Thursday, September 11, 2014

(၇၅) နှစ်မြောက် ဆရာတော်ဦးဥတ္တမနေ့ အခမ်းအနားတွင် အချက်၃ချက် တောင်းဆို

ရန်ကုန်မြို့ရှိ MCC တွင်ကျင်းပသည့် (၇၅) နှစ်မြောက် ဆရာတော်ဦးဥတ္တမနေ့ အခမ်းအနားသို့ တက်ရောက်လာသူများကို တွေ့ရစဉ်။

စက်တင်ဘာ ၉ရက်ကစစ်တွေမြို့တွင်ကျင်းပသည့်(၇၅) နှစ်မြောက်ဆရာတော်ဦးဥတ္တမနေ့ အောက်မေ့ဖွယ် အခမ်းအနားတွင် ရခိုင်ပြည်သူများကအချက်၃ချက်ကို တောင်းဆိုလိုက်ကြသည်။
စစ်တွေမြို့ရှိ ဦးဥတ္တမပန်းခြံရုပ်တုရှေ့တွင်တောင်းဆိုလိုက်သည့်တောင်းဆိုချက်၃ချက်မှာ ဆရာတော်ဦးဥတ္တမနေ့အား ရုံးပိတ်ရက်နှင့်ကျောင်းပိတ်ရက်အဖြစ်သတ်မှတ်ပေးရန်၊ ရန်ကုန်မြို့ရှိ ကန်တော်မင်ပန်းခြံအားဦးဥတ္တမပန်းခြံအဖြစ် ပြန်လည်သတ်မှတ်ပေးရန်နှင့် ဆရာတော်ဦးဥတ္တမ၏
အတ္ထုပတ္တိအား ကျောင်းသုံးစာအုပ်များတွင် ပြန်လည်ပြဌာန်းသင်ကြားခွင့်ပြုရန်
တို့ဖြစ်သည်။
“ဆရာတော် ဦးဥတ္တမနဲ့ ပတ်သက်ပြီး တောင်းဆိုချက်တွေကို ကျွန်တော်တို့
သဘောတူပါတယ်။ ဆရာတော် ဦးဥတ္တမသည် ရခိုင်တွေအတွက်ဘဲ ရပ်တည်ပြီး လုပ်ခဲ့တာ
မဟုတ်ဘူး။ ဆရာတော်သည် မြန်မာ့လွတ်လပ်ရေး ရဖို့အတွက် မြန်မာတစ်ပြည်လုံးကို
ကိုယ်စားပြုပြီး ဆောင်ရွက်ခဲ့တဲ့ ပုဂ္ဂိုလ်ဖြစ်တယ်။ ဒါကြောင့်ဒီလိုပွဲမျိုးကို ရခိုင်ပြည်နယ်နဲ့ ရန်ကုန်မှာဘဲ မဟုတ်ဘဲ ဆရာတော်ရဲ့ဂုဏ်ကျေးဇူးကို သိတတ်တဲ့ လူတိုင်း လုပ်ဆောင်သင့်တယ်” ဟု စစ်တွေမြို့မှ
ဦးကျော်ဧ ကပြောသည်။
စစ်တွေမြို့တွင် ကျင်းပသည့် (၇၅) နှစ်မြောက် ဆရာတော်ဦးဥတ္တမနေ့အောက်မေ့ဖွယ် အခမ်းအနားတွင် ပြည်နယ်ဝန်ကြီးချုပ် ဦးမောင်မောင်အုန်းနှင့်တာဝန်ရှိသူတို့က ပန်းခွေများချကာ ဂါရ၀ပြုကြသည်။ ထို့နောက် စစ်တွေမြို့ရှိနိုင်ငံရေးပါတီများ၊ လူမှု ကွန်ယက်များ၊ အသင်းအဖွဲ့များ နှင့် ဒေသခံပြည်သူများမှ ဦးဥတ္တမပန်းခြံရှိ ရုပ်တုရှေ့တွင် ပန်းခွေများနှင့် ဂါရ၀
ပြုခဲ့ကြသည်။
ဆရာတော်ဦးဥတ္တမနေ့ အောက်မေ့ဖွယ် အခမ်းအနားကို ရန်ကုန်မြို့ရှိ MCC
(မြန်မာကွန်ဗင်းရှင်းစင်တာ) တွင်လည်း ကျင်းပခဲ့သည်။ ဆရာတော်ဦးဥတ္တမနေ့ အခမ်းအနားများကို ယခင်ကစစ်အစိုးရ လက်ထက်တွင် ကျင်းပခွင့် ပိတ်ပင်ခံခဲ့ရသည်။
ဆရာတော်သည် အင်္ဂလိပ်နယ်ချဲ့ ဆန့်ကျင်ရေး ၀ံသာနု တရားများနယ်လှည့်ဟောပြောခဲ့သောကြောင့် အင်္ဂလိပ်နယ်ချဲ့၏ ဖမ်းဆီးခြင်းကိုခံခဲ့ရသည့် ပထမဆုံး နိုင်ငံရေးအကျဉ်းသား သံဃာတော် တစ်ပါးဖြစ်သည်။
ဆရာတော်ဦးဥတ္တမသည် ၁၉၃၉ ခုနှစ် စက်တင်ဘာ ၉ရက်တွင် ဆီးချိုရောဂါဖြင့်ပျံလွန်တော်မူခဲ့ပြီး ဆရာတော်ကွယ်လွန်သည့်နေ့အား ဆရာတော်ဦးဥတ္တမနေ့အဖြစ်ပြည်တွင်းပြည်ပတွင် အောက်မေ့ဖွယ် အခမ်းအနားများ ကျင်းပကြခြင်းဖြစ်သည်။
(ဤသတင်းအား Rakhine News Agency မှ ကူးယူဖော်ပြပါသည်)
Post a Comment