Friday, July 4, 2014

မိုးကြီးလျှင် စစ်တွေမှ လမ်းအများအပြား ရေမြုပ်ခြင်းမှာ စည်ပင်နှင့်သက်ဆိုင်သည်ဟုဆို

မိုးကြီးသည်နှင့် ရေမြုပ်နေသော စစ်တွေမှ လမ်းများ (ဓါတ်ပုံ- နိရဉ္စရာ)
မိုးကြီးသည်နှင့် ရေမြုပ်နေသော စစ်တွေမှ လမ်းများ (ဓါတ်ပုံ- နိရဉ္စရာ)
ရခိုင်ပြည်နယ် မြို့တော် စစ်တွေတွင် မိုးကြီးတိုင်း လမ်းအချို့ ရေမြုပ်ခြင်းမှာ စစ်တွေ မြို့နယ် စည်ပင်မှ လမ်းဘေးရှိရေမြောင်းများကို မရှင်းလင်းဘဲ ပစ်ပယ်ထား၍ ဖြစ်ကြောင်း စစ်တွေ ဒေသခံများက ပြောသည်။
လွန်ခဲ့သောနေ့ကလည်း မိုးစရွာသည်နှင့် လမ်းများမှာ ရေမြုပ်သွားပြီး ခရီးသွားပြည်သူများကို အခက်အခဲ ဖြစ်ပေါ်စေခဲ့သည်ဟု ဆိုသည်။
“ မိုးရွာတာနဲ့ လမ်းတွေမှာ ရေပြည့်ပြီး အိမ်တွေကို လျှံဝင်လာတော့တာပါဘဲ။ အခု အဲဒီ ဒုက္ခ တစ်ခုကို ကျနော်တို့လမ်းကလူတွေ နေ့တိုင်း ခံစားနေကြရပါတယ်။ လမ်းသွား လမ်းလာတွေအတွက်လည်း ဒုက္ခပါဘဲ။ အထူးသဖြင့် ဆိုင်ကယ်စီးတဲ့သူတွေက ရေပြည့်နေတဲ့ လမ်းတွေကို ဖြတ်မောင်းရတာ အထူး အန္တရာယ်များပါတယ်။ စစ်တွေကလမ်းတွေမှာ နဂိုကမှ ချိုင့်ခွက်ကြီးတွေနဲ့ဆိုတော့ ဆိုင်ကယ်မောင်းရတာ အထူး သတိထားရပါတယ်” ဟု ငပိန်လမ်းတွင် နေထိုင်သူ တစ်ဦးကဆိုသည်။
မိုးရွာတိုင်း ရေမြုပ်လေ့ရှိနေသာ လမ်းများမှာ ရပ်ကွက်တိုင်းလိုလိုတွင် ဖြစ်ကြောင်း ထိုအထဲတွင် ဦးဥတ္တမလမ်း၊ ငပိန်လမ်း၊ ကုန်သည်လမ်း၊ မင်းဘာကြီးဈေးချေအနီး၊ ဘီလူးမ တံတားအနီးရှိ မိဇံရပ်ကွက်နှင့် စစ်တွေမြို့၏ အဓိက အချက်အချာကနေရာများဖြစ်ကြသော ကျေးပင်ကြီးနှင့် အိုးတန်းရပ်ကွက်မှ လမ်းအချို့ ပါဝင်သည်ဟု သိရသည်။
စစ်တွေမြို့ ရူပရပ်ကွက်တွင် ဆောက်လုပ်သော မြန်မာ့ ရှေ့ဆောင်ဘဏ်နှင့် ရိုးမဘဏ်တို့ကို တည်ဆောက်စဉ်က ဆောက်လုပ်ရေး လုပ်ငန်းခွင်မှ ထွက်လာသော ကျောက်ခဲ အကျိုးအပိုင်းများ၊ သဲ၊ ဘိလပ်မြေအိတ် အပိုင်းအစများမှာ ရေသွားရေလာအဖြစ်အသုံးပြုသော ရေမြောင်းများကို ပိတ်ဆို့နေသည်ဟု ရူပရွာဒေသခံ တစ်ဦးကဆိုသည်။
