ဆတ်ရိုးကျ(ခ) မူလွန်ကျောင်းမှ ကလေးငယ်များ (ဓါတ်ပုံ- နိရဉ္စရာ)
ယင်းကျောင်းသည် စစ်တွေမြို့ ဆတ်ရိုးကျချောင်း တစ်ဘက်ကမ်းတွင် တည်ရှိပြီး ကျောင်းသား ကျောင်းသူ (၅၃၂) ဦးအတွက် အရှည် ပေ ၈၀၊ အနံပေ ၃၀ ရှိသော ကျောင်းဆောင်တစ်ခုသာရှိကြောင်း သိရသည်။
“ ကျွန်မတို့ကျောင်းမှာ ကျောင်းဆောင် မလုံလောက်မူနဲ့ ရင်ဆိုင်နေရပါတယ်။ ပရိဘောဂတွေလည်း မရှိဘူး။ ခြံစည်းရိုးလည်း မရှိဘူး။ ဒါကြောင့် ကျောင်းသားတွေကို နှစ်သုတ်ခွဲပြီး နံနက်တစ်ကြိမ်၊ နေ့လည်ပိုင်း တစ်ကြိမ် (၂) ကြိမ်ခွဲ၍ သင်ကြားနေရပါတယ်။ ဒါတောင် ပျစ်ညှပ်ပြီး သင်ကြားနေရပါတယ်” ဟု ဆတ်ရိုးကျ (ခ) မူလွန်ကျောင်းအုပ် ဆရာမကြီး ဒေါ်ညွှန့်ရီကပြောသည်။
ထိုသို့ နှစ်သုတ်ခွဲသော်လည်း ကျောင်းသားများ ကျောင်းနှင့် မဆံ့ ဖြစ်နေသဖြင့် ပထမတန်းနှင့် ဒုတိယတန်း ကျောင်းသားများကို ယင်းကျောင်းမှ ခွဲထုတ်ပြီး ရွာလယ်ရှိ တရုတ်နိုင်ငံမှ ဒုက္ခသည်များအတွက် ကူညီပေးသော မိုကျူလာ (၂) ထပ်အိမ်တွင် စာသင်ကြားနေရဟု ဆရာမက ဆိုသည်။
၎င်းပြင် ဆတ်ရိုးကျ (ခ) မူလွန်ကျောင်းတွင် သူငယ်တန်းမှ ခုနှစ်တန်းထိ စာသင်ကြားနေသော်လည်း ကလေးငယ်များ စာသင်ရန် စာရေးခုံများ၊ ထိုင်ခုံများလည်း မရှိသဖြင့် မြေကြီးပေါ်တွင် ပလစတစ်ဖျာငယ်များကို ခင်းကာ စာသင်ကြားနေကြရသည်။
ယခုကဲ့သို့ ကျောင်းဆောင် မလုံလောက်မူ ဖြစ်နေရခြင်းမှာ ဆတ်ရိုးကျ (ခ) မူလွန်ကျောင်းအတွက် ကျထားသော ကျောင်းဆောင်ကို သက်ဆိုင်ရာ ပြည်နယ်အဆင့် တာဝန်ရှိသူများမှ တခြားရွာသို့ ပြောင်းရွှေ့ တည်ဆောက်ထား၍ ဖြစ်ကြောင်း ကျေးရွာကျောင်းအကျိုးတော်ဆောင် ဥက္ကဌ ဦးစောသိန်းအောင်က ပြောသည်။
“ ၂၀၁၂-၂၀၁၃ ကတည်းက ကျွန်တော်တို့ရွာအတွက် ကျောင်းဆောင် တစ်ခုကျတယ်ဆိုတာကို မြို့နယ် ပညာရေးမှူးရော၊ တခြား အစိုးရ တာဝန်ရှိသူတွေက တရားဝင် ပြောပါတယ်။ ဒါပေမယ့် ဒီကျောင်းကို အထက်လူကြီးတွေက ကျွန်တော်တို့ ရွာမှာ မဆောက်ဘဲ ကျွန်တော်ရွာအနီးက ကျေးတောပိုက်ဆိပ်မှာ တည်ဆောက်ထားတာကို တွေ့ရပါတယ်” ဟု သူက ဆိုသည်။
ဆတ်ရိုးကျ (ခ) မူလွန်ကျောင်းအတွက် သက်ဆိုင်ရာမှ ခွင့်ပြုပေးထားသောကျောင်းကို ကျေးတော ပိုက်ဆိပ်တွင် ပြောင်းရွှေ့တည်ဆောက်ထားခြင်းမှာ ဟုတ်မှန်ကြောင်း၊ ကျောင်းဆောင်မှာ အလျားပေ ၆၀ နှင့် အနံ ပေ၃၀ ရှိကြောင်း ဆရာမကြီးမှ ထောက်ခံ ပြောဆိုသည်။
