ရခိုင်အမျိုးသားပါတီ၏ ပွဲဦးထွက် နိုင်ငံရေး ဦးကျိုးမှု

“ရခိုင်ပြည်နယ်မှာ ပါတီ တစ်ခုခုက တစ်ပါတီ ကြီးစိုးရေးကို ဦးတည်ချက်ထားပါက ရခိုင်ပြည်နယ်တစ်ခုလုံးကို ချောက်ထဲ တွန်းချသလိုဖြစ်သွားပါမယ်။ ပါတီစုံ ဒီမိုကရေစီစနစ်ကိုလည်း ဆန့်ကျင်ရာ ရောက်သွားပါမယ်”
ရခိုင်ပြည်နယ်အမျိုးသားအင်အားစုပါတီ ဗဟိုကော်မတီဝင် ဦးကျော်ဖြူက ၂၀၁၄ ခုနှစ် ဇူလိုင် ၃ ရက်နေ့ထုတ် စံတော်ချိန် သတင်းစာမှ တဆင့် ပြောကြားခဲ့ခြင်း ဖြစ်သည်။
မှန်ပေသည်။ တစ်ပါတီ စနစ်ကြီးစိုးပြီး ပါတီတွင်း “မူ” ကို အခြေမပြု၊ “လူ” ကို အခြေပြုသည့် နိုင်ငံရေးဖောက်ပြန်မှုများ၊ နိုင်ငံရေး လိုဏ်စားမှုများ ရခိုင်ပြည်၌ ရှင်သန်ကြီးထွားလာမည်ကို ရခိုင်တိုင်းရင်းသားများအားလုံး စိုးရွံ့မည်မှာ မြေကြီးလက်ခတ်မလွဲ။ ထို အခြေ အနေမျိုးကို ရှောင်လွှဲနိုင်ရန် ရခိုင်အမျိုးသားတိုင်း သတိထား စောင့်ကြည့်သင့်သည်။ တစ်ဦးတစ်ယောက်ကို ဗဟိုပြုကာ တည်ဆောက်ထားသည့် နိုင်ငံရေးယဉ်ကျေးမှုသည် ဧကရာဇ် ခေတ်များတွင်သာ အောင်မြင်နိုင်ပေလိမ့်မည်။
ယနေ့ ရခိုင်အမျိုးသားတို့ ခါးသီးစွာ ရင်ဆိုင်နေရသော အခက်အခဲပြဿနာများကို ၀င်ရောက် တာဝန်ယူ မျှဝေ ဖြေရှင်းရန် ရခိုင်အမျိုးသားပါတီ (ALD + RNDP) ကို ယုံကြည် အားကိုးနေကြသည်။ ရခိုင်အမျိုးသားပါတီသည် ၀န်ကြီးချူပ်မပါသော ရခိုင်ပြည်နယ် အစိုးရဖွဲ့စည်းနိုင်ရေး ဟူသော ခံယူချက် တစ်ခုတည်းဖြင့် အင်အားကြီး ပါတီ (၂) ခုကို ဖုတ်ပူမီးတိုက် အပူတပြင်း ပေါင်းစည်းခဲ့ခြင်းဖြစ်သည်။ ဆိုရပါမူ မဲအပြတ်အသတ် အနိုင်ရရှိရေး တစ်ခုတည်းသည် ပါတီ ဦးဆောင်သူတို့၏ မဟာရည်မှန်းချက်။
သက်ဆိုင်ရာ ပါတီ တစ်ခုချင်းစီ၏ ချမှတ်ထားသော မူဝါဒ၊ လမ်းစဉ်၊ လုပ်ငန်းစဉ်၊ လုပ်ထုံးလုပ်နည်း၊ စည်းမျဉ်း - စည်းကမ်း၊ ရေတို-ရေရှည် စီမံချက်များကို ပေါင်းစည်းခဲ့ခြင်း မဟုတ်။ လူချင်းပေါင်းစည်းခြင်း၊ နာမည်ချင်း ပေါင်းစည်းခြင်း သက်သက်ဟု ယူဆရမည် ဖြစ်သည်။
