Thursday, December 26, 2013

မြောက်ဦးမှ နိုင်ငံတကာ အန်ဂျီအိုများ ထွက်သွားရန် ဒုတိယ အကြိမ်တောင်းဆို

Mrauk-U-by-Narinjara
ရခိုင်ပြည်နယ် မြောက်ဦးမြို့တွင်းအခြေစိုက်လှုပ်ရှားနေသည့် နိုင်ငံတကာ အန်ဂျီအိုအဖွဲ့များကို ဒေသအတွင်းမှ ဒီဇင်ဘာလ ၂၄ ရက်နေ့ နောက်ဆုံးထား ထွက်ခွာသွားရန် ဒုတိယ အကြိမ်မြောက် မြောက်ဦးမြို့ ဒေသခံများက တောင်းဆို လိုက်သည်။
အဆိုပါ တောင်းဆိုမှုကို ယမန်နေ့က ပြုလုပ်သည့် အရေးအပေါ် အစည်းအဝေးမှ တောင်းဆိုလိုက် ခြင်းဖြစ်ကြောင်း  မြောက်ဦး လူမှုကွန်ယက်အဖွဲ့ ဥက္ကဌဖြစ်သူ နှင်းထွန်းတိုးက ပြောသည်။
“ကျွန်တော်တို့ ပထမ တစ်ခေါက်အစည်းဝေးလုပ်ပြီး သူတို့ကို ဒီလ၂၀ ရက်နေ့ထွက်သွားကြဖို့ တောင်းဆို ထားပါတယ်။ ဒါပေမဲ့ သူတို့ထွက်သွားဖို့ အစီအစဉ်မရှိတဲ့အတွက် မနေ့က အရေးအပေါ်အစည်းအဝေးခေါ်ပြီး ဒီလ ၂၄ ရက်နေ့ နောက်ဆုံးထား ထွက်သွားဖို့တောင်းဆိုတယ်။ သူတို့ တည်းနေတဲ့ ဟိုတယ်ပိုင်ရှင်တွေကို ခေါ်ပြီးလည်း သတိပေးပါတယ်” ဟု ယင်းက ဆိုသည်။
ယခုလ ၁၂ ရက်နေ့ကလည်း မြောက်မြို့ဒေသခံများက အစည်းအဝေးတရပ်ပြုလုပ်ပြီး ကြေငြာချက် ထုတ်ကာ ဒီဇင်ဘာလ ၂၀ ရက်နေ့တွင် နိုင်ငံတကာ အန်ဂျီအိုများ မြောက်ဦးဒေသမှ ထွက်သွားရန် တောင်းဆိုခဲ့ကြသည်။
“သူတို့ကို ထွက်သွားဖို့တောင်းဆိုရတာက သူတို့ ကူညီတဲ့နေရာမှာ ရခိုင်တွေကိုမကူညီဘူး။ ဘင်္ဂလီတွေကို ဘဲကူညီနေတယ်။ ပြီးတော့ ကျွန်တော်တို့ သူတို့နဲ့ပထမ အကြိမ် အစည်းအဝေးမှာ အချက် ၉ ချက်ကို တောင်းဆိုထားတယ်။ MSF နဲ့ AZG တို့က အစည်းအဝေးတက်လာပြီး ကျွန်တော်တို့ တောင်းဆိုချက်တွေကို အထက်ကို တင်ပြရမယ်၊ စဉ်းစားမယ်ဆိုပြီး လုံးဝ အကြောင်း ပြန်လာတာမရှိဘူး။ အစည်းဝေးတွေ ခေါ်ရင်လည်း သူတို့ မလာတော့ဘူး။ လုပ်ငန်းတွေကို ပို့ပြီးတောင် လုပ်မယ်လို့သိနေရတယ်” ဟု ၎င်းက ပြောသည်။
