Thursday, November 21, 2013

မြန်မာနိုင်ငံသို့ ပြန်လည်ဝင်ရောက်လာသော တိုင်းရင်းသား ၇၀၀ ကျော်အား ယာယီနေထိုင်ခွင့် ပါမစ်များ ထုတ်ပေးထား

မိုးလွန်ကာလတွင် ဘင်္ဂလားဒေ့ရ်ှမှ တိုင်းရင်းသားများ မြန်မာနိုင်ငံ အတွင်းသို့ စတင်ဝင်ရောက်လာပြီး လက်ရှိအချိန်တွင် မြန်မာနိုင်ငံသို့ ပြန်လည်ဝင်ရောက်လာသော တိုင်းရင်းသား ၇၀၀ ကျော်အား ယာယီနေထိုင်ခွင့် ပါမစ်များ ထုတ်ပေးထားကြောင်း သတင်းရရှိသည်။
ပွင့်လင်းရာသီ စတင်ချိန် အောက်တိုဘာ ၁၅ ရက်မှ ဘင်္ဂလားဒေ့ရ်ှမှ တိုင်းရင်းသား မိသားစုများ စတင်ဝင်ရောက်လာပြီး လက်ရှိတွင် မိသားစု ၁၆ စု၊ လူဦးရေ ၅၀ နီးပါးခန့် ၀င်ရောက်ခဲ့ကြောင်း၊ ၀င်ရောက်လာသူများမှာ ဘင်္ဂလားဒေ့ရ်ှနိုင်ငံ၊ ရွာတော်နှင့် အိန္ဒိယ နယ်စပ်ဘက်မှ လူများလည်း ပါဝင်ကြောင်းနှင့် မောင်တောမြို့ပေါ် ဗဟိုကျောင်းတိုက်တွင် ယာယီတည်းခိုရကြောင်း သိရသည်။
လက်ရှိတွင် ယင်းသို့ဝင်ရောက်လာသည့် ဒုက္ခသည်များအတွက် စောင်၊ ခြင်ထောင်၊ အနွေးထည်၊ အိုးခွက်၊ ပန်းကန်များ လိုအပ်နေကြောင်းနှင့် နေအိမ်များတည် ဆောက်နေသည့် အောင်သာယာ ကျေးရွာသို့ ပြောင်းရွှေ့ရန်ရှိကြောင်း မောင်တောမြို့ ဗဟိုကျောင်း ဆရာတော်က မိန့်ကြားသည်။
ဝင်ရောက်လာသူများအား စိစစ်ကာ ယာယီနေထိုင်ခွင့် ပါမစ်အား အသက် ၁၂ အထက် လူဦးရေ ၇၀၀ ကျော်အား ထုတ်ပေးထားခြင်းဖြစ်ပြီး သုံးနှစ်ယာယီ နေထိုင်ခွင့် ပေးထားခြင်း ဖြစ်ကြောင်းနှင့် မြန်မာနိုင်ငံအတွင်း ဥပဒေအတိုင်း ငြိမ်းချမ်းစွာ နေထိုင်လျင် ဆက်လက်ပြီး နေထိုင်ခွင့် ပေးမည်ဖြစ်ကြောင်း သိရသည်။
"ကျွန်တော်တို့ကို လ၀ကက စစ်ဆေးပြီး MDW (IP) ဆိုပြီး ယာယီနေထိုင်ခွင့် ပါမစ်ပေးထားပါတယ်။ နောက်ပြီး မောင်တောမြို့နယ် ပြင်ပဖြစ်တဲ့ စစ်တွေနဲ့ ရန်ကုန်ထိကို သွားလိုရင်တော့ ခရိုင်လ၀ကကနေ ခရီးသွားခွင့် ပါမစ်တောင်းပြီး သွားနိုင်တယ်လို့ သိရတယ်။ ကျွန်တော်တို့ကို ယာယီနေထိုင်ခွင့် ပေးတာက စက်တင်ဘာလက ဖြစ်ပါတယ်" ဟု ခရေမြိုင် ကျေးရွာတွင် ယာယီနေထိုင်ခွင့် ရသူတစ်ဦးက ပြောကြားသည်။
ရခိုင်ပြည်နယ်အတွင်း ပဋိပက္ခ ဖြစ်ပွားပြီးနောက် တစ်ဆက်တည်း ဘင်္ဂလားဒေ့ရှ် နိုင်ငံရှိ မြန်မာတိုင်းရင်းသား မျိုးနွယ်စုများအား ဘင်္ဂလီများက အကြမ်းဖက်ခြင်းများ ဆက်တိုက်ဖြစ်ပေါ်နေပြီး နေစ လူနေမှု ဘ၀တွင် လုံခြုံမှုမရှိ အခက်အခဲ ရှိလာသဖြင့် မြန်မာနိုင်ငံသို့ ၀င်ရောက်လာကာ ခိုလှုံခွင့် တောင်းခံလာခြင်းဖြစ်ပြီး လက်ရှိတွင် အိမ်ထောင်စု ၂၀၀ ကျော်၊ လူဦးရေ ၁၀၀၀ ကျော် ၀င်ရောက်ပြီးဖြစ်ကြောင်း သိရသည်။
လက်ရှိတွင် ဒေသအုပ်ချုပ်ရေးနှင့် မောင်တောမြို့ခံ လူမှုအဖွဲ့အစည်းများက ရိက္ခာများ ထောက်ပံ့ပေးထားပြီး တစ်အိမ်ထောင်လျှင် လယ်မြေ ၁ ဧကခန့် ဖော်ထုတ်ပေးထားကာ လယ်ထွန်စက်နှင့် မျိုးစေ့များ ထောက်ပံ့ပေးထားကြောင်းလည်း သိရသည်။
(သတင်းအရင်းအမြစ်- Eleven Media Group)
Post a Comment