စနစ်တကျ တည်ဆောက်ထားသော ပါတီအဖွဲ့အစည်းတစ်ခုတွင် ပါတီဝင်များ၏ အသိဥာဏ်၊ ဗဟုသုတနှင့် လက်တွေ့ ဖြတ်သန်းမှုများ အပေါ်တွင် အခြေခံ ထားခြင်းဖြစ်ရာ ထို အသိဗဟုသုတနှင့် အတွေ့အကြုံများအရ အလွယ်တကူ စွန့်လွှတ်ရန် မဖြစ်နိုင်ချေ။ သို့သော် စွဲကိုင်ထားသော အယူအဆနှင့် ကျင့်သုံးသည့် နည်းနာများကို သေချာဝေဖန် ဆန်းစစ်ခြင်း မပြုဘဲ အလွယ်တကူ စွန့်လွှတ်ခြင်းသည် သဘောထား ပျော့ပျောင်းခြင်း မမည်။ မူမဲ့ခြင်းသာဖြစ်သည်။ ဆိုရပါမူ ကြောင်ခံတွင်းပျက်နှင့် ဇရက်တောင်ပံကျိုးတို့ တွေ့ဆုံခြင်းနှယ် ရခိုင်အမျိုးသားပါတီကို အဓိပ္ပာယ် ဖွင့်ဆိုရမည် ဖြစ်သည်။

ရခိုင်အမျိုးသားပါတီ၏ ပွဲဦးထွက် နိုင်ငံရေး ဦးကျိုးမှု
-------------------------------------------------------
ရခိုင်ပြည်ရှိ မြို၊ သက်၊ ခမီ၊ ဒိုင်းနက်၊ မရမာ (ခေါ်) မရမာကြီး (ခေါ်) ဘရူဝါ၊ ကမန် စသည်တို့သည် ရခိုင် ပဒေသရာဇ်မင်းများ လက်ထက်ကပင် ဌာနေ တိုင်းရင်း သားများ၊ ရခိုင်ပြည်/ နိုင်ငံသားများအဖြစ် အသိအမှတ်ပြုပြီး ဖြစ်သည်။ ၎င်းတို့အနေဖြင့် လူမှုရေး၊ ပထ၀ီအရ ၎င်းတို့ အခြေချ စုစည်းနေထိုင်ရာ ဒေသများ၌ ၎င်းတို့၏ ဓလေ့ထုံးစံနှင့်အညီ ကိုင်ပိုင် အုပ်ချူပ်ခွင့် ရထိုက်သည်။ ဟိန္ဒူ ကုလား၊ မူဆလင် ကုလား၊ တရုတ်များအနေဖြင့် အဆိုပါ လူမျိုးစု များနှင့် သဟဇာတ ကျအောင် နေထိုင်လျှက် ရခိုင်အမျိုးသား နိုင်ငံရေး၊ တော်လှန်ရေး အကျိုးစီးပွားကို လက်တွေ့ကျကျ ပါဝင် ဆောင်ရွက်သူများကို နိုင်ငံသားအဖြစ် သတ်မှတ်ရမည်ဖြစ်သည်။
သို့သော် ဧပြီလတွင် ကျင်းပပြုလုပ်ခဲ့သည့် အမျိုးညီလာခံတွင် အဆိုပါ ဌာနေတိုင်းရင်းသားများ၏ နိုင်ငံရေးအရ ယုံကြည်ကိုးစားမှုကို ရခိုင်အမျိုးသား ပါတီ ဆုံးရှုံးခဲ့ရသည်။ ရခိုင်အမျိုးသား လက်နက်ကိုင်တပ်မတော်များ၏ နိုင်ငံရေးအရ လေးစားအားထားမှုကို စွန့်လွှတ်ခဲ့ရသည်။ သံတွဲ၊ တောင်ကုတ်၊ မာန်အောင်၊ ဂွ၊ အမ်း၊ ကျောက်ဖြူ စသည့် ဒေသိယ လေယူလေသိမ်း စကားသံနှင့်ပတ်သက်၍ အနည်းငယ် တင်းမာမှုများ ဖြစ်ပေါ်ခဲ့ရသည်။ ဤသည် ထိုဒေသများ၌ ရခိုင်အမျိုးသားပါတီအနေဖြင့် ရပ်တည်ရန် အခက်အခဲ ဖြစ်လာနိုင်သည်။
