Friday, December 19, 2014

ဆိုင်ကယ်ခိုးသူ ဆယ်ကျော်သက်လူငယ် နှစ်ဦး မြောက်ဦးတွင်ဖမ်းမိ


Motor bike in Sittweဆိုင်ကယ်နှင့် လက်ကိုင်ဖုန်းများခိုးယူလာသည့် ဆယ်ကျော်သက် လူငယ်နှစ်ဦးကို မြောက်ဦးမြို့တွင် ယမန်နေ့က ဖမ်းဆီးရမိခဲ့ကြောင်း မြောက်ဦးရဲတပ်ဖွဲ့မှူးရုံးမှ ရဲမှူးမြင့်သောင်းက အတည်ပြုပြောသည်။
“လှည့်ကင်းပတ်တဲ့အခါ မသင်္ကာလို့စစ်ဆေးရာကနေ အခုလိုဖမ်းမိလိုက်တာပါ”ဟု ရဲမှူးမြင့်သောင်းက နိရဉ္စရာသို့ ပြောကြားသည်။
ယခုဖမ်းမိခဲ့သည့်ဆယ်ကျော်သက်နှစ်ဦးမှာ ပုဏ္ဏားကျွန်းမြို့နယ်၊ ယိုးငူကျေးရွာမှ စိုးနိုင် (၁၆ နှစ်)နှင့် မောင်မောင်ထွန်း (၁၅ နှစ်) တို့ဖြစ်ပြီး ယင်းတို့နှစ်ဦးကို ဒီဇင်ဘာလ ၁၆ ရက်နေ့၊ နံနက် ၄ နာရီ ခန့်က မြောက်ဦးမြို့၊ ကံလှရပ်ကွင်းအတွင်းရှိ ကံလှတံတားပေါ်တွင် ဆိုင်ကယ်တစ်စီးအပါအဝင် လက်ကိုင်မိုဘိုင်းဖုန်း ၃ လုံးတို့ နှင့်အတူ ဖမ်းဆီးရမိခဲ့ခြင်းဖြစ်သည်ဟု မြောက်ဦးမြို့မရဲစခန်းမှ ရဲအုပ်ကျော်စိုးက ထပ်မံ အတည်ပြု ပြောဆိုသည်။
“ဆိုင်ကယ်နဲ့ ဟန်းဆတ်တွေကို သူတို့ ပုဏ္ဏားကျွန်းကနေခိုးလာတာပါ” ဟု ယင်းက ဆက်ပြောသည်။
ဖမ်းဆီးရမိသူများနှင့်ပါရှိသော ဆိုင်ကယ်မှာ Lourjia အမျိုးအစား(အနက်ရောင်ပေါ်တွင် အပြာစတေ ကာကပ်)ဖြစ်ပြီး နံပါတ်မှာ ၃၃ယ/၈၂၁၄၇ ဖြစ်သည်ဟု ဆိုသည်။
အလားတူ လက်ကိုင်ဖုန်း ၃ လုံးမှာ Hello အမျိုးအစား ၁ လုံး၊ HTC  အမျိုးအစား ၁ လုံးနှင့် HUAWEI အမျိုးအစား ၁ လုံးတို့ဖြစ်ကြောင်း သိရသည်။
“ဟန်းဆတ်တွေမှာ Sim Card တွေတော့ မပါဘူး။ Sim Card တွေကို ဖျက်ပစ်ခဲ့တာဖြစ်နိုင်တယ်”ဟု ရဲအုပ်ကျော်စိုးက သုံးသပ်ပြောသည်။
ဖမ်းဆီးရမိသူနှစ်ဦးကို လောလောဆယ် မြောက်ဦးမြို့မရဲစခန်းတွင် အမှုဖွင့် ထိန်းသိမ်းထားသော်လည်း သူတို့နှစ်ဦးမှာ ပုဏ္ဏားကျွန်းမြို့နယ်မှဖြစ်သည့်အတွက် ပုဏ္ဏားကျွန်းမြို့နယ်သို့အမှုလွှဲပြောင်းပေးနိုင်ရန် စီစဉ်နေ ကြောင်း မြောက်ဦးမြို့မရဲစခန်းမှ ပြောသည်။
(သတင်းအရင်းအမြစ်- နိရဉ္စရာသတင်းဌာန)
Post a Comment