“ ကျွန်တော်တို့ ဆတ်ရိုးကျ ရပ်ကွက်မှာ လက်ရှိ ရှိနေတဲ့ကျောင်းဆောင်က ကျောင်းသား ကျောင်းသူ (၁၀၀) တောင် မဆံ့ဘူး။ ဒီလို အဆောက်အဦးမှာ ကျောင်းသား ၅၀၀ ကျော် စာသင်နေကြရတာ ဘယ်လို အခက်အခဲတွေ ရှိမယ်ဆိုတာက လူတိုင်းစဉ်းစားကြည့်ရင် သိနိုင်ပါတယ်” ဟု ယင်းရပ်ကွက်တွင် နှစ်ပေါင်း (၂၀) ကျော် ရယက စာရေးအဖြစ် တာဝန် ထမ်းဆောင်လာသူ ဦးရန်မျိုးအောင်က ပြောသည်။
ထိုသို့ ကျောင်းသားများပြီး ကျောင်းဆောင်သေးငယ်လွန်းနေ၍ ကျောင်းသားများ စာသင်ရန် အခက်အခဲ ဖြစ်နေသဖြင့် ဆတ်ရိုးကျ ရပ်ကွက်မှ လူကြီးများက လွန်ခဲ့သည့် အပတ်က ပြည်နယ် ပညာရေးမှူး ဦး လှစိန်ထွန်းထံသို့ သွားရောက်ပြီး ကျောင်းဆောင်သစ် တစ်ခုချပေးရန် တောင်းဆိုခဲ့ကြသည်ဟု ရပ်ရွာ လူကြီး တစ်ဦးဖြစ်သူ ဦးမြတ်ထွန်းက ဆိုသည်။
“ ကျွန်တော်တို့ကို ပြည်နယ် ပညာရေးမှူးက ပြောတာက အစိုးရအဖွဲ့က ညှိပီး ခင်ဗျားတို့ ရပ်ကွက်အတွက် ကျနေတဲ့ကျောင်းကို တခြားနေရာကို ယူသွားတယ်လို့ ပြောပါတယ်။ ဒါဆိုရင် ကျွန်တော်တို့ရဲ့ ကလေးတွေ စာမသင်ရ ဖြစ်နေတဲ့ အတွက် နောက်ထပ် ကျောင်းဆောင်သစ်တစ်ခု ချပေးပါ ပြောတော့ ပညာရေးမှူးက သူ့အနေနဲ့ တစ်ခုလည်း မတတ်နိုင်ဘူးလို့ ပြောဆိုပါတယ်” ဟု သူက ဆိုသည်။
ယင်းကျောင်းတွင် ဆရာ ဆရာမ (၁၂) ဦးနှင့် ကျောင်းလုပ်သား (၁) ဦးရှိပြီး ကျောင်းသားများ (၂) သုတ်ခွဲပြရသဖြင့် ဆရာ ဆရာမများမှာ အထူးပင်ပန်းပြီး ကျောင်းဆရာများလည်း ထပ်မံလိုအပ်နေသည်ဟု ဆိုသည်။
“ ကျွန်တော်တို့ အနေနဲ့ နိုင်ငံတော်သမ္မတကြီးနဲ့ ရခိုင် ပြည်နယ် ၀န်ကြီးချုပ် အသစ်ကို ကျွန်တော်တို့ရွာက ကလေးတွေ ပညာသင်ကြားရေးမှာ အထူးအခက်အခဲ ဖြစ်နေတဲ့ အတွက် ကျောင်းသားတွေ အရေအတွက်နဲ့ ညီမျှတဲ့ ကျောင်းဆောင်သစ်တစ်ခုကို တိုးချဲ့ တည်ဆောက်ပေးဖို့ မေတ္တာရပ်ခံပါတယ်။ ဒါ့ပြင် အထက်လူကြီး တွေကို ကျွန်တော် ရပ်ကွက်က ကလေးတွေ ဘယ်လို အခက်အခဲ၊ အကျပ်အတည်းတွေနဲ့ စာသင်နေကြရတယ်ဆိုတာကို လာရောက်စစ်ဆေးလိုပါတယ်” ဟု ဦးမြတ်ထွန်းက ဆိုသည်။
ယင်းအခက်အခဲ ဖြစ်နေသော ဆတ်ရိးကျ (ခ) မူလွန်ကျောင်းသို့ နိရဉ္စရာအယ်ဒီတာ ဦးခိုင်မြတ်ကျော် ကိုယ်တိုင် ဇွန်လ (၃) ရက်နေ့က သွားရောက်ခဲ့ပြီး ကျောင်းသားကျောင်းသူများအတွက် ကျပ်ငွေ (၁၀၄၅၀၀) နှင့် ညီမျှသော ဗလာစာအုပ် (၄၆) ဒါဇင်၊ ခဲတံ (၂၀) ဒါဇင်နှင့် ဘော်လ်ပန် (၃) ဘောက်စ် သွားရောက် ကူညီ လှူဒါန်းခဲ့ကြောင်း သတင်း ရရှိသည်။
(သတင်းအရင်းအမြစ်- နိရဉ္စရာသတင်းဌာန)
No comments:
Post a Comment