ပြည်နယ်ဝန်ကြီးချူပ် (ဟောင်း) ဦးလှမောင်တင် နုတ်ထွက်အပြီး အသစ်ခန့်အပ်မည့် ၀န်ကြီးချူပ် ရွေးချယ်မှုအပေါ် ပါတီ၏ သဘောထားကို ထုတ်ပြန်ခဲ့သည်။ ထို ထုတ်ပြန် ကြေညာချက်သည် ပါတီ၏ အာဘော်ဆိုသော်လည်း ဦးအေးမောင်၊ ဦးဇော်အေးမောင်တို့က ပါတီထုတ်ပြန်ချက်ကို သွေဖီကာ ဆန့်ကျင်သည့် လုပ်ရပ် အချို့ကို ပြုလုပ်ခဲ့သည်။ ဆိုရပါမူ ရခိုင်အမျိုးသားပါတီအပေါ် ပြည်သူလူထု ယုံကြည်မှု ဤတွင် ဆိတ်သုဉ်းခဲ့ရ၏။
ပါတီတွင်း ပါတီ တည်ဆောက်မှု
-----------------------------------
အပေါ်မှ အောက်ခြေသို့ ဗဟိုပြုကာ တည်ဆောက်ထားသည့် ANP သည် ယခုအခါ ယိမ်းယိုင်စ ပြုလာပြီဖြစ်သည်။ စစ်မရောက်ခင် မြှားကုန်လုနီးပါး ဖြစ်နေသည်။ ထိုသို့သော အခြေအနေများအပေါ် ANP ပါတီမှ အတွင်းရေးမှူး ဦးခိုင်ပြည်စိုးက “အစိုးရအကြိုက် စကားလုံးများကို ပြောပြီး ပါတီ သဘောထားနှင့် သွေဖီ နေသည်ကို ဖုံးကွယ်ရန် Capacity ၊ Diplomacy ၊ Win – Win Strategy စသည့် စကားလုံးများကို သုံးနေကြသော်လည်း ထိုစကားလုံးများသည် သွေဖီရေးသမားများ၏ ထွက်ပေါက်လမ်း ဖြစ်နေကြခြင်းကို သတိထားကြဖို့ လိုသည်” ဟူ၍ မှတ်ချက်ပြု ပြောကြားခဲ့သည်။
တဖန် ဦးအေးမောင်၊ ဦးဇော်အေးမောင်တို့ ဦးဆောင်သည့် ရခိုင်အမျိုးသားပါတီ (ရန်ကုန်) ကို ရည်ညွှန်းပြောဆိုထားသည်မှာ “ နောက်ဆုံး ပြောလိုသည်မှာ ပါတီမှ တာဝန်ရှိသူများအနေဖြင့် ပြည်သူမျက်နှာ၊ ပါတီ မျက်နှာတို့ကို မထောက်ထားဘဲ အစိုးရ အလိုကျ စကားလုံးများဖြင့် နိုင်ငံရေးခရီးကို ဆက်လျှောက်၍ မရနိုင်။ ပြည်သူသည်သာ အမိအဖဖြစ်၍ ထာဝရ ရှင်သန်နေသည့် ပြည်သူမေတ္တာကို ခံယူသည့် နိုင်ငံရေးသားကောင်း ရတနာများ ဖြစ်အောင် ကြိုးစားကြရန် အကြံပြုပါသည်” ဟူ၍ သူ၏ ခံယူချက်အပေါ် ပြတ်သားစွာ ပြောဆိုလာသည်။ ဤသည် ရခိုင် အမျိုးသားပါတီအတွင်း ပေါ်တင်စိန်ခေါ်မှုများအဖြစ် (သို့မဟုတ်) ရဲဝံ့စွာ ဝေဖန်လာခြင်းဟု ယူဆရမည်ဖြစ်သည်။ သို့ဆိုလျှင် ရခိုင်အမျိုးသားပါတီ ထိပ်ပိုင်းအတွင်း မည်သို့သော လျှို့ဝှက်ချက်များ ရှိနေပြီနည်း။ ပါတီသည် ၎င်းတို့၏ မူပိုင် မဟုတ်။ အမျိုးသားပါတီကို ရခိုင်အမျိုးသားတိုင်း ပိုင်ဆိုင်သည်။ အမျိုးသား အကျိုးစီးပွားအတွက် စင်စစ် အရေးပါသော ဆုံးဖြတ်ချက်များကို ၎င်းတို့၏ သဘောဆန္ဒတစ်ခုတည်းဖြင့် ဆုံးဖြတ်ကြသည်ဆိုလျှင် ANP ၏ နေ၀င်ချိန်ကို မကြာသော ကာလတစ်ခုတွင် ပြည်သူများက ကြေညာရတော့မည် ဖြစ်သည်။