“ အခုက ရေမြာင်းတွေ အကုန်လုံးပိတ်ဆို့နေတယ်။ ရေစီးရေလာ မရှိတော့ဘူး။ မိုးရွာတာနဲ့ ရေတွေက မြောင်းကနေလျှံတက်လာပြီး နိမ့်နေတဲ့ ရပ်ကွက်တွေကို စီဝင်သွားတော့ မြေနိမ့်ပိုင်းလမ်းတွေ အကုန်လုံးနစ်သွားပါတယ်” ဟု ဆိုသည်။
ယခုကဲ့သို့ လမ်းမကြီးတစ်လျှောက် ရေမြောင်းများကို ပိတ်ဆို့နေသော်လည်း မြို့နယ် စည်ပင်က မရှင်းလင်းခြင်းမှာ လမ်းမကြီးကွန်ကရစ်လမ်း ပြုပြင်ခြင်းနှင့် သက်ဆိုင်သည်ဟု ယူဆထင်မြင်ကြောင်း ၎င်းရူပရွာသားက ဆိုသည်။
“ ကျနော့်အမြင် ပြောရရင်တော့ လမ်းမကြီးကို  ကွန်ကရစ်လမ်းခင်းတာကို စည်ပင်က လုပ်ခွင့်မရဘူး။ နယ်စပ်ရေးရာက လုပ်သွားတာ။ အဲဒီအပေါ်မှာ စည်ပင်ကလူတွေက သူတို့ အခွင့်အရေး မရလိုက်တဲ့ အတွက် မကျေနပ်လို့ ခုလို လမ်းမကြီးတလျှောက် ရေမြောင်းတွေကို မရှင်းလင်းဘဲ ဒီအတိုင်း ပစ်ထားတော့ ရေမြောင်းတွေ ပိတ်ဆို့ပြီး ခုလို ရေနစ်ရတာလို့ ထင်ပါတယ်” ဟု ဆိုသည်။
သို့သော်လည်း ရေမြောင်းများ ပိတ်ဆို့နေခြင်းမှာ ထိုသို့ ဟုတ်မဟုတ်ကို နိရဉ္စရာက အတည်ပြုနိင်ခြင်း မရှိပါ။
ရခိုင်ပြည်နယ် မြို့တော် စစ်တွေတွင် ရှု့ခင်းသာလမ်းနှင့် လမ်းမကြီးမှ အပ မြို့တွင်းရှိလမ်းအများအပြားမှာ ပျက်စီးနေပြီး အချို့လမ်းများတွင် ချိုင့်ခွက်ကြီးများ အကွက်လိုက် အကွက်လိုက် ဖြစ်ပေါ်နေသဖြင့် သွားလာရေးကို အထူးအခက်အခဲ ဖြစ်ပေါ်နေကြောင်း သိရသည်။
ထိုအထဲတွင် စစ်တွေမြို့မှ လူသွားလူလာအများဆုံး လမ်းများ ဖြစ်ကြသော မင်းဗာကြီးလမ်းနှင့် ကုန်တန်းလမ်းများ ပါဝင်သည်။ ထိုသို့ လမ်းများ ချိုင့်ခွက်ကြီးများ ဖြစ်ပေါ်နေသည့်အပြင် မကြာခဏ ရေမြုပ်နေသဖြင့် စစ်တွေမြို့မှာ အထူးညစ်ပတ်နေပြီး မြို့တော် တစ်ခု၏ အင်္ဂါနှင့် လုံးဝ မညီညွှတ်ဘဲ ဖြစ်နေသည်ဟု ဒေသခံ ပြည်သူများက ပြောဆိုနေကြသည်။
(သတင်းအရင်းအမြစ်- နိရဉ္စရာသတင်းဌာန)
Post a Comment