်း နှစ်ခုအကြား တင်းမာမှုများကို လျော့ကျစေရန် ဦးစားပေးရမည့် အကြောင်းရင်း တစ်ရပ်ဖြစ်သည်ဟု သုံးသပ်ကြသည်။
စီမံကိန်းသည် ကျောင်းဆရာများ၊ ကျောင်းသားများနှင့် မိဘများ၏ အရည်အသွေး တိုးမြင့်စေပြီး ပြဿနာဖြေရှင်းမှုတွင် အားလုံးပါဝင်သော ဖြေရှင်းမှု ဖြစ်လာစေရန် ရည်ရွယ်ထားကြောင်း သိရသည်။
(သတင်းအရင်းအမြစ်- Eleven Media Group)
Post a Comment