ရခိုင်အမျိုးသားပါတီအတွင်း - RNDP (Sittwe) ၊ RNDP (Yangoon) နှင့် ALD အဖြစ် အုပ်စု သုံးခု ပါတီတွင်း လျှို့ဝှက် ပါတီငယ်များ တည်ဆောက်နေကြောင်း ပါတီနှင့် နီးစပ်သူများက ထောက်ပြလာကြသည်။ ဦးအေးမောင်၊ ဦးဇော်အေးမောင်၊ ဦးလှစောတို့ ဦးဆောင်သည့် RNDP (Yangoon)၊ ဦးခိုင်ပြည်စိုး၊ ဦးခိုင်ကျော်မိုး၊ ဦးကျော်ဇော်ဦး တို့ ဦးဆောင်သည့် RNDP (Sittwe) နှင့် ရန်ကုန် စကောလားရှစ်၊ British Council လူငယ်များ ဦးဆောင်သည့် ALD အင်အားစုများ အဖြစ် ရခိုင်အမျိုးသားပါတီတွင် အသီးသီး တွေ့မြင်လာရသည်။
ပြည်သူနှင့် လမ်းလွှဲနေသော ပါတီ
-------------------------------------
ထိုထိုသော ရခိုင်အမျိုးသားပါတီအား ဒေသခံ တိုင်းရင်းသားများက ဤသို့ ရှုမြင်လာကြသည်။ ANP သည် ရခိုင်ပြည်တွင်း ဒေသ တည်ငြိမ်အေးချမ်းမှုကိုသော် လည်းကောင်း၊ ပြည်သူများ၏ အသက်အိုးအိမ်စည်းစိမ်ကိုသော်လည်းကောင်း၊ ရခိုင်လူမျိုးများ၏ ကံကြမ္မာကိုသော်လည်းကောင်း ဖန်တီးနိုင်စွမ်း မရှိ။ ၂၀၀၈ ဖွဲ့စည်းပုံ အခြေခံ ဥပဒေ၏ လောင်းရိပ်အောက်မှ မွေးဖွားလာခဲ့သော ပါတီဖြစ်သည်နှင့် အညီ ထို ဥပဒေဘောင်တွင်းမှ နေ၍ ပြည်သူများ၏ အသက် အိုးအိမ် စည်းစိမ်ကို စောင့်ရှောက်နိုင်ခြင်း မပြုလုပ်နိုင်။ ပါတီ၏ လမ်းစဉ်များကို ပြည်သူများအပေါ် ထင်သာမြင်သာရှိအောင် ထုတ်ပြန် ကြေညာခြင်းမရှိ စသဖြင့် ထင်မြင်ချက်များ အသီးသီး ချပြလာကြသည်။
ပါတီ တစ်ခုအနေနှင့် ခိုင်မာသော အနာဂတ် မူဝါဒများ ရှိနေရန် လိုအပ်သည့် အခြေအနေတွင် ပါတီတွင်း ခေါင်းဆောင်က တခြား အဖွဲ့ဝင်က တခြားသာ ဖြစ်နေသည်။ ဤသည်မှာ ၂၀၁၅ မတိုင်မီ ရခိုင်အမျိုးသားပါတီ (ANP) ၏ ထိပ်ပိုင်းရာထူးအား အနည်းငယ် အပြောင်းအလဲ ပြုလုပ်စေလိုသည့် အငွေ့ အသက်များအဖြစ် ရှုမြင်ရမည် ဖြစ်သည်။