မြောက်ဦးမြို့ခံများ တောင်းဆိုသည့် အချက် ၉ ချက်တွင် အကူအညီပေးသည့်နေရာတွင် စစ်ဆေးခွင့်၊ အကူညီ ပေးရာတွင် မြို့ခံကိုယ်စားလှယ်များမှ အတူလိုက်ပါပြီး ပူးပေါင်းဆောင်ရွက်ခွင့်နှင့် မြောက်ဦးနယ်မှ အပ တခြား မြို့နယ်များသို့ နယ်ကျော် မသွားရောက်ရန်စသည်အချက်များ ပါဝင်ကြောင်း သိရသည်။
မြောက်ဦးမြို့တွင် နိုင်ငံရေးပါတီများနှင့် တခြားလူမှုအဖွဲ့အစည်းပေါင်းစုံမှ တဖွဲ့လျှင် ၂ ဦးနှုန်းဖြင့် နိုင်ငံတကာ အန်ဂျီအိုများနှင့် ပူးပေါင်းဆောင်ရွက်ရန် အဖွဲ့ဝင် ၄၈ ဦးဖြင့် သီးခြား ကော်မီတီ တစ်ရပ် ဖွဲ့ထားသော်လည်း နိုင်ငံတကာ အန်ဂျီအိုများမှ ပူးပေါင်း ဆောင်ရွက်မှုကို လက်ခံလိုမူ မရှိကြောင်း သူက ဆက်ပြောသည်။
ဒီဇင်ဘာလ ၂၄ ရက်နေ့တွင် အန်ဂျီအိုအဖွဲ့အစည်းများအနေဖြင့် မြောက်ဦးမြို့မှ ထွက်ခွာမှုမရှိလျှင် မြို့နယ် တခုလုံးအတိုင်းအတာဖြင့် ဆန္ဒပြကန့်ကွက်မှုများပြုလုပ်မည်ဖြစ်ပြီး သူတို့တည်းခိုနေသည့် တည်းခိုခန်းများ ကိုလည်း မြို့ခံများက ပြင်းထန်စွာ ရာဇသံပေးသွားမည်ဖြစ်ကြောင်း သူက ပြောဆို သွားသည်။
မြောက်ဦးတွင်အခြေစိုက်သည့် နိုင်ငံခြား အန်ဂျီအို အဖွဲ့ဝင်များသည်  မင်းပြားနှင့် ကျောက်တော် မြို့နယ်များ အထိ နယ်ကျော် သွားရောက်လှုပ်ရှားနေသည့်အတွက် မင်းပြား၊ ကျောက်တော် ဒေသခံ များကလည်း မြောက်ဦးမြို့ ခံများကို ဖိအားပေးမှုများခံနေရကြောင်း ကိုနှင်းထွန်းတိုးက ပြောဆိုသည်။
နိရဉ္စရာ အနေဖြင့် မြောက်ဦးမြို့ပေါ်တွင် လူပ်ရှားဆောင်ရွက်နေသော နိုင်ငံတကာ အန်ဂျီအိုများနှင့် ဆက်သွယ်၍ မရရှိခဲ့သဖြင့် သူတို့အဖွဲ့အစည်းများ၏ သဘောထားများကို မေးမြန်းနိုင်ခြင်း မရှိခဲ့ပါ။
အလားတူ အောက်တိုဘာလ အစောပိုင်းကလည်း ပေါက်တောမြို့အတွင်းရှိ နိုင်ငံတကာ အန်ဂျီအို အဖွဲ့အစည်း များမှာ ဘက်လိုက် မှုရှိသည့်ဟုဆိုကာ မြို့ခံများက ကန့်ကွက်သည့်အတွက် နိုင်ငံတကာ အန်ဂျီအိုအဖွဲ့များသည်  ပေါက်တော မြို့မှ ထွက်ခွာသွားခဲ့ရသည်။
(သတင်းအရင်းအမြစ်- နိရဉ္စရာသတင်းဌာန)

No comments: