အိုဘားမား ရန်ကုန်ရောက်သည်နှင့် အတွင်းဝန်ရုံးတန်းသွား၊ ထို့နောက် ဒေါ်အောင်ဆန်းစုကြည်နှင့် တွေ့ဆုံ

ဓာတ်ပုံ- ကျော်ဇင်သန်း

ရန်ကုန် - အမေရိကန်သမ္မတ အိုဘားမားသည် ၂ နှစ်အတွင်း ဒုတိယမြောက် ခရီးစဉ်အဖြစ် ရန်ကုန်မြို့သို့ ယနေ့နံနက် ၁၀ နာရီ ၄၅ မိနစ်တွင် ရောက်ရှိလာသည်။

Air Force One လေယာဉ်ဖြင့် နေပြည်တော်မှ ရောက်ရှိလာသော အိုဘားမားသည် ရန်ကုန်လေဆိပ်မှတစ်ဆင့် အတွင်းဝန်ရုံး (၀န်ကြီးများရုံး)သို့ သွားရောက်ခဲ့ပြီး နံနက် ၁၁ နာရီဝန်းကျင်တွင် ရောက်ရှိကာ မိနစ် ၂၀ ခန့် လေ့လာကြည့်ရှုပြီးနောက် ၁၁ နာရီ ၂၀ တွင် ပြန်လည်ထွက်ခွာသွားသည်။

ထို့နောက် တက္ကသိုလ်ရိပ်သာလမ်းရှိ ဒေါ်အောင်ဆန်းစုကြည်နေအိမ်သို့ ၁၁ နာရီ ၃၀ တွင် ရောက်ရှိသည်။ ဒေါ်အောင်ဆန်းစုကြည်နှင့် အိုဘားမားတို့မှာ ယခုသတင်းရေးသားချိန်ထိ (၁၂ နာရီ ၃၀ မိနစ်)တွေ့ဆုံနေဆဲဖြစ်ကြောင်း 7 Day သတင်းထောက်က သတင်းပေးပို့သည်။

ဒေါ်အောင်ဆန်းစုကြည်နှင့် တွေ့ဆုံပြီးလျင် ယနေ့မွန်းလွဲပိုင်း၌ အမေရိကန်သံရုံးတွင် အရပ်ဘက်အဖွဲ့အစည်းများနှင့် တွေ့ဆုံမည် ဖြစ်သည်။
ထို့နောက် ယနေ့ညနေပိုင်းတွင် စိန်ရတုတက္ကသိုလ်၌ မိန့်ခွန်းပြောကြားမည်ဖြစ်ပြီး၊ ထို့နောက်မြန်မာနိုင်ငံမှ ပြန်လည်ထွက်ခွာမည် ဖြစ်သည်။ ၂၀၁၂ နိုဝင်ဘာလတွင် အိုဘားမား၏ ပထမဆုံး မြန်မာခရီးစဉ်အဖြစ် ရန်ကုန်မြို့သို့ ၆ နာရီကြာ လာရောက်ခဲ့သည်။

ဓာတ်ပုံ- ငြိမ်းချမ်း

(သတင်းအရင်းအမြစ်- 7 Days News)