ပါတီခေါင်းဆောင်များကိုယ်၌က မဖြစ်နိုင်မှန်း သိထားသည့် အရာများကို ပြည်သူလူထုသို့ ရည်ရွယ်ချက်ရှိရှိ လိမ်လည်လှည့်ဖြားခြင်းမျိုး ပြုလုပ်ခြင်းသည် ပါတီကို ပြည်သူက လုံးဝ အထင်သေးစေနိုင်သည်။ ပါတီ ဦးဆောင်သူများအနေဖြင့် ဤအချက်ကို အထူးသတိပြုသင့်သည်။ မသေချာသော၊ လုံးဝ မဖြစ်နိုင်ရန် ရာနှုန်းပြည့် သေချာသော အရာများကို ဖြစ်ရမည်ဟူသော တလွှဲ မျှော်လင့်ချက်များ ချပြပေးနေသော လူပုဂ္ဂိုလ်များကို ပါတီမှ စီစစ်ကာ ရှင်းလင်းသင့်သည်။ သို့မဟုတ်ပါက မိမိတို့ မျှော်လင့်ထားသော အနာဂတ် ရခိုင်ပြည် တည်ဆောက်ရေး လုပ်ငန်းစဉ်များတွင် ပြည်သူက ပါတီကို ယုံကြည်မှု လုံးဝ ကင်းမဲ့သွားနိုင် သည်။ သို့ဆိုပါက ပါတီနှင့် ပြည်သူသည် တသားတည်း ဖြစ်မလာတော့ပဲ မိမိတို့မှာ အပင်ပန်းခံ တည်ဆောက်ခဲ့ရသမျှ ထရွိင်မြို့ ပျက်စီးသကဲ့သို့၊ ဆိုဗီယက် ယူနီယံ ပြိုကွဲသကဲ့သို့ တခဏနှင့် အရာအားလုံး ဆုံးရှုံးပြီးသား ဖြစ်နေလိမ့်မည်။
အတွေးမှားက ဦးဆောင်နေသည့် အလုပ်မှား
--------------------------------------------------
ယနေ့ ရခိုင်အမျိုးသားပါတီ ခေါင်းဆောင်အချို့သည် ပါတီ၏ အပေါ်တွင် ရောက်နေကြသည်။ ပါတီနှင့် ရခိုင်ပြည်၊ ရခိုင်လူမျိုးများသည် ၎င်းတို့၏ အဆုံးအဖြတ်ပေါ်တွင် မူတည်နေသည်ဟု သူတို့ကိုယ် သူတို့ ခံယူနေကြသည်။ ထိုခံယူချက်ဖြင့် မိမိတို့ တွေးသည့်အတိုင်း လုပ်ဆောင်လာကြသည်။ ပါတီဝင်များ၏ သဘောဆန္ဒကို ရယူခြင်းမပြု။ ပြည်သူလူထု၏ သဘောဆန္ဒကို တောင်းခံခြင်းမပြု။ အတွေးမှားက ဦးဆောင်နေသည့် အလုပ်မှားဟု ကောက်ချက်ချရမည်ဖြစ်သည်။ ဦးခိုင်ပြည်စိုး၏ စကားအရ ဆိုရပါမူ - အစိုးရအကြိုက် စကားလုံးများကို ပြောပြီး ပါတီ သဘောထားနှင့် သွေဖီနေသည်ကို ဖုံးကွယ်ရန် Capacity ၊ Diplomacy ၊ Win – Win Strategy စသည့် စကားလုံးများ ကို သုံးနေကြသော်လည်း ထိုစကားလုံးများသည် သွေဖီရေးသမားများ၏ ထွက်ပေါက်လမ်းသာ ဖြစ်သည်။ သို့ဖြစ်ရာ “ရခိုင်ပြည်နယ်မှာ ပါတီ တစ်ခုခုက တစ်ပါတီ ကြီးစိုးရေးကို ဦးတည်ချက်ထားပါက