ရခိုင်ပြည်နယ်အတွင်းရှိ ဘင်္ဂါလီဒုက္ခသည်များ / ဓာတ်ပုံ − ဂျေမောင်မောင်(အမရပူရ)
ဘင်္ဂါလီတစ်ဦးလျှင် ကျပ် ၁၃ သိန်းဖြင့် စစ်တွေမှ ရန်ကုန်မြို့သို့ ကားဖြင့်ပို့ရန် ကြိုးစားရာတွင် ပါဝင်ပတ်သက်သည့် ဘင်္ဂါလီများကို ဖမ်းဆီးစစ်ဆေးနေကြောင်း နေပြည်တော် မှုခင်းရဲတပ်ဖွဲ့မှ သတင်းရရှိသည်။
အမ်းမြို့ စစ်ဆေးရေးဂိတ်တွင် အိမ်စီးကားတစ်စီးပေါ်မှ မသင်္ကာဖွယ် ဘင်္ဂါလီအမျိုးသား လေးဦးကို စစ်တပ်၊ ရဲတပ်ဖွဲ့နှင့် လဝက ပူးပေါင်းထားသည့် စစ် ဆေးရေးအဖွဲ့က ဒီဇင်ဘာ ၁၇ ရက်တွင် ဖမ်းဆီးခဲ့ခြင်းဖြစ်သည်။ ဖမ်းဆီးခဲ့သူ လေးဦးအနက် နှစ်ဦးမှာ ဘင်္ဂါလီများကို ငွေကြေးယူ၍ ရန်ကုန်သို့ ပို့မည့်သူများဖြစ်ပြီး ကျန်နှစ်ဦးမှာ စစ်တွေ သက်ကယ်ပြင် ဘင်္ဂါလီဒုက္ခသည်စခန်းမှဖြစ်ကြောင်း အမ်းမြို့နယ် ရဲစခန်းမှူး ဒုရဲမှူးသောင်းလွင်က ပြောသည်။
‘‘လူကုန်ကူးတဲ့သူ နှစ်ယောက်က မြိတ်မြို့မှာနေတဲ့သူတွေ။ စစ်တွေက သက်ကယ်ပြင် ဘင်္ဂါလီဒုက္ခသည်စခန်းက လူနှစ်ဦးကို ငွေယူပြီး ပို့ဖို့လုပ်တာမှာ ဖမ်းနိုင်ခဲ့တာ။ အသေးစိတ်စစ်ဆေးနေတုန်းပါ’’ဟု ဒုရဲမှူး သောင်းလွင်က ပြောသည်။
ယင်းအမှုတွင် ဒုက္ခသည် စခန်းမှ ဘင်္ဂါလီနှစ်ဦး ရန်ကုန်သို့ရောက်လာပါက လက်ခံယူမည့် ပွဲစားတစ်ဦးကို မင်္ဂလာဒုံမြို့နယ်တွင် ထပ်မံဖမ်းဆီးနိုင်ခဲ့သောကြောင့် စုစုပေါင်းငါးဦးကို ရဲတပ်ဖွဲ့က စစ်ဆေးနေခြင်းဖြစ်သည်။ ၎င်းတို့ကို အထောက်အထားမရှိသူများအား တရားမဝင် သယ်ဆောင်သည့် ပြစ်မှုပုဒ်မ ၃၆၇ ဖြင့် အမှုဖွင့်ထားကြောင်း ဒုရဲမှူးသောင်းလွင်ကပြောသည်။
ရခိုင်ပြည်နယ်မှ ဘင်္ဂါလီအချို့ကို အခကြေးငွေယူကာ ရန်ကုန်မြို့သို့ခေါ်ဆောင်နေသည့် လူပွဲစားဂိုဏ်းရှိနေပြီး ပြီးခဲ့သည့်ဇွန်လကလည်း ဘင်္ဂါလီ ၁၉ ဦးကို ငွေယူ၍ ခေါ်ဆောင်ပေးသူများနှင့်အတူ အမ်းမြို့စစ်ဆေးရေးဂိတ်တွင် ဖမ်းဆီးနိုင်ခဲ့သည်။ ၂၀၁၄ခုနှစ်အတွင်း ရခိုင်ပြည်နယ်မှ ရန်ကုန်မြို့သို့ ပို့ဆောင်ရန်ကြိုးစားသည့် ဘင်္ဂါလီ ၄၀ ဦးနီးပါးကို အမ်းမြို့စစ်ဆေးရေးဂိတ်တွင် ဖမ်းဆီးနိုင်ခဲ့ကြောင်း အမ်းမြို့နယ် ရဲတပ်ဖွဲ့မှူးရုံးမှ သတင်းရရှိသည်။
(သတင်းအရင်းအမြစ်- 7 Days News)
No comments:
Post a Comment