ရခိုင်ပြည်နယ်တစ်ခုလုံးကို ချောက်ထဲ တွန်းချသလိုဖြစ်သွားပါမယ်။ ပါတီစုံ ဒီမိုကရေစီစနစ်ကိုလည်း ဆန့်ကျင်ရာ ရောက်သွားပါမယ်” ဟူသော ရခိုင်ပြည်နယ်အမျိုးသားအင်အားစုပါတီ ဗဟိုကော်မတီဝင် ဦးကျော်ဖြူက ပြောကြားခဲ့သည်မှာ ဤ အခြေအနေရ မှန်ကန်ကြောင်း သက်သေပြခဲ့ပြီဖြစ်သည်။
နိဂုံး
------
“သူ့လို မဖြစ်ချင်လျှင် သူ့ကို လေ့လာပါ၊ သို့သော် တခါတရံ၌ သူ့ကို လေ့လာရင်းနှင့်လည်း သူ့လို ဖြစ်သွားတတ်သည်” ဟူသော စကားအရ ယနေ့ ရခိုင်အမျိုးသားပါတီ ခေါင်းဆောင်အချို့သည် အာဏာရှင်စနစ်ကို တွန်းလှန်လို၍သော်လည်းကောင်း၊ ရခိုင်ပြည်ကို ဆင်းရဲဒုက္ခမှ ကယ်တင်လို၍ သော်လည်း ကောင်း၊ ၂၀၀၈ ဖွဲ့စည်းပုံ အရိပ်အာဝါသမှ တဆင့် ရခိုင်ပြည်ကို လူမျိုးခြားပါတီတို့မှ စိတ်ကြိုက်ချယ်လှယ်ခွင့်ကို မရရှိစေလို၍သော်လည်းကောင်း အကြောင်းအမျိုးမျိုးကြောင့် ၂၀၁၀ အလွန်၌ သက်ဆိုင်ရာ နယ်ပယ်အလိုက် လွှတ်တော်အမတ်၊ လွှတ်တော် ကိုယ်စားလှယ်၊ ၀န်ကြီးများ စသဖြင့် အသီးသီးဖြစ်လာကြသည်။ သို့ရာတွင် ထိုထိုသော နယ်ပယ်စုံ၌ တာဝန်ယူနေကြသော သူများသည် ယနေ့အချိန်တွင် သူ့လို မဖြစ်ချင်၍ သူ့ကိုလေ့လာယင်း သူ့လို ဖြစ်ခဲ့ရပြီ ဖြစ်သည်။ ဆိုသော် တစ်ပါတီ စနစ်၏ ဆိုးပြစ်များကို “မသွားမီက ရောက်နှင့်သည်” ဟု ဆိုရတော့မည်ဖြစ်သည်။ သို့ဖြစ်ရာ ရခိုင်ပြည်၊ ရခိုင်လူမျိုး၏ အကျိုးကျေးဇူးကို အမှန်တကယ်လိုလားသော၊ သစ္စာစောင့်သိသော၊ အမြင့်တွင် အထီးကျန်စွာ နေရဲသော၊ ရပ်တည်ရဲသော၊ အနစ်နာခံလိုသော ခေါင်းဆောင်မျိုး စင်စစ် ရှားပါးနေချိန်တွင် ရခိုင်အမျိုးသားတို့အနေဖြင့် တစ်ပါတီ စနစ်ကို လုံးဝ ရှောင်ရှား သင့်သည်။ သို့မဟုတ်ပါက “ကျားကြောက်လို့ ရှင်ကြီးကိုး၊ ရှင်ကြီး ကျားထက်ဆိုး” ဆိုသကဲ့သို့ ရခိုင်အမျိုးသားများသည် “အမှားပေါ် အမှားဆင့် ၊ မှားပြီးယင်း မှား” ၊ “ ရုန်းလေ နစ်လေ” ဆိုသလို ဤနွံဝဲဂယက်ထဲမှ ရုန်းထွက်ရန် အခွင့်အလမ်း ရှာဖွေတွေ့ရှိတော့မည်မဟုတ်ချေ။
(စာရေးသူ- အောင်ရဲလင်း (စစ်တွေ))
(ဤဆောင်းပါးကို Development News Journal မှ ကူးယူဖော်ပြပါသည်)